വാഷിങ്ടൺ : ഇറാന്റെ സായുധസേനയായ ഐആർജിസി (IRGC) യുഎസിന്റെ രണ്ട് യുദ്ധക്കപ്പലുകൾക്ക് നേരെ നടത്തിയ മിസൈലാക്രമണമാണ് ഇരുരാജ്യങ്ങളും തമ്മിലുള്ള സംഘർഷം പുതിയൊരു തലത്തിലേക്ക് എത്തിച്ചത്. പട്രോളിംഗിനിടയിലുള്ള യുഎസിന്റെ രണ്ട് കപ്പലുകൾ ലക്ഷ്യമിട്ടാണ് ഇറാൻ ആക്രമണം അഴിച്ചുവിട്ടത്. എങ്കിലും, യുഎസ് സെൻട്രൽ കമാൻഡിന്റെ കൃത്യമായ ഇടപെടലിലൂടെ ഈ ആക്രമണങ്ങളെ വിജയകരമായി പ്രതിരോധിക്കാൻ സാധിച്ചു. ആക്രമണത്തിൽ യുഎസ് സൈനികർ ആർക്കും പരിക്കുകളേൽക്കാതെ സുരക്ഷിതരായിരിക്കുകയാണെന്നും യുഎസ് സെൻട്രൽ കമാൻഡ് ഔദ്യോഗികമായി വ്യക്തമാക്കി.
യുഎസ് യുദ്ധക്കപ്പലുകൾക്ക് നേടെയുണ്ടായ മിസൈൽ നീക്കത്തിന് കനത്ത തിരിച്ചടിയായാണ് അമേരിക്ക ഇറാന്റെ മൂന്ന് എണ്ണക്കപ്പലുകൾ ആക്രമിച്ചത്. ഐആർജിസിയുടെ ഉടമസ്ഥതയിലുള്ള എം/ടി ഡൗണി (M/T Downy), എം/ടി സ്റ്റാർക് 1 (M/T Stark 1) എന്നീ എണ്ണക്കപ്പലുകളാണ് പ്രധാനമായും ആക്രമിക്കപ്പെട്ടത്. ഇതിനുപുറമേ, ചരക്കുകളില്ലാതിരുന്ന മറ്റൊരു കപ്പലിന് നേരെയും വ്യോമ-നാവിക സംയുക്ത ആക്രമണങ്ങൾ ഉണ്ടായതായി പെന്റഗൺ അറിയിച്ചു.
ഖാർഗ് ദ്വീപിന് സമീപത്തുവെച്ചാണ് എം/ടി ഡൗണി കപ്പലിന് നേരെ യുഎസിന്റെ വ്യോമാക്രമണമുണ്ടായത്. ജാസ്ക് തീരത്തിന് സമീപത്തുവെച്ചാണ് എം/ടി സ്റ്റാർക് 1 തകർത്തത്. കൂടാതെ, ഒമാൻ ഉൾക്കടലിൽ വെച്ച് ചരക്കുകളില്ലാതിരുന്ന മൂന്നാമത്തെ കപ്പലിനെയും ലക്ഷ്യമിട്ട് കൃത്യമായ പ്രഹരമേൽപ്പിക്കുകയായിരുന്നു. ഈ മൂന്ന് കപ്പലുകളും ഇറാന് സാമ്പത്തിക അടിത്തറ നൽകുന്ന സംവിധാനങ്ങളുടെ ഭാഗമാണെന്നാണ് യുഎസ് വാദം.
സംഭവത്തിന് പിന്നാലെ ഇറാനെതിരെ അതിശക്തമായ ഭീഷണിയുമായി യുഎസ് സെൻട്രൽ കമാൻഡ് കമാൻഡർ അഡ്മിറൽ ബ്രാഡ് കൂപ്പർ രംഗത്തെത്തി. സ്വന്തം സൈന്യത്തെയും കപ്പലുകളെയും സംരക്ഷിക്കാൻ അമേരിക്ക ഒട്ടും മടിക്കില്ലെന്നും, വേണമെങ്കിൽ ഇറാന്റെ മുഴുവൻ എണ്ണക്കപ്പൽ വ്യൂഹവും തകർത്തുതരിപ്പണമാക്കുമെന്നും അദ്ദേഹം മുന്നറിയിപ്പ് നൽകി. അമേരിക്കൻ കപ്പലുകൾക്ക് നേരെ വരുന്ന വെടിയുണ്ടകൾക്ക് വലിയ സാമ്പത്തിക പ്രത്യാഘാതങ്ങളോടെ തിരിച്ചടി നൽകുമെന്ന വ്യക്തമായ സന്ദേശമാണ് ഐആർജിസിക്ക് നൽകിയിരിക്കുന്നതെന്നും അദ്ദേഹം കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
