ന്യൂയോർക്ക്: അമേരിക്കയിലെ ന്യൂയോർക്ക് നഗരഹൃദയമായ ടൈംസ് സ്ക്വയറിലുണ്ടായ ദാരുണമായ കത്തിക്കുത്തിൽ ബാങ്ക് ഓഫ് അമേരിക്ക വൈസ് പ്രസിഡൻ്റ് കൊല്ലപ്പെട്ടു. ബാങ്കിൻ്റെ ബിസിനസ് സെലക്ഷൻ ആൻ്റ് കോൺഫ്ലിക്ട്സ് യൂണിറ്റ് വൈസ് പ്രസിഡൻ്റായ 32-കാരി എറിൻ പിയാസെന്റി ആണ് അക്രമിയുടെ കുത്തേറ്റ് മരിച്ചത്. തിങ്കളാഴ്ച ഉച്ചയോടെ വെസ്റ്റ് 42 സ്ട്രീറ്റിനും സെവൻത് അവന്യുവിനും സമീപമായിരുന്നു നടുക്കുന്ന സംഭവം. ആക്രമണം നടത്തിയ ക്വീൻസ് സ്വദേശിയായ 49-കാരി പമേല സിസ്നെറോസിനെ സുരക്ഷാ ഉദ്യോഗസ്ഥർ സംഭവസ്ഥലത്തുതന്നെ വെടിവെച്ചു കൊലപ്പെടുത്തി.
ജോലി കഴിഞ്ഞ് റോഡിലൂടെ നടന്നുപോകുകയായിരുന്ന എറിന് നേരെ യാതൊരുവിധ പ്രകോപനവുമില്ലാതെയാണ് പമേല ആക്രമണം അഴിച്ചുവിട്ടതെന്ന് ന്യൂയോർക്ക് പൊലീസ് ഡിപ്പാർട്ട്മെൻ്റ് (NYPD) വ്യക്തമാക്കി. ഷോപ്പിങ് ബാഗിൽ ഒളിപ്പിച്ചുവെച്ചിരുന്ന രണ്ട് കത്തികൾ ഉപയോഗിച്ചായിരുന്നു ആക്രമണം. സംഭവത്തിൽ 68 വയസ്സുള്ള മറ്റൊരു വഴിയാത്രക്കാരനും കുത്തേറ്റിട്ടുണ്ട്. പരിക്കേറ്റ ഇയാളുടെ ആരോഗ്യനില തൃപ്തികരമാണെന്ന് അധികൃതർ അറിയിച്ചു. ആക്രമണത്തിന് ശേഷം സ്ഥലത്തുണ്ടായിരുന്ന സുരക്ഷാ ഉദ്യോഗസ്ഥർക്ക് നേരെ പാഞ്ഞടുക്കാൻ ശ്രമിച്ചപ്പോഴാണ് പമേലയെ പൊലീസ് വെടിവെച്ചു വീഴ്ത്തിയത്. ഇവർക്ക് ദീർഘകാലമായി മാനസികാരോഗ്യ പ്രശ്നങ്ങൾ ഉണ്ടായിരുന്നതായി പൊലീസ് കമ്മീഷണർ ജെസിക്ക ടിഷ് വ്യക്തമാക്കി.
പ്രസവാവധി പൂർത്തിയാക്കി അടുത്തിടെ മാത്രമാണ് എറിൻ പിയാസെന്റി ജോലിയിൽ തിരികെ പ്രവേശിച്ചത്. ദാരുണമായ സംഭവത്തിന് നാല് ദിവസം മുൻപ് മാത്രമാണ് എറിൻ ഭർത്താവിനും കൈക്കുഞ്ഞിനുമൊപ്പമുള്ള ചിത്രം പങ്കുവെച്ചിരുന്നത്. യുവതിയുടെ അപ്രതീക്ഷിത വിയോഗം വലിയ ഞെട്ടലാണ് കുടുംബത്തിലും സഹപ്രവർത്തകരിലും ഉണ്ടാക്കിയിരിക്കുന്നത്.
എറിൻ്റെ വേർപാടിൽ ബാങ്ക് ഓഫ് അമേരിക്ക ആദരാഞ്ജലികൾ അർപ്പിച്ചു. ഏറെ പ്രിയപ്പെട്ട ഒരു സഹപ്രവർത്തകയെയാണ് നഷ്ടമായതെന്നും കുടുംബത്തിൻ്റെയും പ്രിയപ്പെട്ടവരുടെയും ദുഃഖത്തിൽ പങ്കുചേരുന്നുവെന്നും ബാങ്കിൻ്റെ ഗ്ലോബൽ കോർപറേറ്റ് ആൻ്റ് ഇൻവെസ്റ്റ്മെൻ്റ് ബാങ്കിങ് വിഭാഗം പ്രസിഡൻ്റ് മാത്യു കോഡർ പ്രസ്താവനയിലൂടെ അറിയിച്ചു. തിരക്കേറിയ നഗരമധ്യത്തിൽ പട്ടാപ്പകലുണ്ടായ ഈ അക്രമസംഭവം നഗരത്തിലെ സുരക്ഷയെക്കുറിച്ചും മാനസികാരോഗ്യ പ്രശ്നങ്ങൾ നേരിടുന്നവരുടെ പുനരധിവാസത്തെക്കുറിച്ചും വലിയ ആശങ്കകൾ ഉയർത്തുന്നുണ്ട്.
Times Square Stabbing: Bank of America VP Killed
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
