റെജൈന: സസ്കാച്വാനിൽ വിദേശ തൊഴിലാളികളെ തൊഴിലുടമകൾ ചൂഷണം ചെയ്യുന്ന സംഭവങ്ങളിൽ ശക്തമായ നിയമനടപടികളുമായി പ്രവിശ്യാ സർക്കാർ രംഗത്തെത്തി. വിദേശ തൊഴിലാളികളിൽ നിന്ന് നിയമവിരുദ്ധമായി പണം ഈടാക്കുന്നതും ചൂഷണം ചെയ്യുന്നതും തടയാൻ പുതിയ നിയമപ്രകാരം ഭീമമായ പിഴയും കർശന നടപടികളുമാണ് നടപ്പിലാക്കുന്നത്. കുറ്റം ചുമത്തപ്പെടുന്ന വ്യക്തികൾക്ക് 7,50,000 ഡോളർ വരേയും കമ്പനികൾക്ക് 1.25 മില്യൺ ഡോളർ വരേയും പിഴ ചുമത്താൻ പുതിയ നിയമം വ്യവസ്ഥ ചെയ്യുന്നു.
കഴിഞ്ഞ ദിവസം മൂസ് ജോ നഗരത്തിലെ ‘ഗ്വാക് മെക്സി ഗ്രിൽ’ പ്രവർത്തിപ്പിച്ചിരുന്ന ഡയാൻ ജെനി എന്റർപ്രൈസസിന് പ്രൊവിൻഷ്യൽ കോടതി ശിക്ഷ വിധിച്ചിരുന്നു. വിദേശ ജീവനക്കാരനിൽ നിന്ന് ജോലി നിലനിർത്തുന്നതിനായി നിയമവിരുദ്ധമായി പണം ഈടാക്കിയ കേസിൽ കുറ്റസമ്മതം നടത്തിയ കമ്പനിയോട് 5,000 ഡോളർ പിഴയും 2,000 ഡോളർ വിക്ടിം സർചാർജും കൂടാതെ തൊഴിലാളിക്ക് 12,000 ഡോളർ നഷ്ടപരിഹാരമായും നൽകാൻ കോടതി ഉത്തരവിട്ടു. ഇതിനു പുറമേ, സ്വിഫ്റ്റ് കറന്റിലെ ഹസ്കി ട്രാവൽ സെന്ററുമായി ബന്ധപ്പെട്ട് തൊഴിലുടമയായ സയ്യിദ് താഹ റിസ്വിക്കും സ്ഥാപനത്തിനുമെതിരെ വിദേശ തൊഴിലാളിയുടെ വിശ്വാസവഞ്ചന നടത്തുകയും ജോലിക്ക് പണം ഈടാക്കുകയും ചെയ്തു എന്നാരോപിച്ച് എട്ടോളം കുറ്റങ്ങൾ ചുമത്തി കേസ് എടുത്തിട്ടുണ്ട്.
2013-ൽ നിലവിൽ വന്ന പഴയ നിയമത്തിന് പകരം 2024-ൽ പ്രാബല്യത്തിൽ വന്ന ‘ഇമിഗ്രേഷൻ സർവീസസ് ആക്ട്’ (ISA) ഇത്തരം ക്രമക്കേടുകൾക്കെതിരെ നടപടിയെടുക്കാൻ അധികൃതർക്ക് കൂടുതൽ അധികാരം നൽകുന്നുണ്ട്. പുതിയ നിയമപ്രകാരം മുൻപ് വ്യക്തികൾക്ക് പരമാവധി 50,000 ഡോളറും കമ്പനികൾക്ക് 1,00,000 ഡോളറുമായിരുന്ന പിഴത്തുക ലക്ഷക്കണക്കിന് ഡോളറായി ഉയർത്തി. മാത്രമല്ല, ഇത്തരം നിയമലംഘനങ്ങളെ കേവലം ഭരണപരമായ വീഴ്ചകളായല്ല, മറിച്ച് ക്രിമിനൽ കുറ്റങ്ങളായാണ് പുതിയ നിയമം കണക്കാക്കുന്നത്. 2022 മുതൽ ഇത്തരം വീഴ്ചകൾ വരുത്തിയ 79 സ്ഥാപനങ്ങളുടെ വിദേശ തൊഴിലാളികളെ നിയമിക്കാനുള്ള പെർമിറ്റുകൾ പ്രവിശ്യാ സർക്കാർ റദ്ദാക്കുകയോ സസ്പെൻഡ് ചെയ്യുകയോ ചെയ്തിട്ടുണ്ട്.
അടുത്തകാലത്തായി സസ്കാച്വനിലേക്ക് എത്തുന്ന കുടിയേറ്റക്കാരുടെ എണ്ണത്തിൽ വലിയ വർദ്ധനവുണ്ടായിട്ടുണ്ട്. വലിയ നഗരങ്ങളെ അപേക്ഷിച്ച് ചെറിയ ഗ്രാമീണ മേഖലകളിൽ ജോലി ചെയ്യുന്ന തൊഴിലാളികൾ ഒറ്റപ്പെട്ടുപോകുന്നതും, വർക്ക് പെർമിറ്റ് നഷ്ടപ്പെട്ട് നാടുകടത്തപ്പെടുമോ എന്ന ഭയവും പലപ്പോഴും ഇത്തരം അന്യായങ്ങൾ പുറത്തുപറയുന്നതിൽ നിന്ന് തൊഴിലാളികളെ പിന്തിരിപ്പിക്കുന്നുവെന്ന് വിദഗ്ദ്ധർ ചൂണ്ടിക്കാണിക്കുന്നു. എന്നാൽ പുതിയ നിയമം പ്രാബല്യത്തിൽ വന്നതോടെ തട്ടിപ്പുകളെക്കുറിച്ചുള്ള പരാതികൾ വലിയ തോതിൽ റിപ്പോർട്ട് ചെയ്യപ്പെടുന്നുണ്ടെന്നും, ചൂഷണം നടത്തുന്ന തൊഴിലുടമകൾക്ക് കടുത്ത മുന്നറിയിപ്പാണ് നിലവിലെ നടപടികളെന്നും പ്രവിശ്യാ അധികൃതർ വ്യക്തമാക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
