US-Canada Tariff കാനഡയുടെ പ്ലാൻ ബി: തിരിച്ചടി തീരുവ ചുമത്തുന്ന പുതിയ ഉൽപ്പന്നങ്ങളുടെ പട്ടിക പുറത്ത്

ഓട്ടവ: അമേരിക്കയുമായുള്ള വ്യാപാര തർക്കത്തിൽ തിരിച്ചടി തന്ത്രങ്ങൾ പരിഷ്കരിച്ച് കാനഡ. 50 ശതമാനം തിരിച്ചടി തീരുവ (Counter-tariffs) ചുമത്തുന്ന ഉൽപ്പന്നങ്ങളുടെ പുതുക്കിയ പട്ടിക കനേഡിയൻ ധനകാര്യ മന്ത്രാലയം പുറത്തുവിട്ടു. നേരത്തെ ലിസ്റ്റിലുണ്ടായിരുന്ന കടൽവിഭവങ്ങളെ (Seafood) പൂർണ്ണമായി ഒഴിവാക്കിയാണ് പുതിയ ഉൽപ്പന്നങ്ങളെ കാനഡ പട്ടികയിൽ ഉൾപ്പെടുത്തിയിരിക്കുന്നത്.

പുതുതായി 50% തീരുവ ചുമത്തിയ ഉൽപ്പന്നങ്ങൾ:

Wood charcoal

ചിത്രങ്ങളും ഫോട്ടോഗ്രാഫുകളും ഉൾപ്പെടെയുള്ള അച്ചടി സാമഗ്രികൾ (Printed matter and photographs)

പ്ലാസ്റ്റർ അധിഷ്ഠിത ഉൽപ്പന്നങ്ങൾ, ബോർഡുകൾ, ഷീറ്റുകൾ, ടൈലുകൾ

സാധനങ്ങൾ കൊണ്ടുപോകുന്നതിനും പാക്ക് ചെയ്യുന്നതിനുമുള്ള കുപ്പികൾ, ഫ്ലാസ്കുകൾ, ജാറുകൾ, പാത്രങ്ങൾ

ചെമ്പ് കമ്പി (Copper wire)

കടൽവിഭവങ്ങളെ ഒഴിവാക്കിയത് എന്തുകൊണ്ട്?

കാനഡയിൽ നിന്നുള്ള കടൽവിഭവങ്ങൾക്ക് അമേരിക്ക തീരുവ ചുമത്തിയിട്ടില്ലാത്തതിനാൽ, തർക്കം കൂടുതൽ വഷളാക്കാതിരിക്കാനാണ് ഈ തീരുമാനമെന്ന് ധനമന്ത്രി ഫ്രാൻസ്വാ-ഫിലിപ്പ് ഷാംപെയ്ന്റെ പ്രസ് സെക്രട്ടറി ജോൺ ഫ്രാഗോസ് വ്യക്തമാക്കി. യു.എസ് കാനഡയ്ക്ക് മേൽ ചുമത്തിയ തീരുവയ്ക്ക് കൃത്യമായി അതേ മൂല്യത്തിലും നിരക്കിലും തിരിച്ചടി നൽകുകയാണ് കാനഡയുടെ ലക്ഷ്യം.

യു.എസ് സംസ്ഥാനമായ മെയ്നിൽ നിന്നുള്ള ലോബ്സ്റ്ററുകളെ ആശ്രയിച്ചാണ് കാനഡയിലെ പ്രോസസിംഗ് വ്യവസായം പ്രവർത്തിക്കുന്നത്. തീരുവ ചുമത്തിയിരുന്നെങ്കിൽ കാനഡയിലെ അനവധി പ്രോസസിംഗ് പ്ലാന്റുകൾ പൂട്ടിപ്പോകുമായിരുന്നു. സർക്കാരിന്റെ ഈ പെട്ടെന്നുള്ള തീരുമാനത്തെ വലിയ ആശ്വാസത്തോടെയാണ് ലോബ്സ്റ്റർ പ്രോസസേഴ്സ് അസോസിയേഷൻ സ്വീകരിച്ചത്.

കഴിഞ്ഞ വെള്ളിയാഴ്ചയാണ് കാനഡയുമായുള്ള വ്യാപാര ചർച്ചകൾ പരാജയപ്പെട്ടതിനെ തുടർന്ന് കനേഡിയൻ ഉൽപ്പന്നങ്ങൾക്ക് യു.എസ് പ്രസിഡന്റ് ഡൊണാൾഡ് ട്രംപ് 50 ശതമാനം ഉയർന്ന തീരുവ പ്രഖ്യാപിച്ചത്. അമേരിക്ക-കാനഡ-മെക്സിക്കോ കരാറിന്റെ (CUSMA) പരിധിയിൽ വരുന്ന ഉൽപ്പന്നങ്ങൾ പോലും ട്രംപ് ഒഴിവാക്കിയിരുന്നില്ല.

ALSO READ ഒന്റാരിയോ ലേക്കിന്റെ പേര് ‘ലേക്ക് അമേരിക്ക’ എന്ന് മാറ്റാൻ ട്രംപിന്റെ ഉത്തരവ്; കാനഡയുമായുള്ള വ്യാപാര യുദ്ധം പുതിയ തലത്തിലേക്ക്

ഇതിന് മറുപടിയായി സെപ്റ്റംബർ 8 മുതൽ സ്മാർട്ട്ഫോണുകൾ, സൗന്ദര്യവർദ്ധക വസ്തുക്കൾ, അടുക്കള ഉപകരണങ്ങൾ തുടങ്ങി 700-ഓളം അമേരിക്കൻ ഉൽപ്പന്നങ്ങൾക്ക് കാനഡ തിരിച്ചടി തീരുവ ചുമത്തും. വ്യാപാര യുദ്ധം മൂലം ബാധിക്കപ്പെടുന്ന കനേഡിയൻ തൊഴിലാളികൾക്കും ബിസിനസുകൾക്കുമായി 7.5 ബില്യൺ ഡോളറിന്റെ സാമ്പത്തിക സഹായ പദ്ധതിയും കാനഡ പ്രഖ്യാപിച്ചിട്ടുണ്ട്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla