ഓട്ടവ : യു.എസും കാനഡയും തമ്മിലുള്ള വ്യാപാര തർക്കം പുതിയ തലങ്ങളിലേക്ക് കടക്കുന്നതിനിടെ, ഇരുരാജ്യങ്ങളുടെയും അതിർത്തി പങ്കിടുന്ന പ്രശസ്തമായ ‘ലേക് ഒന്റാറിയോ’യുടെ പേര് ‘ലേക് അമേരിക്ക’ എന്ന് മാറ്റാൻ ആലോചിക്കുന്നതായി അമേരിക്കൻ പ്രസിഡന്റ് ഡൊണാൾഡ് ട്രംപ്. വ്യാഴാഴ്ച രാവിലെയോടെ സ്വന്തം സോഷ്യൽ മീഡിയ പ്ലാറ്റ്ഫോമായ ട്രൂത്ത് സോഷ്യലിലൂടെയാണ് ട്രംപ് ഈ നിർദ്ദേശം മുന്നോട്ടുവെച്ചത്. കാനഡയിലെ ഒന്റാറിയോയുമായി ഇനി വലിയ രീതിയിലുള്ള വ്യാപാര ബന്ധങ്ങൾക്ക് യു.എസിന് താല്പര്യമില്ലെന്നും അതിനാലാണ് തടാകത്തിന്റെ പേര് മാറ്റുന്ന കാര്യം ഗൗരവമായി പരിഗണിക്കുന്നതെന്നുമാണ് ട്രംപിന്റെ പോസ്റ്റ്.
കാനഡയിൽ നിന്നുള്ള ഉൽപ്പന്നങ്ങൾക്ക് മേൽ കടുത്ത തീരുവ ചുമത്തുമെന്ന് ട്രംപ് മുന്നറിയിപ്പ് നൽകിയതിന് തൊട്ടുപിന്നാലെയാണ് പുതിയ പ്രകോപനം. വരും വർഷാരംഭത്തിൽ (ന്യൂ ഇയർ ദിനത്തിൽ) കാനഡയിൽ നിന്നുള്ള കാറുകൾ, ട്രക്കുകൾ, വാഹന ഭാഗങ്ങൾ, സ്റ്റീൽ എന്നിവയ്ക്ക് 50 ശതമാനം നികുതി ഏർപ്പെടുത്തുമെന്നാണ് ട്രംപ് കഴിഞ്ഞ ദിവസം വ്യക്തമാക്കിയത്. തർക്കം പരിഹരിക്കാൻ ലക്ഷ്യമിട്ട് നടന്നിരുന്ന വ്യാപാര ചർച്ചകൾ തടസ്സപ്പെട്ട പശ്ചാത്തലത്തിലാണ് അമേരിക്കയുടെ ഈ നീക്കം.
ട്രംപിന്റെ കടുത്ത നികുതി ഭീഷണിക്കെതിരെ ഒന്റാറിയോ പ്രീമിയർ ഡഗ് ഫോർഡ് രൂക്ഷമായ ഭാഷയിലാണ് പ്രതികരിച്ചത്. തിങ്കളാഴ്ച റേഡിയോ അഭിമുഖത്തിലും തുടർന്ന് ഹാമിൽട്ടണിൽ നടന്ന വാർത്താസമ്മേളനത്തിലും ഡഗ് ഫോർഡ് ട്രംപിനെതിരെ കടുത്ത വിമർശനങ്ങളാണ് ഉന്നയിച്ചത്. ട്രംപിന്റെ ഭീഷണികളെ വച്ചുപൊറുപ്പിക്കില്ലെന്നും തങ്ങൾക്ക് ട്രംപിനെ ഭയമില്ലെന്നും വ്യക്തമാക്കിയ ഫോർഡ്, തന്റെ കാൽവിരലിൽ ഉള്ളത്ര ധൈര്യവും ബുദ്ധിയും പോലും അമേരിക്കൻ പ്രസിഡന്റിനില്ലെന്നും തുറന്നടിച്ചു.
ഡഗ് ഫോർഡിന്റെ പരാമർശങ്ങൾ പുറത്തുവന്നതോടെ ഇരുനേതാക്കളും തമ്മിലുള്ള പോര് വ്യക്തിപരമായ അധിക്ഷേപങ്ങളിലേക്ക് കടന്നു. ഫോർഡിന്റെ അന്തരിച്ച സഹോദരനും പ്രശസ്ത രാഷ്ട്രീയ നേതാവുമായിരുന്ന റോബ് ഫോർഡിനെ ഓർമ്മിപ്പിച്ചുകൊണ്ട്, സഹോദരന്റെ അത്ര പ്രതിഭയോ ബുദ്ധിയോ സ്വാധീനമോ ഇല്ലാത്ത ആളാണ് ഡഗ് ഫോർഡ് എന്ന് ട്രംപ് തിരിച്ചടിച്ചു. ഇതിന് പിന്നാലെ ട്രംപ് ഒരു ‘തോറ്റ വ്യക്തി’യാണെന്നും ‘ഭീഷണിപ്പെടുത്തുന്ന സ്വഭാവക്കാരനാണെന്നും’ വിശേഷിപ്പിച്ച ഫോർഡ്, ബിസിനസ്സുകളിൽ തുടർച്ചയായി പാപ്പരത്തം നേരിട്ട ആളാണ് ട്രംപെന്നും പരിഹസിച്ചു.
ഇടക്കാല തിരഞ്ഞെടുപ്പ് അടുത്തിരിക്കെ അമേരിക്ക കാനഡയ്ക്ക് മേൽ കടുത്ത സാമ്പത്തിക-വ്യാപാര സമ്മർദ്ദമാണ് ചെലുത്തുന്നത്. അമേരിക്കൻ കലാകാരന്മാരുടെ തൊഴിലിനെ ബാധിക്കുന്ന തരത്തിൽ ആർട്ട് മേഖലയിലും 50 ശതമാനം നികുതി വരാൻ സാധ്യതയുണ്ടെന്ന് വിദഗ്ദ്ധർ ചൂണ്ടിക്കാട്ടുന്നു. തടാകത്തിന്റെ പേര് മാറ്റുമെന്ന ട്രംപിന്റെ പുതിയ പ്രഖ്യാപനം ഇരുരാജ്യങ്ങളും തമ്മിലുള്ള നയതന്ത്ര ബന്ധത്തെ കൂടുതൽ സങ്കീർണ്ണമാക്കുമെന്നാണ് വിലയിരുത്തപ്പെടുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
