ഒന്റാരിയോ; കാനഡയിലെ പ്രധാന ബാങ്കുകളും നിക്ഷേപകരും ബാങ്കിംഗ് ഇതര ‘പ്രൈവറ്റ് ക്രെഡിറ്റ്’ (സ്വകാര്യ വായ്പ) മേഖലയിൽ അര ട്രില്യൺ (500 ശതകോടി) ഡോളറിലധികം നിക്ഷേപിച്ചിട്ടുണ്ടെന്നും, സാമ്പത്തിക സുതാര്യതക്കുറവ് മൂലം ഇത് രാജ്യത്തിന്റെ സാമ്പത്തിക ഭദ്രതയ്ക്ക് ഭീഷണിയായേക്കാമെന്നും ബാങ്ക് ഓഫ് കാനഡ റിപ്പോർട്ടിലൂടെ വ്യക്തമാക്കുന്നു. ബാങ്കുകളിൽ നിന്ന് നേരിട്ടല്ലാതെ അസറ്റ് മാനേജ്മെന്റ് കമ്പനികൾ, പെൻഷൻ ഫണ്ടുകൾ എന്നിവ വഴി വൻകിട-ഇടത്തരം കമ്പനികൾ വായ്പയെടുക്കുന്ന ഈ രീതി അതിവേഗം വളരുകയാണ്.
2008-ലെ സാമ്പത്തിക മാന്ദ്യത്തിന് ശേഷം പരമ്പരാഗത ബാങ്കുകൾ വായ്പാ നിബന്ധനകൾ കർശനമാക്കിയതോടെയാണ് വേഗത്തിലും ഉദാരവ്യവസ്ഥകളിലും ലഭിക്കുന്ന ഈ സ്വകാര്യ വായ്പകളിലേക്ക് ബിസിനസുകൾ തിരിഞ്ഞത്. കാനഡയിലെ പ്രാദേശിക വായ്പകളിൽ ഇതിന്റെ പങ്ക് 15 ശതമാനത്തിൽ ഒതുങ്ങിനിൽക്കുന്നുണ്ടെങ്കിലും, കനേഡിയൻ നിക്ഷേപകർ അമേരിക്കൻ വിപണിയിലെ പ്രൈവറ്റ് ക്രെഡിറ്റ് ഫണ്ടുകളിൽ വൻതുക ഇറക്കിയിട്ടുണ്ട്.
ALSO READ ; 50% താരിഫിന് പിന്നാലെ നിർണായക നീക്കം; വ്യാപാരികളെ സഹായിക്കാൻ രണ്ട് പുതിയ പദ്ധതികൾ പ്രഖ്യാപിച്ച് ക്യുബെക്ക്
കൃത്യമായ റെഗുലേറ്ററി മാനദണ്ഡങ്ങളോ റിപ്പോർട്ടിംഗ് രീതികളോ ഇല്ലാത്ത അടച്ചിട്ട മുറികളിലെ വായ്പാ ഇടപാടുകൾ തിരിച്ചടിയായാൽ, അത് ബാങ്കുകളിലേക്കും വ്യാപിക്കാമെന്ന് സാമ്പത്തിക വിദഗ്ദ്ധർ ചൂണ്ടിക്കാണിക്കുന്നു. അമേരിക്കയിൽ ഫസ്റ്റ് ബ്രാൻഡ്സ് ഗ്രൂപ്പ് ഉൾപ്പെടെയുള്ള വൻകിട കമ്പനികളുടെ തകർച്ചയും കാനഡയിലെ ചില റിയൽ എസ്റ്റേറ്റ് ഫണ്ടുകൾ നിക്ഷേപകർ പണം പിൻവലിക്കുന്നത് താൽക്കാലികമായി തടഞ്ഞതും ഈ വിപണിയിലെ അപകടസാധ്യത വ്യക്തമാക്കുന്നുണ്ട്. ഒരു വലിയ സാമ്പത്തിക മാന്ദ്യത്തെ നേരിടാൻ ഈ പുതിയ വായ്പാ രീതിക്ക് ശേഷിയുണ്ടോ എന്ന് പരീക്ഷിക്കപ്പെട്ടിട്ടില്ലാത്തതിനാൽ നിലവിൽ ആശങ്കപ്പെടേണ്ടതില്ലെങ്കിലും കടുത്ത നിരീക്ഷണം ആവശ്യമാണെന്നാണ് കേന്ദ്ര ബാങ്കിന്റെ നിഗമനം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
