ന്യൂഫൗണ്ട്ലാന്റ്: ന്യൂഫൗണ്ട്ലാന്റ് ആൻഡ് ലാബ്രഡോറും ക്യുബെക്കും ചേർന്ന് 50 ബില്യൺ ഡോളറിലധികം മൂല്യമുള്ള ചരിത്രപരമായ ഊർജ്ജ കരാറിന്റെ പ്രാഥമിക രൂപരേഖ പുറത്തുവിട്ടു. വടക്കേ അമേരിക്കയിലെ തന്നെ ഏറ്റവും വലിയ ഹരിതോർജ്ജ പദ്ധതിയായി വിശേഷിപ്പിക്കപ്പെടുന്ന ഈ കരാർ പ്രകാരം ചർച്ചിൽ നദീതട പ്രദേശത്ത് നിന്ന് 14,000 മെഗാവാട്ട് പുതിയതും നിലവിലുള്ളതുമായ ജലവൈദ്യുതി ഉത്പാദിപ്പിക്കാൻ ലക്ഷ്യമിടുന്നു. ചർച്ചിൽ ഫോൾസ് തുറമുഖത്ത് നടന്ന പ്രഖ്യാപന ചടങ്ങിൽ പ്രധാനമന്ത്രി മാർക്ക് കാർണി പങ്കെടുത്തു. കാനഡയിലെ എല്ലാ വാഹനങ്ങൾക്കും ആവശ്യമായ വൈദ്യുതി നൽകാനും ടൊറന്റോ, മോൺട്രിയൽ, വാൻകൂവർ തുടങ്ങിയ പ്രധാന നഗരങ്ങളിലെ വീടുകൾക്ക് വേണ്ടത്ര ഊർജവിതരണം നടത്താനും ഈ പദ്ധതിക്കാകുമെന്ന് പ്രധാനമന്ത്രി വ്യക്തമാക്കി.
ഈ കരാറിലൂടെ ചർച്ചിൽ നദിയിലെ ഗുൾ ഐലൻഡിൽ പുതിയ 2,700 മെഗാവാട്ട് വൈദ്യുതി നിലയം സ്ഥാപിക്കുകയും നിലവിലുള്ള 5,428 മെഗാവാട്ട് ചർച്ചിൽ ഫോൾസ് പവർ പ്ലാന്റ് നവീകരിക്കുകയും ചെയ്യും. കൂടാതെ, മേഖലയിൽ 2,000 മെഗാവാട്ടിന്റെ പുതിയ കാറ്റാടി ഊർജ്ജ പദ്ധതിയും പുതിയ പ്രസരണ ലൈനുകളും ആരംഭിക്കാൻ നിർദ്ദേശമുണ്ട്. പദ്ധതി പൂർത്തിയാകുന്നതോടെ ന്യൂഫൗണ്ട്ലാന്റിന് 985 മെഗാവാട്ട് വരെയുള്ള വൈദ്യുതി ക്യുബെക് വഴി അമേരിക്കൻ വിപണിയിലേക്ക് നേരിട്ട് കയറ്റുമതി ചെയ്യാനുള്ള അനുമതിയും ലഭിക്കും. 50 വർഷത്തെ ഈ കരാറിലൂടെ ന്യൂഫൗണ്ട്ലാന്റ് ആൻഡ് ലാബ്രഡോറിന് ഏകദേശം 49 ബില്യൺ ഡോളർ വരുമാനം ലഭിക്കുമെന്നാണ് പ്രതീക്ഷിക്കുന്നത്. പദ്ധതിക്കായി ഫെഡറൽ ഗവൺമെന്റ് 10 ബില്യൺ ഡോളറിന്റെ സാമ്പത്തിക സഹായവും പ്രഖ്യാപിച്ചിട്ടുണ്ട്.
പതിറ്റാണ്ടുകളായി ഇരു പ്രവിശ്യകൾക്കുമിടയിലുള്ള തർക്കങ്ങൾക്ക് പരിഹാരം കാണുന്നതാണ് ഈ പുതിയ ധാരണ. 1969-ൽ ഒപ്പിട്ട കരാർ പ്രകാരം ഹൈഡ്രോ-ക്യുബെക് കിലോവാട്ട് അവറിന് വെറും 0.2 സെന്റ് നിരക്കിലാണ് വൈദ്യുതി വാങ്ങിയിരുന്നത്. എന്നാൽ പുതിയ ധാരണയനുസരിച്ച് 2027 മുതൽ നിരക്ക് കിലോവാട്ട് അവറിന് 1.8 സെന്റായി ഉയരുകയും അടുത്ത 50 വർഷത്തിനുള്ളിൽ ശരാശരി 7.4 സെന്റായി വർദ്ധിക്കുകയും ചെയ്യും. അന്യായമായ പഴയ കരാർ അവസാനിപ്പിച്ച് സ്വന്തം വിഭവങ്ങളുടെ പ്രാഥമിക അവകാശം ജനങ്ങൾക്ക് ഉറപ്പാക്കാൻ കഴിഞ്ഞതായി ന്യൂഫൗണ്ട്ലാന്റ് പ്രീമിയർ ടോണി വേക്കാം പ്രസ്താവിച്ചു. പൊതുജന വോട്ടെടുപ്പ് ഇല്ലാതെ തന്നെ ധാരണയുമായി മുന്നോട്ട് പോകാൻ ഭരണകൂടം തീരുമാനിക്കുകയായിരുന്നു.
അതേസമയം, വരാനിരിക്കുന്ന ക്യുബെക് തിരഞ്ഞെടുപ്പും രാഷ്ട്രീയ മാറ്റങ്ങളും കരാറിനെ എങ്ങനെ ബാധിക്കുമെന്ന കാര്യത്തിൽ ചർച്ചകൾ സജീവമാണ്. ഒക്ടോബർ 5-ന് മുമ്പ് തിരഞ്ഞെടുപ്പ് നടത്താനിരിക്കെ, നിലവിലെ ക്യുബെക് പ്രീമിയർ ക്രിസ്റ്റിൻ ഫ്രെഷെറ്റിന്റെ സഖ്യകക്ഷി തിരിച്ചടി നേരിടാൻ സാധ്യതയുണ്ടെന്നാണ് സർവേകൾ സൂചിപ്പിക്കുന്നത്. പ്രതിപക്ഷ പാർട്ടിയായ പാർട്ടി ക്യുബെക്കോയിസ് കരാർ റദ്ദാക്കാൻ ശ്രമിക്കുകയാണെന്ന് ഫ്രെഷെറ്റ് ആരോപിച്ചെങ്കിലും, കരാർ വിശദമായി പഠിച്ച ശേഷം പ്രവിശ്യയ്ക്ക് അനുകൂലമാണെങ്കിൽ നിലനിർത്തുമെന്ന് പാർട്ടി നേതാവ് പോൾ സെന്റ്-പിയറി പ്ലാമോണ്ടൺ വ്യക്തമാക്കി. വർഷാവസാനത്തോടെ കരാറിന്റെ അന്തിമരൂപം തയ്യാറാക്കാനാണ് ഇരു വിഭാഗങ്ങളുടെയും തീരുമാനം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
