പനാമ സിറ്റി: ഇറാന് മേലുള്ള നാവിക ഉപരോധം എത്രകാലം വേണമെങ്കിലും തുടരാൻ തയ്യാറാണെന്ന മുന്നറിയിപ്പുമായി അമേരിക്ക. സമാധാന ചർച്ചകൾ വഴിമുട്ടുകയും മേഖലയിൽ സംഘർഷം കടുക്കുകയും ചെയ്ത പശ്ചാത്തലത്തിൽ ഇറാന് മേൽ കൂടുതൽ സാമ്പത്തിക ഉപരോധങ്ങൾ ഏർപ്പെടുത്തുമെന്നും യുഎസ് വ്യക്തമാക്കി. കപ്പലുകൾ മാറിമാറി വിന്യസിച്ച് ഉപരോധം ശക്തമായി നിലനിർത്താൻ യുഎസ് നാവികസേനയ്ക്ക് സാധിക്കുമെന്ന് പ്രതിരോധ സെക്രട്ടറി പീറ്റ് ഹെഗ്സെത് വാർത്താ സമ്മേളനത്തിൽ അറിയിച്ചു.
മറ്റൊരു രാജ്യത്തിനെതിരെയും ഇന്നുവരെ പ്രയോഗിക്കാത്ത തരത്തിലുള്ള കടുത്ത സാമ്പത്തിക നടപടികളാകും അടുത്ത ആഴ്ച പ്രഖ്യാപിക്കുകയെന്ന് ട്രഷറി സെക്രട്ടറി സ്കോട്ട് ബെസന്റ് വെളിപ്പെടുത്തി. ഇറാനെ ലോക വ്യാപാര ശൃംഖലയിൽ നിന്ന് പൂർണ്ണമായും ഒറ്റപ്പെടുത്തുകയാണ് ലക്ഷ്യം. അതിനിടെ, തങ്ങളുടെ വ്യവസ്ഥകൾ അംഗീകരിക്കും വരെ സ്ട്രെയിറ്റ് ഓഫ് ഹോർമുസ് വഴി കപ്പലുകൾ കടന്നുപോകാൻ അനുവദിക്കില്ലെന്ന നിലപാടിലാണ് ഇറാൻ. സാമ്പത്തിക ഉപരോധം പിൻവലിക്കുക, മരവിപ്പിച്ച ഇറാനിയൻ സ്വത്തുക്കൾ വിട്ടുനൽകുക തുടങ്ങിയ ആവശ്യങ്ങളാണ് ടെഹ്റാൻ മുന്നോട്ടുവെക്കുന്നത്.
വ്യാഴാഴ്ച വൈകുന്നേരം ഹോർമുസ് കടലിടുക്കിലൂടെ സഞ്ചരിക്കുകയായിരുന്ന അബുദാബി നാഷണൽ ഓയിൽ കമ്പനിയുടെ രണ്ട് കപ്പലുകൾക്ക് നേരെ ആക്രമണമുണ്ടായി. സംഭവത്തിന് പിന്നിൽ ഇറാനാണെന്ന് യുഎഇ ആരോപിച്ചു. ഫെബ്രുവരിയിൽ യുദ്ധം ആരംഭിക്കുന്നതിന് മുൻപ് ലോകത്തിലെ അഞ്ചിലൊന്ന് ക്രൂഡോയിലും ദ്രവീകൃത പ്രകൃതിവാതകവും കടന്നുപോയിരുന്ന ഈ തന്ത്രപ്രധാന ജലപാതയിലൂടെയുള്ള കപ്പൽ ഗതാഗതം ഇപ്പോൾ വൻതോതിൽ ഇടിഞ്ഞിരിക്കുകയാണ്. മുൻപ് പ്രതിദിനം 130 മുതൽ 140 വരെ കപ്പലുകൾ സഞ്ചരിച്ചിരുന്ന സ്ഥാനത്ത് കഴിഞ്ഞ ചൊവ്വാഴ്ച വെറും 8 കപ്പലുകൾ മാത്രമാണ് കടന്നുപോയത്.
അതേസമയം, യുദ്ധം അവസാനിപ്പിക്കാൻ അമേരിക്കൻ പ്രസിഡന്റ് ഡൊണാൾഡ് ട്രംപിന് മേൽ സ്വന്തം രാജ്യത്ത് നിന്ന് തന്നെ കടുത്ത രാഷ്ട്രീയ സമ്മർദ്ദമുണ്ട്. ഇന്ധനവില കുതിച്ചുയരുന്നത് ജനങ്ങൾക്കിടയിൽ പ്രതിഷേധത്തിന് കാരണമായിട്ടുണ്ട്. വരാനിരിക്കുന്ന നവംബറിലെ മിഡ്ടേം തിരഞ്ഞെടുപ്പിൽ കോൺഗ്രസിലെ നിയന്ത്രണം നഷ്ടപ്പെടുമോ എന്ന ആശങ്കയും ട്രംപിനുണ്ട്. മേഖലയിലെ കപ്പൽ ഗതാഗതം പൂർണ്ണമായും പുനഃസ്ഥാപിക്കാൻ ഇറാനും ഒമാനും തമ്മിൽ ധാരണയാകുന്നതോടെ ഉപരോധം നീക്കാമെന്നാണ് യുഎസ് നേരത്തെ അറിയിച്ചിരുന്നത്.
യുദ്ധം തുടരുന്നത് ആഗോള സമ്പദ്വ്യവസ്ഥയെ ഗുരുതര പ്രതിസന്ധിയിലേക്കാണ് തള്ളിയിടുന്നത്. ഈ വർഷം ആഗോള ക്രൂഡോയിൽ ഉൽപ്പാദനത്തിൽ പ്രതിദിനം 43 ലക്ഷം ബാരലിന്റെ കുറവുണ്ടാകുമെന്ന് ഇന്റർനാഷണൽ എനർജി ഏജൻസി മുന്നറിയിപ്പ് നൽകി. യുദ്ധം ഉടൻ അവസാനിച്ചില്ലെങ്കിൽ പ്രമുഖ സമ്പദ്വ്യവസ്ഥകൾ കടുത്ത മാന്ദ്യത്തിലേക്ക് കൂപ്പുകുത്തുമെന്നും സാമ്പത്തിക വിദഗ്ധർ ചൂണ്ടിക്കാണിക്കുന്നു. അതേസമയം, ഇറാൻ ഒരു കാരണവശാലും ആണവായുധം നിർമ്മിക്കില്ലെന്ന് ഉറപ്പാക്കാനുള്ള നടപടികളാണ് യുഎസ് സ്വീകരിക്കുന്നതെന്ന് പ്രതിരോധ സെക്രട്ടറി വ്യക്തമാക്കി.
US to Tighten Iran Blockade With Tougher Economic Measures
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
