ഹാലിഫാക്സ്: സ്വന്തമായി വീടില്ലാതെ ടെന്റുകളിൽ താമസിക്കുന്നവർക്കും ഉയർന്ന നിരക്കിലുള്ള സാമ്പത്തിക സഹായം നൽകാൻ ബാധ്യതയുണ്ടെന്ന് കാനഡയിലെ നോവ സ്കോഷ്യ അപ്പീൽ കോടതി വിധിച്ചു. കൂടാരങ്ങളെയും താമസസ്ഥലമായി പരിഗണിക്കണമെന്നും ഇതിന്റെ പേരിൽ അർഹമായ ആനുകൂല്യം നിഷേധിക്കാൻ പ്രൊവിൻഷ്യൽ സർക്കാരിന് അവകാശമില്ലെന്നും കോടതി വ്യക്തമാക്കി. താഴ്ന്ന വരുമാനക്കാർക്കുള്ള സാമ്പത്തിക സഹായ അപ്പീൽ ബോർഡിന്റെയും സുപ്രീം കോടതിയുടെയും മുൻ തീരുമാനങ്ങൾ തള്ളിക്കൊണ്ടാണ് മൂന്നംഗ അപ്പീൽ കോടതി ബെഞ്ചിന്റെ സുപ്രധാന വിധി.
2023-ൽ പ്രതിമാസം 380 ഡോളർ അസിസ്റ്റൻസ് ലഭിച്ചിരുന്ന ബ്രാഡ്ലി ലോ എന്ന ഭിന്നശേഷിക്കാരനായ വ്യക്തി, വർധിപ്പിച്ച നിരക്കായ 974 ഡോളറിനായി അപേക്ഷ നൽകിയതോടെയാണ് നിയമപോരാട്ടങ്ങൾക്ക് തുടക്കമായത്. എന്നാൽ ടെന്റിൽ താമസിക്കുന്നു എന്ന കാരണം പറഞ്ഞ് അധികൃതർ അപേക്ഷ തള്ളി. തുടർന്ന് കേസ് നടത്തുന്നതിനിടെ 2023 ഡിസംബറിൽ ബ്രാഡ്ലി അന്തരിച്ചെങ്കിലും, അദ്ദേഹത്തിന്റെ കുടുംബവും അഭിഭാഷകനായ വിൻസ് കാൾഡർഹെഡും കേസുമായി മുന്നോട്ടുപോവുകയായിരുന്നു. തന്റെ പോരാട്ടം തനിക്കു വേണ്ടിയല്ല, തെരുവിൽ കഴിയുന്ന ആയിരക്കണക്കിന് മനുഷ്യർക്കു വേണ്ടിയാണെന്ന ബ്രാഡ്ലിയുടെ വാക്കുകൾ ഒടുവിൽ നീതിപൂർവം അംഗീകരിക്കപ്പെടുകയായിരുന്നുവെന്ന് അഭിഭാഷകൻ പ്രതികരിച്ചു.
സമൂഹത്തിൽ പാർശ്വവത്കരിക്കപ്പെട്ടവരുടെ മനുഷ്യാവകാശങ്ങൾ ഉയർത്തിപ്പിടിക്കുന്ന ചരിത്രവിജയമാണ് ഈ വിധിയെന്ന് കേസിൽ കക്ഷിചേർന്ന എലിസബത്ത് ഫ്രൈ സൊസൈറ്റി എക്സിക്യൂട്ടീവ് ഡയറക്ടർ എമ്മ ഹാൾപെൺ പറഞ്ഞു. തെരുവിൽ താമസിക്കുന്ന സ്ത്രീകൾ നേരിടുന്ന കടുത്ത സുരക്ഷാ ഭീഷണികളും ശാരീരിക അതിക്രമങ്ങളും ചൂണ്ടിക്കാണിച്ച അവർ, അഭയകേന്ദ്രങ്ങളിൽ ഇടമില്ലാതെ വരുമ്പോഴാണ് പലരും ഇത്തരം താൽക്കാലിക തമ്പുകളിലേക്ക് മാറാൻ നിർബന്ധിതരാകുന്നതെന്നും വ്യക്തമാക്കി. രാജ്യത്തെ മറ്റു പ്രവിശ്യകളിലെ സമാന കേസുകളിലും ഈ വിധി നിർണായകമായ സ്വാധീനം ചെലുത്തുമെന്നാണ് വിലയിരുത്തപ്പെടുന്നത്.
Tents are also residential; Nova Scotia court says poor cannot be denied higher benefits
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
