ഒന്റാരിയോ; കാനഡയിലെ കൺസർവേറ്റീവ് എംപിയായ ലാറി ബ്രോക്ക് അടുത്ത മാസം പാർലമെന്റ് അംഗത്വം രാജിവെക്കുമെന്ന് പ്രഖ്യാപിച്ചു. വ്യാഴാഴ്ച രാത്രി എക്സ് (മുൻ ട്വിറ്റർ) പ്ലാറ്റ്ഫോമിലൂടെയാണ് അദ്ദേഹം തീരുമാനം അറിയിച്ചത്. സെപ്റ്റംബർ 18-ന് ഔദ്യോഗികമായി എംപി സ്ഥാനം ഒഴിയുന്ന ബ്രോക്ക്, തുടർന്ന് ബ്രാന്റ്ഫോർഡിലെ ക്രൗൺ അറ്റോർണി ഓഫീസിലെ തന്റെ മുൻ ജോലിയിലേക്ക് മടങ്ങുമെന്ന് അറിയിച്ചു. ബ്രാന്റ്ഫോർഡ്–ബ്രാന്റ് സൗത്ത് മണ്ഡലത്തെ വർഷങ്ങളോളം പ്രതിനിധീകരിക്കാനായിരുന്നു തന്റെ ആഗ്രഹമെങ്കിലും, സൂക്ഷ്മമായ ആലോചനകൾക്കൊടുവിലാണ് രാജിവെക്കാൻ തീരുമാനിച്ചതെന്ന് ബ്രോക്ക് വ്യക്തമാക്കി.
നിയമവും ക്രമസമാധാനവുമായി ബന്ധപ്പെട്ട വിഷയങ്ങളിൽ കൺസർവേറ്റീവ് പാർട്ടിയുടെ ശക്തമായ ശബ്ദങ്ങളിലൊരാളായിരുന്ന അദ്ദേഹം, കുറ്റകൃത്യങ്ങൾക്കെതിരായ കടുത്ത നിലപാടിലൂടെ ശ്രദ്ധ നേടിയിരുന്നു. ബ്രോക്കിന്റെ രാജിയോടെ ഒന്റാറിയോയിലെ ബ്രാന്റ്ഫോർഡ്–ബ്രാന്റ് സൗത്ത് മണ്ഡലത്തിൽ ഉപതിരഞ്ഞെടുപ്പ് നടത്തേണ്ട സാഹചര്യം രൂപപ്പെടും. 2025ലെ ഫെഡറൽ തിരഞ്ഞെടുപ്പിന് ശേഷം കൺസർവേറ്റീവ് പാർലമെന്ററി സംഘത്തിൽ നിന്ന് പിന്മാറുന്ന ഏഴാമത്തെ എംപിയായും ബ്രോക്ക് മാറും. ഇതിനുമുമ്പ് ക്രിസ് ഡി’എൻട്രമോണ്ട്, മൈക്കൽ മാ, മാറ്റ് ജെനെറൂ, മാരിലിൻ ഗ്ലാഡു എന്നിവർ ലിബറൽ പാർട്ടിയിലേക്ക് ചേക്കേറിയിരുന്നു.
കാത്തി വാഗന്റാൾ ഓഗസ്റ്റ് അവസാനം രാജിവെക്കുമെന്ന് അറിയിച്ചപ്പോൾ, റിച്ചാർഡ് മാർട്ടലിനെ ജൂലൈയിൽ പ്രധാനമന്ത്രി മാർക്ക് കാർണി സെനറ്റിലേക്ക് നിയമിച്ചിരുന്നു.
2021ലെ ഫെഡറൽ തിരഞ്ഞെടുപ്പിൽ ലിബറൽ സ്ഥാനാർഥി ജോയ് ഒ’ഡോണലിനെ പരാജയപ്പെടുത്തി ആദ്യമായി എംപിയായ ബ്രോക്ക്, 2025ലെ തിരഞ്ഞെടുപ്പിൽ കൂടുതൽ വോട്ടുശതമാനത്തോടെ വീണ്ടും വിജയിച്ചിരുന്നു. ബ്രോക്കിന്റെ സേവനത്തെ പ്രശംസിച്ച കൺസർവേറ്റീവ് നേതാവ് പിയർ പൊയ്ലീവ്രെ, കുറ്റവാളികൾക്കെതിരായ കർശന നടപടികൾക്കും കുറ്റബാധിതർക്കുവേണ്ടിയുള്ള നിലപാടിനും അദ്ദേഹം നൽകിയ സംഭാവനകൾക്ക് നന്ദി രേഖപ്പെടുത്തി.
conservative-mp-announces-he-will-resign-next-month
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
