ഒട്ടാവ: കാനഡയിലെ പ്രമുഖ കമ്പനികളിൽ ജീവനക്കാരുടെ സ്ക്രീൻ പ്രവർത്തനങ്ങൾ നിരീക്ഷിക്കുന്ന സോഫ്റ്റ്വെയറുകളുടെ ഉപയോഗം വ്യാപകമാകുന്നത് കടുത്ത മാനസിക സമ്മർദത്തിന് കാരണമാകുന്നതായി പരാതി. തൊഴിലിടങ്ങളിലെ സ്വകാര്യത, ആത്മവിശ്വാസം, തൊഴിലാളി അവകാശങ്ങൾ എന്നിവയെ ബാധിക്കുന്ന തരത്തിൽ ഡിജിറ്റൽ നിരീക്ഷണം വർധിച്ചതോടെ, കനേഡിയൻ കമ്പനികളിലെ ജീവനക്കാരുടെ മാനസികാരോഗ്യം മുൻനിർത്തിയുള്ള ചർച്ചകളും രാജ്യത്ത് സജീവമായിട്ടുണ്ട്.
ബാങ്കിങ് സ്ഥാപനമായ ‘ടിഡി ബാങ്ക്’ (TD Bank), ടെലികോം ഭീമന്മാരായ ‘ബെൽ’ (Bell) തുടങ്ങിയ മുൻനിര സ്ഥാപനങ്ങൾ ജീവനക്കാരുടെ ഉൽപാദനക്ഷമത അളക്കാൻ അത്യാധുനിക സോഫ്റ്റ്വെയറുകൾ ഉപയോഗിക്കാൻ തുടങ്ങിയതാണ് പുതിയ വിവാദങ്ങൾക്ക് വഴിതെളിച്ചത്. ആപ്പുകളിൽ ചെലവഴിക്കുന്ന സമയം, മൗസിന്റെ ചലനങ്ങൾ എന്നിവ നിരീക്ഷിക്കുന്ന രീതി ജീവനക്കാരിൽ ഭയവും അസ്വസ്ഥതയും സൃഷ്ടിക്കുന്നതായി പരാതി ഉയർന്നിട്ടുണ്ട്. എന്നാൽ സേവനങ്ങളുടെ കാര്യക്ഷമത വർധിപ്പിക്കാനും തൊഴിൽ രീതികൾ മനസ്സിലാക്കാനുമാണ് ഈ ഉപകരണങ്ങൾ ഉപയോഗിക്കുന്നതെന്നാണ് കമ്പനി അധികൃതരുടെ വിശദീകരണം.
അമിതമായ ഡിജിറ്റൽ നിരീക്ഷണ സംവിധാനങ്ങൾ ജീവനക്കാരുടെ ജോലി മെച്ചപ്പെടുത്തുന്നില്ലെന്ന് മാത്രമല്ല, തൊഴിൽപരമായ സമ്മർദം ഇരട്ടിയാക്കുന്നുവെന്ന് സർവകലാശാലാ പഠനങ്ങളും സൂചിപ്പിക്കുന്നു. നിരന്തരമായ നിരീക്ഷണം തൊഴിലുടമയും ജീവനക്കാരും തമ്മിലുള്ള വിശ്വാസബന്ധം തകർക്കുമെന്നും റിപ്പോർട്ടുകൾ ചൂണ്ടിക്കാട്ടുന്നു. കാനഡയിലെ പ്രധാന തൊഴിലാളി യൂണിയനുകളിലൊന്നായ ‘യൂണിഫോർ’ (Unifor) ഈ വിഷയത്തിൽ ശക്തമായ ആശങ്ക രേഖപ്പെടുത്തിയിട്ടുണ്ട്.
കോവിഡ് കാലത്തിനു ശേഷം വീട്ടിലിരുന്ന് ജോലി ചെയ്യുന്നത് (Remote Work) കൂടിയതും, എഐ (AI) സിസ്റ്റങ്ങളെ കൂടുതൽ കാര്യങ്ങൾ പഠിപ്പിക്കാൻ ജീവനക്കാരുടെ ജോലിരീതികൾ കമ്പനികൾക്ക് ആവശ്യമായി വന്നതുമാണ് സ്ക്രീൻ നിരീക്ഷണം ഇത്രയും കൂടാൻ പ്രധാന കാരണം. ജോലിക്കിടയിൽ ഒന്നു വിശ്രമിക്കാൻ പോലും കഴിയാത്ത വിധം നിയമങ്ങൾ കടുപ്പമാക്കുന്നത് തങ്ങളുടെ പ്രകടന വിലയിരുത്തലിനെയും ബോണസിനെയും ദോഷകരമായി ബാധിക്കുമോ എന്ന ഭയത്തിലാണ് ഇപ്പോൾ കാനഡയിലെ ജീവനക്കാർ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
'Digital eye' monitors employees; complaints of rising stress in Canadian workplaces.
