ഒട്ടാവ: നാറ്റോ ആസ്ഥാനത്ത് ചാരപ്രവർത്തനം നടത്തിയെന്ന ആരോപണത്തിൽ അറസ്റ്റിലായ ബിവെയ് സാങിനെതിരെയുള്ള അന്വേഷണം പുരോഗമിക്കവെ, കേസിൽ കൂടുതൽ നിർണ്ണായക വിവരങ്ങൾ പുറത്ത്. ബെൽജിയത്തിലെ നാറ്റോ ഓഫീസിൽ ചേരുന്നതിന് മുൻപ് ഇവർ വർഷങ്ങളോളം കനേഡിയൻ സർക്കാരിന്റെ വിവിധ വകുപ്പുകളിൽ ജോലി ചെയ്തിരുന്നതായി സുരക്ഷാ ഏജൻസികൾ കണ്ടെത്തി. സാധാരണ വ്യക്തിഗത വിവരങ്ങൾ പരിശോധിച്ച ശേഷമാണ് ഇത്തരം സ്ഥാനങ്ങളിലേക്ക് ആളുകളെ നിയമിക്കാറുള്ളത്. എന്നാൽ ഇത്രയും സുരക്ഷാ പരിശോധനകൾ നടന്നിട്ടും ഇവർ എങ്ങനെ പ്രധാന തസ്തികയിൽ എത്തിപ്പെട്ടു എന്നതിൽ കാനഡയിലെ സുരക്ഷാ ഏജൻസിയായ CSIS പരിശോധന തുടങ്ങിയിട്ടുണ്ട്.
കനേഡിയൻ പൗരത്വമുള്ള ഇവർ ‘ക്ലെയർ’, ‘കറ്റീന’ എന്നീ വ്യാജ പേരുകളിലും അറിയപ്പെട്ടിരുന്നു. 2020-ൽ കാനഡ ബോർഡർ സർവീസിലെ ജോലിക്ക് അപേക്ഷിച്ചപ്പോൾ ഇവർ തട്ടിപ്പ് നടത്തിയതായി കണ്ടെത്തിയിരുന്നു. എന്നിട്ടും ഇവർക്ക് എങ്ങനെ പിന്നീട് ഉയർന്ന സുരക്ഷാ അനുമതി ലഭിച്ചു എന്നത് ഏജൻസികളെ ആശയക്കുഴപ്പത്തിലാക്കുന്നുണ്ട്. ഒട്ടാവ സർവകലാശാലയിൽ പഠിക്കുമ്പോൾ ആർട്ടിഫിഷ്യൽ ഇന്റലിജൻസ് (AI), ഡ്രോൺ, റോബോട്ടിക്സ് തുടങ്ങിയ സാങ്കേതികവിദ്യകളിലായിരുന്നു ഇവർ ഗവേഷണം നടത്തിയിരുന്നത്. ഇത്തരം വിവരങ്ങൾ വിദേശ രാജ്യങ്ങൾക്ക് ഏറെ ആവശ്യമുള്ള ഒന്നായതിനാൽ, ഈ കാലയളവിൽ ഇവർ ആരുമായൊക്കെ ബന്ധപ്പെട്ടിരുന്നു എന്നും അന്വേഷിക്കുന്നുണ്ട്.
സാങ് ചാരപ്രവർത്തനം നടത്തിയത് ചൈനയ്ക്ക് വേണ്ടിയാണെന്ന സംശയം ബലപ്പെടുന്നുണ്ടെങ്കിലും, ബെൽജിയം അധികൃതർ ഇത് ഔദ്യോഗികമായി സ്ഥിരീകരിച്ചിട്ടില്ല. ചൈനീസ് വംശജയായ ഇവരുടെ മാതൃഭാഷ മാൻഡറിനാണ്. വിദേശ രാജ്യങ്ങൾക്കായി ചാരപ്രവർത്തനം നടത്താൻ വിദ്യാർത്ഥികളെയും ഗവേഷകരെയും ഉപയോഗിക്കുന്നത് മുൻപും നടന്നിട്ടുണ്ടെന്ന് സുരക്ഷാ വിദഗ്ധർ ചൂണ്ടിക്കാട്ടുന്നു. നിലവിൽ കസ്റ്റഡിയിൽ കഴിയുന്ന സാങിന്റെ പശ്ചാത്തലം വ്യക്തമാക്കാൻ കാനഡയും ബെൽജിയവും ചേർന്നുള്ള അന്വേഷണം തുടരുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
NATO Espionage Case: How Did Wei Sun Breach the Security Perimeter? Canada Seeks Answers on Secrets
