സെന്റ് ജോൺസ്: പ്രവിശ്യയിലെ ഭൂരിഭാഗം പ്രദേശങ്ങളിലും വരും മണിക്കൂറുകളിൽ മൂടൽമഞ്ഞും ഇരുണ്ട അന്തരീക്ഷവും തുടരുമെന്ന് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. സെന്റ് ജോൺസ്, ബോണാവിസ്റ്റ, സൗത്ത് കോസ്റ്റ്, വെസ്റ്റ് കോസ്റ്റ് തുടങ്ങിയ പ്രധാന മേഖലകളിലെല്ലാം ഇന്ന് രാവിലെ മുതൽ കനത്ത മൂടൽമഞ്ഞാണ് അനുഭവപ്പെടുന്നത്. രാവിലെയോടെ മൂടൽമഞ്ഞിന് നേരിയ ശമനമുണ്ടാകുമെങ്കിലും വൈകുന്നേരത്തോടെ വീണ്ടും അന്തരീക്ഷം മൂടപ്പെടാൻ സാധ്യതയുണ്ട്. ജനങ്ങൾ യാത്രകളിലും ദൈനംദിന പ്രവർത്തനങ്ങളിലും ആവശ്യമായ മുൻകരുതലുകൾ എടുക്കണമെന്നും കാലാവസ്ഥാ നിരീക്ഷണ കേന്ദ്രം നിർദ്ദേശിച്ചു.
സൗത്ത് കോസ്റ്റ്, വെസ്റ്റ് കോസ്റ്റ്, ഹാപ്പി വാലി അടക്കമുള്ള പ്രദേശങ്ങളിൽ ഇന്ന് രാത്രിയോടെ മഴ ശക്തമാകുമെന്നാണ് പ്രവചനം. സൗത്ത് കോസ്റ്റിൽ ചൊവ്വാഴ്ച 20 മുതൽ 30 മില്ലിമീറ്റർ വരെ കനത്ത മഴ പെയ്യാൻ സാധ്യതയുണ്ട്. ഇതിനൊപ്പം മണിക്കൂറിൽ 40 മുതൽ 60 കിലോമീറ്റർ വരെ വേഗതയിൽ ശക്തമായ കാറ്റ് വീശാനും സാധ്യതയുണ്ട്. വെസ്റ്റ് കോസ്റ്റ് തീരപ്രദേശങ്ങളിൽ ചൊവ്വാഴ്ച ഉച്ചയ്ക്ക് ശേഷം കാറ്റിന്റെ വേഗത മണിക്കൂറിൽ 80 കിലോമീറ്റർ വരെ ഉയർന്നേക്കാം. ഈ മേഖലകളിൽ മഴയുടെ അളവ് 10 മില്ലിമീറ്റർ വരെ ആകുമെന്നാണ് കണക്കാക്കുന്നത്.
നോർത്തേൺ പെനിൻസുലയിലും സെൻട്രൽ മേഖലയിലും വരും ദിവസങ്ങളിൽ ഇരുണ്ട കാലാവസ്ഥയായിരിക്കും. ഈ ഭാഗങ്ങളിൽ ഉച്ചയ്ക്ക് ശേഷം ചാറ്റൽ മഴയ്ക്കും മണിക്കൂറിൽ 50 കിലോമീറ്റർ വരെ വേഗതയിലുള്ള കാറ്റിനും സാധ്യതയുണ്ട്. വിവിധ ഇടങ്ങളിൽ താപനില 17°C മുതൽ 27°C വരെയും ഹ്യുമിഡെക്സ് 32 വരെയുമായി മാറും. UV സൂചിക ചില പ്രദേശങ്ങളിൽ 8 വരെ ഉയരുന്നതിനാൽ പകൽ സമയത്ത് പുറത്തിറങ്ങുന്നവർ ആവശ്യമായ മുൻകരുതലുകൾ സ്വീകരിക്കണമെന്നും കാലാവസ്ഥാ നിരീക്ഷണ കേന്ദ്രം അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Weather warning for Newfoundland; rain and strong winds likely in many areas.
