കാനഡയെ ലോകത്തിലെ മുൻനിര ഊർജ്ജശക്തിയാക്കാനുള്ള ലിബറൽ നേതാവ് മാർക്ക് കാർനിയുടെ പ്രഖ്യാപനത്തോടെ ഈസ്റ്റേൺ കാനഡയിലേക്കുള്ള പൈപ്പ് ലൈൻ പദ്ധതി വീണ്ടും ദേശീയ ശ്രദ്ധ നേടുന്നു. കാൽഗറിയിൽ നടന്ന സമ്മേളനത്തിൽ, രണ്ട് വർഷത്തിനുള്ളിൽ ഒറ്റത്തവണ പരിശോധനയിലൂടെ പദ്ധതിക്ക് അനുമതി നൽകുന്നതിനായി ഒരു ഫെഡറൽ ഓഫീസ് സ്ഥാപിക്കുമെന്നാണ് കാർനി വ്യക്തമാക്കിയത്. ഇത് ഊർജ്ജ പദ്ധതികൾക്ക് വേഗത്തിൽ അംഗീകാരം നൽകുന്നതിനും രാജ്യത്തിന്റെ ഊർജ്ജ ഉൽപ്പാദനം വർദ്ധിപ്പിക്കുന്നതിനും ലക്ഷ്യമിട്ടുള്ളതാണ്.
മറുവശത്ത്, കൺസർവേറ്റീവ് നേതാവ് പിയർ പോയിലിവ്രെ “കാനഡ ഫസ്റ്റ് നാഷണൽ എനർജി കോറിഡോർ” എന്ന പേരിൽ പുതിയ പൈപ്പ് ലൈൻ പദ്ധതി നടപ്പാക്കുമെന്ന് പ്രഖ്യാപിച്ചു. വലിയ ഊർജ്ജ പദ്ധതികൾക്ക് ആറു മാസത്തിനുള്ളിൽ അനുമതി നൽകുമെന്നും അദ്ദേഹം ഉറപ്പുനൽകി. ആൽബർട്ട പ്രീമിയർ ഡാനിയേൽ സ്മിത്ത് ഈ പൈപ്പ് ലൈൻ നിർമ്മാണത്തിന് രാജ്യം പൂർണ്ണ പിന്തുണ നൽകുമെന്നും പ്രഖ്യാപിച്ചിട്ടുണ്ട്. അതിനാൽ തന്നെ, ഇരു പാർട്ടികളുടെയും പിന്തുണ ഈ പദ്ധതിക്ക് ലഭിക്കുമെന്ന പ്രതീക്ഷയിലാണ് ഊർജ്ജമേഖല.
എങ്കിലും, ഈ പദ്ധതിയെക്കുറിച്ച് സാമ്പത്തിക വിദഗ്ദ്ധരും പരിസ്ഥിതി പ്രവർത്തകരും ആശങ്ക പ്രകടിപ്പിക്കുന്നുണ്ട്. പൈപ്പ് ലൈൻ നിർമ്മാണം ചെലവേറിയതും കാലതാമസമെടുക്കുന്നതുമായ പ്രക്രിയയാണെന്നും, പുനരുപയോഗ ഊർജ്ജ മാർഗ്ഗങ്ങൾക്ക് കൂടുതൽ പ്രാധാന്യം നൽകണമെന്നും പരിസ്ഥിതി സംഘടനകൾ മുന്നറിയിപ്പ് നൽകുന്നു. അതിനാൽ, ഈ പദ്ധതിയുടെ സാമ്പത്തികവും പരിസ്ഥിതിപരവുമായ കാര്യങ്ങളിൽ കൂടുതൽ ശ്രദ്ധയും പഠനവും ആവശ്യമാണെന്ന് വിദഗ്ധർ അഭിപ്രായപ്പെടുന്നു.
