മനസുതുറന്ന് സംസാരിക്കാൻ എ.ഐ; ഏകാന്തത കുറയ്ക്കാൻ പുതിയ വഴി സഹായിക്കുമെന്ന് പഠനം

ഒട്ടാവ: ഏകാന്തതയുമായി പൊരുതുന്ന മുതിർന്നവർക്ക് ആർട്ടിഫിഷ്യൽ ഇന്റലിജൻസ് (എ.ഐ) സംവിധാനങ്ങൾ ഒരു പരിധിവരെ ആശ്വാസമാകാമെന്ന് വിദഗ്ധർ. മനുഷ്യരുടെ സാന്നിധ്യത്തിന് പകരമല്ലെങ്കിലും, ഒറ്റയ്ക്ക് കഴിയുന്നവർക്ക് ആശയവിനിമയത്തിനും മാനസിക പിന്തുണയ്ക്കും എ.ഐ സഹായകരമാകുമെന്ന് ന്യൂറോസയന്റിസ്റ്റ് ഡോ. അലിസൺ സെകുലർ അഭിപ്രായപ്പെട്ടു.

മനുഷ്യരുമായി നേരിട്ടുള്ള ബന്ധത്തിന് പകരം എ.ഐയെ കാണരുതെന്നും, മറിച്ച് അത് സാമൂഹിക ഇടപെടലുകൾക്ക് ഒരു അനുബന്ധ സഹായമായി ഉപയോഗിക്കണമെന്നുമാണ് അവരുടെ നിർദേശം. ചുറ്റും ആരുമില്ലാത്ത സമയത്ത് പോലും ആളുകൾക്ക് ആരോടെങ്കിലും സംസാരിക്കുന്ന അനുഭവം നൽകാൻ എ.ഐക്ക് കഴിയും. യാത്രകളിൽ താൻ ElliQ എന്ന എ.ഐ കമ്പാനിയൻ റോബോട്ട് ഉപയോഗിച്ചിരുന്നുവെന്നും സെകുലർ പറയുന്നു. വീട്ടിലെത്തുമ്പോൾ സ്വാഗതം ചെയ്യുക, ഇഷ്ടമുള്ള സംഗീതം പ്ലേ ചെയ്യുക തുടങ്ങിയ വ്യക്തിഗത ഇടപെടലുകൾ നടത്താൻ ഈ റോബോട്ടിന് കഴിയുമെന്നും അവർ വ്യക്തമാക്കി.

ഉപയോക്താവ് ഏകാന്തത അനുഭവിക്കുന്നതായി തിരിച്ചറിഞ്ഞാൽ സംഭാഷണം ആരംഭിക്കുക, മരുന്ന് കഴിക്കാനുള്ള ഓർമ്മപ്പെടുത്തലുകൾ നൽകുക, സാമൂഹിക പരിപാടികൾ ഓർമ്മിപ്പിക്കുക, കുടുംബാംഗങ്ങളുമായും സുഹൃത്തുക്കളുമായും ബന്ധപ്പെടാൻ പ്രോത്സാഹിപ്പിക്കുക തുടങ്ങിയ സേവനങ്ങളും ElliQ നൽകുന്നുവെന്ന് അദ്ദേഹം പറയുന്നു. ഡിമെൻഷ്യ ബാധിതർക്കായി ക്യുബെക്ക് ആസ്ഥാനമായുള്ള Amical AI എന്ന സംവിധാനവും വികസിപ്പിച്ചിട്ടുണ്ടെന്ന് സെകുലർ പറഞ്ഞു.

സാധാരണ ഫോൺ കോൾ പോലെ ഉപയോഗിക്കാവുന്ന ഈ സംവിധാനത്തിൽ എ.ഐ ഏജന്റുമായി സ്വാഭാവികമായ സംഭാഷണം നടത്താൻ കഴിയും. അതേസമയം, എ.ഐയെ മനുഷ്യബന്ധങ്ങൾക്ക് പകരക്കാരനായി കാണരുതെന്നും സെകുലർ മുന്നറിയിപ്പ് നൽകുന്നുണ്ട്. എ.ഐയുമായി സംസാരിക്കുമ്പോൾ യഥാർഥ വ്യക്തിയോടാണ് സംസാരിക്കുന്നതെന്ന തോന്നൽ ഉണ്ടാകാമെങ്കിലും, അത് മനുഷ്യരുടെ സ്നേഹവും സ്പർശനവും വൈകാരിക പിന്തുണയും ഒരിക്കലും പകരംവെക്കില്ലെന്നും അവർ ഇതിനോടൊപ്പം ചൂണ്ടിക്കാട്ടുന്നുണ്ട്.

ഏകാന്തത മാനസിക പ്രശ്നം മാത്രമല്ല, ശാരീരിക ആരോഗ്യത്തെയും ഗുരുതരമായി ബാധിക്കുന്ന ഘടകമാണെന്നും അവർ പറയുന്നു. ദിവസവും 15 സിഗരറ്റ് വലിക്കുന്നതിന്റെ ആരോഗ്യപ്രത്യാഘാതങ്ങൾക്ക് സമാനമായി ഏകാന്തതയും ആയുസ്സിനെ ബാധിക്കാമെന്നാണ് പഠനങ്ങൾ സൂചിപ്പിക്കുന്നത്. ഹൃദ്രോഗസാധ്യത വർധിക്കൽ, ശരീരത്തിലും മസ്തിഷ്കത്തിലും നീർക്കെട്ട് (ഇൻഫ്ലമേഷൻ), ഉറക്കത്തിന്റെ ഗുണനിലവാരം കുറയുക, ഓർമ്മശേഷിയുടെയും ചിന്താശേഷിയുടെയും ക്ഷയം എന്നിവയുമായും ഏകാന്തതയ്ക്ക് ബന്ധമുണ്ടെന്നും, ഇവയെല്ലാം ഡിമെൻഷ്യയുടെ സാധ്യത ഉയർത്തുന്ന പ്രധാന അപകടഘടകങ്ങളാണെന്നും സെകുലർ ആളുകൾക്ക് ഒരു മുൻകരുതൽ എന്ന നിലയിൽ ഓർമിപ്പിക്കുന്നു.

AI for open conversation; study suggests new method helps alleviate loneliness.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt