ഷാർലറ്റ്ടൗൺ: പ്രിൻസ് എഡ്വേർഡ് ഐലൻഡിൽ പതിറ്റാണ്ടുകൾ പഴക്കമുള്ള മദ്യ നിയന്ത്രണ നിയമങ്ങളിൽ വ്യാപകമായ മാറ്റങ്ങൾ വരുത്താൻ ഒരുങ്ങി പ്രവിശ്യാ സർക്കാർ. ഇതിന്റെ ഭാഗമായി റീട്ടെയിൽ വിൽപന, പ്രവർത്തന സമയം, പരസ്യ നിയന്ത്രണങ്ങൾ എന്നിവയിൽ വരുത്തേണ്ട മാറ്റങ്ങളെക്കുറിച്ച് ജനങ്ങളിൽ നിന്നും വ്യാപാരികളിൽ നിന്നും അഭിപ്രായങ്ങൾ തേടാൻ ആരംഭിച്ചു. നിലവിലുള്ള മദ്യനിയന്ത്രണ നിയമങ്ങൾക്ക് 40 വർഷത്തിലേറെയും അനുബന്ധ ചട്ടങ്ങൾക്ക് അരനൂറ്റാണ്ടിലേറെയും പഴക്കമുണ്ടെന്നും, ഇന്നത്തെ സാമൂഹിക സാഹചര്യങ്ങൾക്ക് അനുസൃതമായി ഇവ പരിഷ്കരിക്കേണ്ട സമയം അതിക്രമിച്ചെന്നും ഫിനാൻസ് ആൻഡ് അഫോർഡബിലിറ്റി മന്ത്രി ജിൽ ബർറിഡ്ജ് വ്യക്തമാക്കി. ഓൺലൈൻ സർവേ വഴിയും ലിക്വർ സ്റ്റോർ ബില്ലുകളിലെ ക്യു.ആർ കോഡുകൾ വഴിയുമാണ് ഓഗസ്റ്റ് 28 വരെ അഭിപ്രായങ്ങൾ രേഖപ്പെടുത്താൻ അവസരമുള്ളത്.
ലഹരി ഉപയോഗം മൂലമുണ്ടാകുന്ന ആരോഗ്യ-സാമൂഹിക പ്രശ്നങ്ങൾ കുറയ്ക്കുന്നതിനായുള്ള പ്രവിശ്യയുടെ പുതിയ ആൽക്കഹോൾ സ്ട്രാറ്റജിയുടെ കൂടി ഭാഗമായാണ് ഈ നയരൂപീകരണം. അമിത ലഹരിയുള്ള വീര്യമേറിയ മദ്യങ്ങൾ കുറഞ്ഞ വിലയ്ക്ക് ലഭിക്കുന്നത് തടയാൻ, മദ്യത്തിലെ ആൽക്കഹോൾ അളവിനനുസരിച്ച് മിനിമം വില നിശ്ചയിക്കുന്ന കാര്യവും സർക്കാരിന്റെ പരിഗണനയിലുണ്ട്. കൂടാതെ, മറ്റ് പ്രവിശ്യകളിലേതുപോലെ സൂപ്പർമാർക്കറ്റുകളിൽ വീഞ്ഞും ബീയറും വിൽക്കാൻ അനുവദിക്കണമോ എന്ന കാര്യത്തിലും പൊതുജനങ്ങളുടെ നിലപാട് സർക്കാർ തേടുന്നുണ്ട്.
പ്രാദേശിക മദ്യ ഉത്പാദകർക്കും റസ്റ്റോറന്റുകൾക്കും ബാറുകൾക്കും കൂടുതൽ ഇളവുകൾ നൽകുന്ന നവീകരണ പദ്ധതികളും അണിയറയിൽ പുരോഗമിക്കുകയാണ്. നിലവിൽ നോവ സ്കോഷ്യയിലെ റസ്റ്റോറന്റുകളിലേക്ക് നേരിട്ട് ഉത്പന്നങ്ങൾ വിൽക്കാൻ അനുമതിയുള്ള ഐലൻഡ് ബ്രൂവറികൾക്ക് സ്വന്തം പ്രവിശ്യയിൽ അതിനുള്ള അനുമതിയില്ലെന്ന പരാതിക്ക് ഉടൻ പരിഹാരമുണ്ടാകുമെന്ന് മന്ത്രി ഉറപ്പുനൽകി.
റസ്റ്റോറന്റുകളിൽ കോക്ടെയിലുകൾ മുൻകൂട്ടി വലിയ അളവിൽ ബാച്ച് ചെയ്ത് സൂക്ഷിക്കാനുള്ള അനുമതി ഉൾപ്പെടെയുള്ള പരിഷ്കാരങ്ങളും സർക്കാർ ആലോചിക്കുന്നുണ്ട്. പൊതുജനങ്ങളിൽ നിന്നും വിവിധ മേഖലകളിൽ നിന്നുമുള്ള പ്രതികരണങ്ങൾ വിലയിരുത്തിയ ശേഷമായിരിക്കും ജസ്റ്റിസ്, ഹെൽത്ത്, ട്രാൻസ്പോർട്ടേഷൻ വകുപ്പുകളുമായി ആലോചിച്ച് പുതിയ നിയമനിർമ്മാണത്തിലേക്ക് കടക്കുക.
Prince Edward Island prepares to make changes to its liquor policy; seeks public input!
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
