റോസോ (ഡൊമിനിക്ക): കരീബിയൻ ദ്വീപ് രാഷ്ട്രമായ ഡൊമിനിക്കയിൽ കനേഡിയൻ സംരംഭകനെയും പങ്കാളിയെയും ദാരുണമായി കൊലപ്പെടുത്തിയ കേസിൽ രണ്ട് അമേരിക്കൻ പൗരന്മാർ കുറ്റക്കാരാണെന്ന് കോടതി കണ്ടെത്തി. കനേഡിയൻ സോഫ്റ്റ്വെയർ വ്യവസായി ഡാനിയൽ ലാങ്ലോയിസ്, പങ്കാളി ഡൊമിനിക് മാർചൻഡ് എന്നിവരെ കൊലപ്പെടുത്തിയ കേസിൽ അമേരിക്കൻ പൗരന്മാരായ ജോനാഥൻ ലെഹ്റർ, റോബർട്ട് സ്നൈഡർ ജൂനിയർ എന്നിവരെയാണ് കോടതി കുറ്റക്കാരായി പ്രഖ്യാപിച്ചത്.
2023 അവസാനത്തോടെ കാണാതായ ദമ്പതികൾക്കായി പോലീസും പ്രാദേശിക ഭരണകൂടവും തിരച്ചിൽ നടത്തുന്നതിനിടയിൽ, കത്തിക്കരിഞ്ഞ ഒരു വാഹനത്തിനുള്ളിൽ നിന്നാണ് ഇവരുടെ മൃതദേഹങ്ങൾ കണ്ടെത്തിയത്. കൊല്ലപ്പെട്ട ലാങ്ലോയിസിന്റെ ഉടമസ്ഥതയിലുള്ള റിസോർട്ടിലേക്കുള്ള വഴിയെച്ചൊല്ലി അയൽവാസിയും ചോക്ലേറ്റ് നിർമ്മാതാവുമായ ജോനാഥൻ ലെഹ്ററുമായി വർഷങ്ങളായി തർക്കം നിലനിന്നിരുന്നു. 2019-ൽ പൊതുജനങ്ങൾക്കും ലാങ്ലോയിസിന്റെ റിസോർട്ടിലെത്തുന്നവർക്കും ഈ വഴി ഉപയോഗിക്കാമെന്ന് കോടതി ഉത്തരവിട്ടിരുന്നെങ്കിലും, ഈ വൈരാഗ്യമാണ് ഒടുവിൽ കൊലപാതകത്തിൽ കലാശിച്ചതെന്നാണ് നിഗമനം.
‘ദി മാട്രിക്സ്’, ‘ടൈറ്റാനിക്’ തുടങ്ങിയ സൂപ്പർഹിറ്റ് ഹോളിവുഡ് ചിത്രങ്ങളിൽ ഉപയോഗിച്ച ‘സോഫ്റ്റ്ഇമേജ്’ എന്ന പ്രശസ്തമായ ആനിമേഷൻ സോഫ്റ്റ്വെയറിന്റെ സ്ഥാപകനാണ് കൊല്ലപ്പെട്ട ഡാനിയൽ ലാങ്ലോയിസ്. 1997 മുതൽ ഡൊമിനിക്കയിൽ താമസിച്ചുവരികയായിരുന്ന ഈ ദമ്പതികൾ പ്രദേശത്തെ അറിയപ്പെടുന്ന ജീവകാരുണ്യ പ്രവർത്തകർ കൂടിയായിരുന്നു. കേസിൽ കുറ്റക്കാരാണെന്ന് കണ്ടെത്തിയ പ്രതികൾക്കുള്ള ശിക്ഷാവിധി കോടതി പിന്നീട് പ്രഖ്യാപിക്കും.
Two Americans convicted of murdering Canadian couple in Dominica
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
