ഒച്ചിന്റെ ‘ഉറക്ക രഹസ്യം’ വൈദ്യശാസ്ത്രത്തിന് വഴികാട്ടി; അവയവമാറ്റ ചികിത്സയിൽ പുതിയ പ്രതീക്ഷ

എഡ്മൺട്ടൺ: ഒച്ചുകളുടെ വിശ്രമാവസ്ഥയ്ക്ക് കാരണമാകുന്ന ജൈവതന്മാത്രയെ അടിസ്ഥാനമാക്കി പുതിയ മരുന്ന് വികസിപ്പിച്ചതായി ആൽബർട്ട സർവകലാശാലയിലെ ഗവേഷകർ അറിയിച്ചു. ഭാവിയിൽ അവയവമാറ്റ ശസ്ത്രക്രിയ, ഹൃദയചികിത്സ, വാർധക്യരോഗ ചികിത്സ തുടങ്ങിയ മേഖലകളിൽ ഈ കണ്ടെത്തൽ പുതിയ സാധ്യതകൾ തുറക്കുമെന്നാണ് ഗവേഷകസംഘത്തിന്റെ പ്രതീക്ഷ.

ആൽബർട്ട സർവകലാശാലയിലെ കാർഡിയോവാസ്കുലർ റിസർച്ച് ഇൻസ്റ്റിറ്റ്യൂട്ട് ഡയറക്ടറായ ഡോ. ഇവാഞ്ചലോസ് മിഷെലാക്കിസിന്റെ നേതൃത്വത്തിലുള്ള സംഘമാണ് ഗവേഷണം നടത്തിയത്. ഒച്ചുകളുടെ വിശ്രമാവസ്ഥയ്ക്ക് കാരണമാകുന്ന തന്മാത്രയെ അടിസ്ഥാനമാക്കി വികസിപ്പിച്ച മരുന്നിന് SNAP – (Snail Activator of PHLPP1) എന്നാണ് പേര് നൽകിയിരിക്കുന്നത്.

ഈ മരുന്ന് അവയവങ്ങളുടെയും കോശങ്ങളുടെയും ഉപാപചയ പ്രവർത്തനം സുരക്ഷിതമായി മന്ദഗതിയിലാക്കാൻ സഹായിക്കുമെന്നാണ് ഗവേഷകർ പറയുന്നത്. ശൈത്യനിദ്രയിലാകുന്ന ജീവികളിൽ സംഭവിക്കുന്ന ജൈവപ്രക്രിയകൾ മനുഷ്യരിലും പ്രയോജനപ്പെടുത്താനാകുമോ എന്ന ആശയത്തിൽ നിന്നാണ് ഗവേഷണം ആരംഭിച്ചതെന്ന് ഡോ. മിഷെലാക്കിസ് വ്യക്തമാക്കി.

ഗവേഷണപ്രകാരം, സ്‌നാപ് മനുഷ്യകോശങ്ങൾക്ക് ആവശ്യമായ ഓക്സിജന്റെയും പോഷകഘടകങ്ങളുടെയും ഉപയോഗം കുറയ്ക്കുന്നു. ഇതുവഴി രക്തപ്രവാഹം കുറയുമ്പോൾ ഉണ്ടാകുന്ന കോശനാശം കുറയ്ക്കാൻ കഴിയുമെന്നാണ് പ്രതീക്ഷ. ഹൃദയാഘാതം ഉൾപ്പെടെ നിരവധി ഗുരുതര ആരോഗ്യപ്രശ്നങ്ങളുടെ പ്രധാന കാരണങ്ങളിലൊന്നാണ് അവയവങ്ങളിലേക്കുള്ള രക്തപ്രവാഹക്കുറവ്.

എലികളുടെയും മനുഷ്യകോശങ്ങളുടെയും സാമ്പിളുകളിൽ നടത്തിയ പ്രാരംഭ പരീക്ഷണങ്ങളിൽ, സ്‌നാപ് കോശങ്ങളുടെ ഉപാപചയ പ്രവർത്തനം മന്ദഗതിയിലാക്കി അവയെ “ഉറക്കസമാനമായ” അവസ്ഥയിലേക്ക് എത്തിക്കുന്നതായി കണ്ടെത്തി. ശൈത്യനിദ്രയിലാകാത്ത ജീവികളിൽ ശൈത്യനിദ്രയുടെ ജൈവശാസ്ത്രം പ്രയോഗിക്കുന്ന ആദ്യ ഗവേഷണശ്രമമാണിതെന്ന് ഗവേഷകസംഘം വ്യക്തമാക്കി.

ഈ സാങ്കേതികവിദ്യ വിജയകരമാകുകയാണെങ്കിൽ, അവയവമാറ്റത്തിനായി സംഭരിക്കുന്ന ഹൃദയം, കരൾ തുടങ്ങിയ അവയവങ്ങളുടെ ഉപയോഗയോഗ്യമായ സമയം വർധിപ്പിക്കാനും ഹൃദയ ശസ്ത്രക്രിയകൾക്കിടെ അവയവങ്ങൾക്ക് സംഭവിക്കുന്ന കേടുപാടുകൾ കുറയ്ക്കാനും സഹായിക്കുമെന്ന് ഗവേഷകർ വിലയിരുത്തുന്നു.

വാർധക്യവുമായി ബന്ധപ്പെട്ട ഡിമെൻഷ്യ, ഹൃദയസ്തംഭനം, പ്രമേഹം, അസ്ഥിക്ഷയം, ചില കാൻസർ രോഗങ്ങൾ എന്നിവയുടെ പുരോഗതി മന്ദഗതിയിലാക്കാനും ഈ കണ്ടെത്തൽ സഹായകമായേക്കാമെന്ന് ഡോ. മിഷെലാക്കിസ് അഭിപ്രായപ്പെട്ടു.

ഗവേഷണം ഇപ്പോഴും പ്രാരംഭ ഘട്ടത്തിലാണ്. അടുത്ത ഘട്ടമായി മനുഷ്യരിൽ ഉപയോഗിക്കുന്നതിന് മുമ്പ് അവയവങ്ങളിൽ കൂടുതൽ പരീക്ഷണങ്ങൾ നടത്തും. മരുന്നിന്റെ ദീർഘകാല ഫലപ്രാപ്തിയും സുരക്ഷയും ഉറപ്പാക്കാൻ കൂടുതൽ പഠനങ്ങൾ ആവശ്യമാണെന്നും ഗവേഷകസംഘം അറിയിച്ചു.

U of A researchers unlocked the molecule that makes snails sleepy

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla