അവർക്കായി കരുതിവെച്ച ആ വലിയ സ്വപ്നം; നയാഗ്രയിൽ മാതാപിതാക്കൾക്ക് സർപ്രൈസ് ഒരുക്കി ഇന്ത്യൻ യുവതി, വീഡിയോ ഏറ്റെടുത്ത് സോഷ്യൽ മീഡിയ!

നയാ​ഗ്ര: മാതാപിതാക്കളുടെ ദീർഘകാലത്തെ സ്വപ്നം യാഥാർത്ഥ്യമാക്കി നയാഗ്ര വെള്ളച്ചാട്ടത്തിലേക്ക് മകൾ ഒരുക്കിയ സർപ്രൈസ് യാത്രയുടെ വിശേഷങ്ങളാണ് ഇപ്പോൾ സമൂഹമാധ്യമങ്ങളിൽ തരംഗമാകുന്നത്. പ്രിയങ്ക എന്ന ഇന്ത്യൻ യുവതിയാണ് തന്റെ മാതാപിതാക്കളുടെ ആദ്യ നയാഗ്ര സന്ദർശനത്തിന്റെ മനോഹരമായ ദൃശ്യങ്ങൾ ഇൻസ്റ്റാഗ്രാമിലൂടെ പങ്കുവെച്ചത്. ലോകപ്രശസ്തമായ നയാഗ്ര വെള്ളച്ചാട്ടത്തിന്റെ സൗന്ദര്യം മാതാപിതാക്കളെ നേരിട്ട് കാട്ടിക്കൊടുക്കുക എന്ന വർഷങ്ങളായുള്ള തന്റെ ആഗ്രഹമാണ് ഇതിലൂടെ സഫലമായതെന്ന് പ്രിയങ്ക പറയുന്നു.

വീഡിയോയിലെ ഏറ്റവും പ്രധാനപ്പെട്ട ആകർഷണം പ്രശസ്തമായ ‘മെയ്ഡ് ഓഫ് ദി മിസ്റ്റ്’ ബോട്ട് യാത്രയാണ്. വെള്ളച്ചാട്ടത്തിന്റെ ഇരമ്പലിലേക്ക് ബോട്ട് അടുക്കുമ്പോൾ, പ്രിയങ്കയുടെ മാതാപിതാക്കൾ മുഖത്ത് വിരിയുന്ന അത്ഭുതത്തോടും സന്തോഷത്തോടും കൂടി ചുറ്റും നോക്കുന്ന കാഴ്ച കാണികളുടെയും മനസ്സ് നിറയ്ക്കുന്നതാണ്.

വെള്ളച്ചാട്ടത്തിന്റെ ഭംഗി ആസ്വദിക്കുന്നതിലുപരി, മാതാപിതാക്കൾ തങ്ങളുടെ ജീവിതത്തിൽ ആദ്യമായി ഒരു അത്ഭുതക്കാഴ്ച കാണുമ്പോൾ അവരുടെ മുഖത്തുണ്ടാകുന്ന നിഷ്കളങ്കമായ സന്തോഷം ക്യാമറയിൽ പകർത്താൻ കഴിഞ്ഞതാണ് ഈ വീഡിയോയുടെ ഏറ്റവും വലിയ പ്രത്യേകതയെന്ന് പ്രിയങ്ക പറയുന്നു. പരസ്പരം നോക്കി ചിരിച്ചും, ചുറ്റുമുള്ള കാഴ്ചകളിൽ ലയിച്ചും ഒരു പുതിയ ലോകം കണ്ടെത്തിയ കുട്ടികളെപ്പോലെയാണ് അവർ ആ നിമിഷങ്ങളെ അനുഭവിച്ചറിഞ്ഞത്.

“ഈ നിമിഷത്തിനായി ഞാൻ വർഷങ്ങളായി ആഗ്രഹിച്ചിരുന്നു. എന്റെ ഇന്ത്യൻ മാതാപിതാക്കളെ നയാഗ്ര സ്റ്റേറ്റ് പാർക്കിലെ മെയ്ഡ് ഓഫ് ദി മിസ്റ്റ് ബോട്ട് ടൂറിലേക്ക് കൂട്ടിക്കൊണ്ടുപോകുക എന്നത് ഒരു സ്വപ്നസാക്ഷാത്ക്കാരമായിരുന്നു,” എന്ന് പ്രിയങ്ക തന്റെ ഇൻസ്റ്റാഗ്രാമിൽ കുറിച്ചു. കുടുംബത്തോടൊപ്പം നയാഗ്ര സന്ദർശിക്കാൻ ആഗ്രഹിക്കുന്നവർക്ക് ഈ വീഡിയോ വലിയ പ്രചോദനമാകുമെന്നും അവർ കൂട്ടിച്ചേർത്തു.

വളരെ പെട്ടെന്ന് തന്നെ ഈ വീഡിയോ ഇൻസ്റ്റാഗ്രാമിൽ വൈൈറലായി മാറിയിരിക്കുകയാണ്. നിരവധി ഇന്ത്യക്കാർ ഈ വീഡിയോക്ക് താഴെ വൈകാരികമായ കമന്റുകളുമായി എത്തിയിട്ടുണ്ട്. തങ്ങൾക്കും മാതാപിതാക്കളെ ഇത്തരത്തിലുള്ള മനോഹരമായ യാത്രാനുഭവങ്ങളിലേക്ക് കൂട്ടിക്കൊണ്ടുപോകണമെന്ന സ്വപ്നമുണ്ടെന്ന് പലരും കുറിച്ചു. മാതാപിതാക്കളുടെ സന്തോഷമാണ് തങ്ങളുടെ ഏറ്റവും വലിയ സമ്പാദ്യം എന്ന് ഓർമ്മിപ്പിക്കുന്ന ഈ വീഡിയോ നിലവിൽ സമൂഹമാധ്യമങ്ങളിൽ വ്യാപകമായി പങ്കുവെക്കപ്പെട്ടുകൊണ്ടിരിക്കുകയാണ്.

Indian woman’s Niagara Falls surprise for parents is the best thing you’ll see today

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla