വർക്ക് പെർമിറ്റ് നിഷേധിച്ചു: ഇന്ത്യൻ വിദ്യാർത്ഥികളുടെ പ്രതിഷേധത്തിൽ പ്രതികരണവുമായി പോർട്ടേജ് കോളേജ്

കാൽഗറി : കാനഡയിൽ പോസ്റ്റ് ഗ്രാജുവേഷൻ വർക്ക് പെർമിറ്റുകൾ (PGWP) നിരസിക്കപ്പെട്ടതിനെ തുടർന്ന് സമരം ചെയ്യുന്ന ഇന്ത്യൻ വിദ്യാർത്ഥികളുടെ വിഷയത്തിൽ കാൽഗറിയിലെ പോർട്ടേജ് കോളേജ് പ്രസ്താവന പുറപ്പെടുവിച്ചു. വിദ്യാർത്ഥികൾ അംഗീകൃത ഇമിഗ്രേഷൻ അഭിഭാഷകരെയോ റെഗുലേറ്റഡ് കനേഡിയൻ ഇമിഗ്രേഷൻ കൺസൾട്ടന്റിനെയോ സമീപിച്ച് ഉപദേശം തേടണമെന്ന് ജൂലൈ 20-ന് നൽകിയ സന്ദേശത്തിൽ കോളേജ് നിർദ്ദേശിച്ചു. വിഷയത്തിൽ കൂടുതൽ വിവരങ്ങൾ ശേഖരിക്കുന്നതിനായി ഇമിഗ്രേഷൻ അധികൃതരുമായി സംസാരിച്ചുവരികയാണെന്നും കോളേജ് മാനേജ്‌മെന്റ് അറിയിച്ചു.

2026 ജൂൺ അവസാനം മുതൽ പോർട്ടേജ് കോളേജിൽ നിന്ന് പഠിച്ചിറങ്ങിയ അന്താരാഷ്ട്ര വിദ്യാർത്ഥികളുടെ, പ്രത്യേകിച്ച് ഇന്ത്യൻ വിദ്യാർത്ഥികളുടെ, പിജിഡബ്ല്യുപി അപേക്ഷകൾ കനേഡിയൻ ഇമിഗ്രേഷൻ അധികൃതർ നിരസിച്ചുവരികയാണെന്നാണ് റിപ്പോർട്ട്. വിദ്യാർത്ഥികൾ പൂർത്തിയാക്കിയ ബിസിനസ് മാനേജ്‌മെന്റ് ഡിപ്ലോമ പ്രോഗ്രാം പോലെയുള്ള ‘നോൺ-ക്രഡിറ്റ്’ കോഴ്‌സുകൾക്ക് വർക്ക് പെർമിറ്റിന് അർഹതയില്ലെന്ന് ചൂണ്ടിക്കാട്ടിയാണ് അപേക്ഷകൾ തള്ളിയത്. ഓരോ അപേക്ഷയും വ്യക്തിഗതമായി പരിശോധിച്ച് ഇമിഗ്രേഷൻ തീരുമാനങ്ങൾ എടുക്കുന്നത് ‘ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ’ (IRCC) ആണെന്നും, വർക്ക് പെർമിറ്റ് ലഭിക്കുമെന്ന് കോളേജ് ഉറപ്പുനൽകിയിട്ടില്ലെന്നും അധികൃതർ വ്യക്തമാക്കി.

അംഗീകൃത കോളേജുകളുടെയും പ്രോഗ്രാമുകളുടെയും പട്ടികയിൽ ഉൾപ്പെട്ടിട്ടുള്ളതിനാലാണ് പ്രതിവർഷം 15,000 ഡോളറിലധികം ട്യൂഷൻ ഫീസ് നൽകി പോർട്ടേജിൽ ചേർന്നതെന്ന് വിദ്യാർത്ഥികൾ അവകാശപ്പെടുന്നു. കാനഡ ഗസറ്റ് വിജ്ഞാപനമില്ലാതെ ഐആർസിസി വെബ്‌സൈറ്റിലെ നിയമങ്ങളിൽ പെട്ടെന്ന് മാറ്റം വരുത്തുകയാണെന്നും, 2023-2024 കാലയളവിൽ എത്തിയ പഴയ വിദ്യാർത്ഥികൾക്ക് മേൽ പുതിയ നിയമം മുൻകാല പ്രാബല്യത്തോടെ അടിച്ചേൽപ്പിക്കുകയാണെന്നും ഉദ്യോഗാർത്ഥികൾ ആരോപിക്കുന്നു. രണ്ടു വർഷത്തെ പഠനത്തിന് ശേഷം ജോലി ചെയ്യാൻ അനുവദിക്കണമെന്നും, സ്ഥിരതാമസം (PR) ആവശ്യമില്ലെന്നുമാണ് സമരം ചെയ്യുന്ന വിദ്യാർത്ഥികളുടെ നിലപാട്.

പ്രതിസന്ധിയിലായ അന്താരാഷ്ട്ര വിദ്യാർത്ഥികൾക്ക് പിന്തുണയുമായി കനേഡിയൻ ഇമിഗ്രേഷൻ കൺസൾട്ടന്റായ ഡിംപിൾ വർമ്മയുടെ നേതൃത്വത്തിൽ ഒപ്പശേഖരണ പെറ്റീഷൻ ആരംഭിച്ചിട്ടുണ്ട്. എന്നാൽ ഇമിഗ്രേഷൻ തീരുമാനങ്ങളിൽ കോളേജിന് പങ്കില്ലെന്നും വിദ്യാർത്ഥികൾക്ക് വേണ്ടി നിയമനടപടികളിൽ പങ്കെടുക്കാനാകില്ലെന്നും പോർട്ടേജ് കോളേജ് ഔദ്യോഗിക വിശദീകരണത്തിൽ വ്യക്തമാക്കിയിട്ടുണ്ട്.

Portage College responds to Indian students’ protest over work permit denial

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt