ലണ്ടൻ: ശരീരഭാരം കുറയ്ക്കുന്നതിനും പ്രമേഹത്തിനുമായി ഉപയോഗിക്കുന്ന GLP-1 വിഭാഗത്തിൽപെട്ട മരുന്നുകൾ കഴിക്കുന്നവരിൽ മുടികൊഴിച്ചിലിനുള്ള (അലോപ്പീഷ്യ) സാധ്യത വളരെ കുറവാണെങ്കിലും, മറ്റ് ചില പ്രമേഹ മരുന്നുകളുമായി താരതമ്യം ചെയ്യുമ്പോൾ ഇത് കൂടുതലാണെന്ന് പുതിയ പഠനങ്ങൾ വ്യക്തമാക്കുന്നു. പെൻസിൽവാനിയ സർവകലാശാലയിലെ ഗവേഷകർ ദി ബി.എം.ജെ (The BMJ) ജേണലിലും, അമേരിക്കൻ അക്കാദമി ഓഫ് ഡെർമറ്റോളജി ജേണലിലും പ്രസിദ്ധീകരിച്ച പഠനങ്ങളിലാണ് ഈ കണ്ടെത്തലുള്ളത്. ചികിത്സ ആരംഭിച്ച് രണ്ട് വർഷത്തിന് ശേഷം നടത്തിയ നിരീക്ഷണത്തിൽ പ്രമേഹത്തിന് സാധാരണ നൽകുന്ന സാദാ മരുന്നുകളെ അപേക്ഷിച്ച് ഇത്തരം മരുന്നുകൾ ഉപയോഗിക്കുന്നവരിൽ മുടികൊഴിച്ചിൽ റിപ്പോർട്ട് ചെയ്യുന്ന നിരക്ക് കൂടുതലാണെന്ന് രേഖപ്പെടുത്തി.
സെമാഗ്ലൂറ്റൈഡ് (Ozempic, Wegovy), തിർസെപറ്റൈഡ് (Mounjaro, Zepbound) തുടങ്ങിയ ജനപ്രിയ മരുന്നുകൾ ഉപയോഗിക്കുന്ന പതിനായിരക്കണക്കിന് ആളുകളെ കേന്ദ്രീകരിച്ചാണ് പഠനം നടന്നത്. റിപ്പോർട്ടുകൾ പ്രകാരം ഓരോ 1,000 പേരിലും വർഷം തോറും 3 മുതൽ 9 പേർക്ക് വരെ മാത്രമാണ് മുടികൊഴിച്ചിൽ അനുഭവപ്പെടുന്നത്. ഇതിൽ തന്നെ സെമാഗ്ലൂറ്റൈഡിനേക്കാൾ തിർസെപറ്റൈഡ് ഉപയോഗിക്കുന്നവരിലും, പുരുഷന്മാരേക്കാൾ സ്ത്രീകളിലുമാണ് മുടികൊഴിച്ചിൽ കൂടുതൽ കണ്ടത്. എന്നാൽ മൊത്തത്തിലുള്ള നിരക്ക് നോക്കുമ്പോൾ ആശങ്കപ്പെടേണ്ട സാഹചര്യമില്ലെന്നാണ് ഗവേഷകരുടെ വിലയിരുത്തൽ.
ശരീരഭാരം പെട്ടെന്ന് കുറയുമ്പോൾ സ്വാഭാവികമായി സംഭവിക്കുന്ന മാറ്റങ്ങളാകാം ഇതിന് പ്രധാന കാരണമെന്ന് പഠനത്തിന് നേതൃത്വം നൽകിയ ഗവേഷകർ പറയുന്നു. എന്നാൽ തൈറോയ്ഡ് അല്ലെങ്കിൽ ഹോർമോൺ വ്യതിയാനങ്ങൾ ഉള്ളവരിലും ഇത് കണ്ടുവരുന്നുണ്ട്. അതിനാൽ ഭാരം കുറയുന്നത് കൊണ്ട് മാത്രമാണ് മുടികൊഴിച്ചിൽ എന്ന സാമാന്യവൽക്കരണത്തിന് പകരം, മരുന്ന് ഉപയോഗിക്കുന്നവരുടെ ആരോഗ്യസ്ഥിതി കൃത്യമായി നിരീക്ഷിച്ച് വ്യക്തിഗത ഉപദേശം നൽകുകയാണ് വേണ്ടതെന്നും റിപ്പോർട്ട് വ്യക്തമാക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Hair loss in people taking diabetes medication? Here is what a new study says.
