നയാഗ്ര: സെന്റ് കാതറൈൻസിൽ ഭവനരഹിതർക്കായി പുതിയ ഷെൽട്ടർ സ്ഥാപിക്കാനുള്ള നീക്കത്തിനെതിരെ പ്രദേശവാസികൾക്കിടയിൽ പ്രതിഷേധവും ആശങ്കയും ശക്തമാകുന്നു. പദ്ധതിയുടെ ഔദ്യോഗിക സ്ഥലം അധികൃതർ ഇതുവരെ പ്രഖ്യാപിച്ചിട്ടില്ലെങ്കിലും, ബണ്ടിംഗ് റോഡിനും ഡൻകിർക്ക് റോഡിനും സമീപം ഷെൽട്ടർ വരുമെന്ന തരത്തിൽ പ്രചരിച്ച ഒരു സോഷ്യൽ മീഡിയ പോസ്റ്റാണ് വിവാദങ്ങൾക്ക് കാരണമായത്. ഈ ഭാഗങ്ങളിൽ ഷെൽട്ടർ വരുന്നത് പ്രദേശത്തെ സുരക്ഷയെ ബാധിക്കുമെന്നും മയക്കുമരുന്ന് ഉപയോഗവും മാലിന്യ നിക്ഷേപവും വർദ്ധിപ്പിക്കുമെന്നും ചൂണ്ടിക്കാട്ടിയാണ് നാട്ടുകാർ രംഗത്തെത്തിയിരിക്കുന്നത്. നിലവിൽ റിയോർഡൺ സ്ട്രീറ്റിൽ പ്രവർത്തിക്കുന്ന താൽക്കാലിക ഷെൽട്ടറിന്റെ കാലാവധി ഈ വർഷാവസാനം തീരുന്നതിനാലാണ് പുതിയ സ്ഥലം കണ്ടെത്താൻ നയാഗ്ര റീജിയൻ ശ്രമം തുടങ്ങിയത്.
എന്നാൽ, ഷെൽട്ടറിന്റെ നിർദ്ദിഷ്ട സ്ഥലം സംബന്ധിച്ച് റീജിയണൽ രാഷ്ട്രീയ നേതാക്കൾക്ക് പോലും ഔദ്യോഗിക വിവരങ്ങൾ ലഭിച്ചിട്ടില്ലെന്ന് നഗര ഭരണകൂടം വ്യക്തമാക്കി. സാധ്യതയുള്ള സ്ഥലത്തെക്കുറിച്ചുള്ള വിവരങ്ങൾ സോഷ്യൽ മീഡിയയിലൂടെയാണ് ജനങ്ങൾ അറിഞ്ഞതെന്നും ഇത് ഭരണവിഭാഗങ്ങൾ തമ്മിലുള്ള ആശയവിനിമയത്തിലെ ഗുരുതരമായ വീഴ്ചയാണെന്നും സിറ്റി കൗൺസിലർ മാർക്ക് സ്റ്റീവൻസ് വിമർശിച്ചു. ഈ വിഷയത്തിൽ നയാഗ്ര റീജിയണും സെന്റ് കാതറൈൻസ് നഗരസഭയും തമ്മിൽ രാഷ്ട്രീയതലത്തിലും തർക്കങ്ങൾ ഉടലെടുത്തിട്ടുണ്ട്. പുതിയ ഷെൽട്ടറിനായുള്ള അന്തിമ ശുപാർശ ഈ വർഷം ശരത്കാലത്തോടെ മാത്രമേ കൗൺസിലിന് സമർപ്പിക്കുകയുള്ളൂ എന്ന് കമ്മ്യൂണിറ്റി സർവീസസ് കമ്മിഷണർ ഹെൻറി കോനിംഗ് അറിയിച്ചു.
അതേസമയം, പുതിയ ഷെൽട്ടർ തുറക്കുന്നതിന് മുൻപ് കൃത്യമായ സുരക്ഷാ പദ്ധതിയും പ്രവർത്തന രൂപരേഖയും പുറത്തുവിടണമെന്ന് സെന്റ് കാതറൈൻസ് മേയർ മാറ്റ് സിസ്കോയുടെ നേതൃത്വത്തിലുള്ള നഗര കൗൺസിൽ ആവശ്യപ്പെട്ടു. 24 മണിക്കൂറും പ്രവർത്തിക്കുന്ന സുരക്ഷാ സംവിധാനം, കൂടുതൽ പൊലീസ് നിരീക്ഷണം, കൃത്യമായ മാലിന്യ നിർമ്മാർജ്ജനം എന്നിവ ഉറപ്പാക്കണമെന്നാണ് നഗരസഭയുടെ ആവശ്യം. എന്നാൽ, പുതിയ കേന്ദ്രത്തിൽ കൗൺസിലിംഗ് സേവനങ്ങളും കൂടുതൽ സൌകര്യങ്ങളും ഉണ്ടാകുമെന്നും ഇത് നിലവിലത്തെ സംവിധാനത്തേക്കാൾ മെച്ചപ്പെട്ടതായിരിക്കുമെന്നും റീജിയൻ അധികൃതർ വിശദീകരിക്കുന്നു. ഷെൽട്ടറിനായി ഏത് സ്ഥലം തിരഞ്ഞെടുത്താലും ജനങ്ങളുടെ ഭാഗത്തുനിന്ന് പ്രതിഷേധം സ്വാഭാവികമാണെന്നാണ് കൗൺസിലർ സാൽ സൊറന്റോയുടെ വിലയിരുത്തൽ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Protests before announcement; local residents oppose shelter project in St. Catharines.
