ട്രംപിനായി കനത്ത സുരക്ഷ; ദുരിതത്തിലായത് മാധ്യമപ്രവർത്തകർ, മണിക്കൂറുകൾ നീണ്ട ദുരിതം

ന്യുജഴ്സി; ലോകകപ്പ് ഫൈനൽ റിപ്പോർട്ട് ചെയ്യാനെത്തിയ മാധ്യമപ്രവർത്തകർക്ക് ന്യുജഴ്സി സ്റ്റേഡിയത്തിൽ നേരിടേണ്ടി വന്നത് കടുത്ത ബുദ്ധിമുട്ടുകളായിരുന്നു. സ്റ്റേഡിയത്തിനുള്ളിലേക്ക് കടക്കാൻ മൂന്നര മണിക്കൂറിലേറെ കനത്ത ചൂടിൽ കാത്തുനിൽക്കേണ്ടിവന്നതും, സുരക്ഷാ പരിശോധനകളിലെ കാലതാമസവും, സുരക്ഷാ ജീവനക്കാരുടെ സഹകരണക്കുറവും സാഹചര്യം കൂടുതൽ ദുഷ്കരമാക്കി. കുടിവെള്ളവും ഭക്ഷണവും ലഭിക്കാൻ പോലും വീണ്ടും നീണ്ട വരികളിൽ നിൽക്കേണ്ടിവന്നതോടെ നിരവധി പേർ അതീവ ക്ഷീണിതരായി.

അമേരിക്കൻ പ്രസിഡന്റ് ഡോണൾഡ് ട്രംപ് ഉൾപ്പെടെ പ്രമുഖർ ഫൈനൽ കാണാനെത്തുന്നതിനാൽ അസാധാരണ സുരക്ഷാ ക്രമീകരണങ്ങൾ ഉണ്ടാകുമെന്ന് നേരത്തേ അറിയിച്ചിരുന്നെങ്കിലും, ഇത്രയും വലിയ ഭരണപരമായ വീഴ്ച ആരും പ്രതീക്ഷിച്ചിരുന്നില്ല. പ്രാദേശിക സമയം രാവിലെ ഒമ്പത് മുതൽ മീഡിയ സെന്ററിലേക്ക് പ്രവേശനം അനുവദിക്കുമെന്ന അറിയിപ്പിനെ തുടർന്ന് മാധ്യമപ്രവർത്തകർ നേരത്തേ സ്റ്റേഡിയത്തിലെത്തിയിരുന്നു. എന്നാൽ മീഡിയ ബസ് തെറ്റായ ഗേറ്റിലെത്തിച്ചതോടെയാണ് പ്രശ്നങ്ങളുടെ തുടക്കം.

പിന്നീട് ശരിയായ പ്രവേശന കവാടത്തിലെത്തിയപ്പോൾ നൂറുകണക്കിന് മാധ്യമപ്രവർത്തകർ ഇതിനകം തന്നെ വരിയിൽ കാത്തുനിൽക്കുകയായിരുന്നു. പതിവ് സുരക്ഷാ പരിശോധനയ്ക്കൊപ്പം ഫെഡറൽ ഏജൻസികളുടെ അധിക പരിശോധനയും ചേർന്നതോടെ ഒരാളെ പരിശോധിച്ച് അകത്തേക്ക് കടത്തിവിടാൻ പോലും ഏറെ സമയം എടുത്തു. രാവിലെ ഒമ്പതിന് വരിയിൽ നിന്നവരിൽ പലർക്കും ഉച്ചയായിട്ടും സുരക്ഷാ കവാടത്തിന് സമീപമെത്താനായിരുന്നില്ല.

ഇതിനിടെ മറ്റൊരു പ്രവേശന കവാടത്തിലൂടെ മാധ്യമപ്രവർത്തകരെ അകത്തേക്ക് കടത്തിവിടുകയാണെന്ന് ചില വൊളന്റിയർമാർ അറിയിച്ചതോടെ നിരവധി പേർ സ്റ്റേഡിയം ചുറ്റി അവിടേക്കോടി. എന്നാൽ അവിടെ എത്തിയപ്പോൾ പ്രവേശനം അനുവദിക്കില്ലെന്നായിരുന്നു അധികൃതരുടെ മറുപടി. വീണ്ടും പഴയ ഗേറ്റിലേക്ക് മടങ്ങിയെത്തിയപ്പോൾ അതിനിടയിൽ വരി കൂടുതൽ നീണ്ടിരുന്നു. ഒടുവിൽ രണ്ടുമണിയോടെയാണ് പലർക്കും സ്റ്റേഡിയത്തിനുള്ളിൽ പ്രവേശിക്കാനായത്.

ഇതുമൂലം ടെലിവിഷൻ മാധ്യമങ്ങളിലെ നിരവധി റിപ്പോർട്ടർമാർക്ക് മത്സരത്തിന് മുമ്പ് സംപ്രേഷണം ചെയ്യേണ്ട തത്സമയ റിപ്പോർട്ടുകൾ നഷ്ടമായി. പിന്നാലെ ഭക്ഷണത്തിനും കുടിവെള്ളത്തിനുമായി വീണ്ടും വരിനിൽക്കേണ്ടി വന്നതോടെ കിക്കോഫിന് തൊട്ടുമുമ്പാണ് പലർക്കും ജോലി സ്ഥലത്തെത്താനായത്. ഇത്രയധികം മാധ്യമപ്രവർത്തകർക്ക് മുൻകൂട്ടി അംഗീകാരവും പ്രവേശന പാസും നൽകിയിരുന്നിട്ടും, അവരെ കാര്യക്ഷമമായി സ്റ്റേഡിയത്തിലേക്ക് പ്രവേശിപ്പിക്കാനുള്ള സംവിധാനങ്ങൾ ഒരുക്കുന്നതിൽ സംഭവിച്ച ഗുരുതര വീഴ്ചയാണ് മുഴുവൻ പ്രതിസന്ധിക്കും കാരണമായത്.

A trial by fire for journalists ahead of the World Cup final; gaining entry was an ordeal lasting hours.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt