ബി.സിയിൽ കാട്ടുതീ പടരുന്നു: നൂറുകണക്കിന് ആളുകളെ മാറ്റിപ്പാർപ്പിച്ചു, അതീവ ജാഗ്രത തുടരുന്നു

ബ്രിട്ടീഷ് കൊളംബിയ: ബ്രിട്ടീഷ് കൊളംബിയയിൽ കാട്ടുതീ അതീവ ഗുരുതരമായി തുടരുകയാണ്. ബുധനാഴ്ചയുണ്ടായ ആയിരക്കണക്കിന് മിന്നൽപ്പിണരുകളെത്തുടർന്ന് പ്രവിശ്യയിലുടനീളം ഒറ്റയടിക്ക് നൂറിലധികം തീപിടുത്തങ്ങൾ റിപ്പോർട്ട് ചെയ്യപ്പെട്ടതോടെ കാട്ടുതീ സീസൺ അപ്രതീക്ഷിതവും ഭയാനകവുമായ അവസ്ഥയിലേക്ക് മാറിയിരിക്കുകയാണ്. ബുധനാഴ്ച വരെ ഇരുപതോളം തീപിടുത്തങ്ങൾ മാത്രമുണ്ടായിരുന്ന സ്ഥാനത്ത് ശനിയാഴ്ചയോടെ അത് 114 ആയി ഉയർന്നു. ഇതിൽ മൂന്നിൽ രണ്ട് ഭാഗവും നിയന്ത്രണാതീതമാണ്.

ഏറ്റവും കൂടുതൽ ബാധിക്കപ്പെട്ടിരിക്കുന്നത് ദക്ഷിണ ബി.സി. ഉൾപ്രദേശങ്ങളാണ്. ഏകദേശം 575 കെട്ടിടങ്ങൾക്ക് ഇതിനകം ഒഴിപ്പിക്കൽ ഉത്തരവ് നൽകുകയും, 1,740-ഓളം വീടുകൾ ഒഴിപ്പിക്കൽ ഭീഷണിയിൽ തുടരുകയുമാണ്. നൂറുകണക്കിന് ആളുകളെ ഇതിനകം മാറ്റിപ്പാർപ്പിച്ചു. കടുത്ത കാറ്റും വരണ്ട കാലാവസ്ഥയും തീ അണയ്ക്കുന്നതിന് അഗ്നിശമന സേനാംഗങ്ങൾക്ക് വലിയ വെല്ലുവിളിയാണ് ഉയർത്തുന്നത്.

സർക്കാർ 770-ലധികം കാട്ടുതീ അഗ്നിശമന സേനാംഗങ്ങളെ രംഗത്തിറക്കിയിട്ടുണ്ടെങ്കിലും വരും ദിവസങ്ങളിലും കൂടുതൽ തീപിടുത്തങ്ങൾക്ക് സാധ്യതയുണ്ടെന്ന് ബി.സി. വൈൽഡ്‌ഫയർ സർവീസ് മുന്നറിയിപ്പ് നൽകുന്നു. ഒഴിഞ്ഞുപോകാനുള്ള നിർദ്ദേശങ്ങൾ അവഗണിച്ച് സ്വന്തം വീടുകളും സ്വത്തുക്കളും സംരക്ഷിക്കാൻ പലരും ഇപ്പോഴും അപകടസാധ്യതയുള്ള മേഖലകളിൽ തുടരുന്നുണ്ട്. മേഖലയിലെ ജനങ്ങളോട് അതീവ ജാഗ്രത പാലിക്കാൻ അധികൃതർ നിർദ്ദേശിച്ചു.

B.C. wildfire tally surges past 100 as lightning transforms fire season in a flash

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt