മിയാമി: ഫിഫ ലോകകപ്പ് 2026-ലെ മൂന്നാം സ്ഥാനത്തിനായുള്ള പോരാട്ടത്തിൽ ഇംഗ്ലണ്ടിന് തകർപ്പൻ ജയം. ഫ്ലോറിഡയിലെ ഹാർഡ് റോക്ക് സ്റ്റേഡിയത്തിൽ നടന്ന ഗോളൊഴുക്കുള്ള മത്സരത്തിൽ ഫ്രാൻസിനെ 6-4ന് കീഴടക്കിയാണ് ഇംഗ്ലണ്ട് മൂന്നാം സ്ഥാനം ഉറപ്പിച്ചത്. 1966-ൽ ലോകകപ്പ് കിരീടം നേടിയതിന് ശേഷമുള്ള ടൂർണമെന്റ് ചരിത്രത്തിൽ ഇംഗ്ലണ്ടിന്റെ ഏറ്റവും മികച്ച പ്രകടനമായും ഈ നേട്ടം മാറി.
ഇംഗ്ലണ്ടിന്റെ വിജയശില്പിയായി ബുക്കായോ സാക മാറി. മത്സരത്തിൽ ഹാട്രിക് നേടി താരം ആക്രമണനിരയ്ക്ക് ചുക്കാൻ പിടിച്ചു. മറുവശത്ത് ഫ്രാൻസിനായി കിലിയൻ എംബാപ്പെ ഇരട്ടഗോൾ നേടിയെങ്കിലും തോൽവി ഒഴിവാക്കാൻ അത് പോരായിരുന്നു. എന്നിരുന്നാലും ഈ ലോകകപ്പിലെ 10-ാം ഗോളും ലോകകപ്പ് കരിയറിലെ 22-ാം ഗോളും സ്വന്തമാക്കിയ എംബാപ്പെ, ടൂർണമെന്റിലെയും എക്കാലത്തെയും ഗോൾവേട്ടക്കാരുടെ പട്ടികയിൽ ഒന്നാം സ്ഥാനത്തെത്തി. ലയണൽ മെസിയാണ് അദ്ദേഹത്തിന് പിന്നിലുള്ളത്.
മത്സരം തുടങ്ങി മൂന്നാം മിനിറ്റിൽ തന്നെ ഡെക്ലൻ റൈസ് ഇംഗ്ലണ്ടിനെ മുന്നിലെത്തിച്ചു. തുടർന്ന് 18-ാം മിനിറ്റിൽ എസ്രി കോൺസയും, 37-ാം മിനിറ്റിലും ആദ്യപകുതിയുടെ അധികസമയത്തിന്റെ ആദ്യ മിനിറ്റിലും ബുക്കായോ സാകയും ലക്ഷ്യം കണ്ടതോടെ ഇടവേളയ്ക്ക് പിരിയുമ്പോൾ ഇംഗ്ലണ്ട് 4-0ന്റെ ശക്തമായ ലീഡിലായിരുന്നു.
രണ്ടാംപകുതിയിൽ ഫ്രാൻസ് ശക്തമായ തിരിച്ചുവരവ് നടത്തി. തന്ത്രങ്ങളിൽ മാറ്റം വരുത്തിയ ഫ്രഞ്ച് നിര 48, 66 മിനിറ്റുകളിൽ എംബാപ്പെയിലൂടെയും 54-ാം മിനിറ്റിൽ ബ്രാഡ്ലി ബാർക്കോളയിലൂടെയും ഗോൾ കണ്ടെത്തി സ്കോർ 4-3ലേക്ക് ചുരുക്കി. എന്നാൽ അവസാന നിമിഷങ്ങളിൽ ഇംഗ്ലണ്ട് വീണ്ടും മത്സരത്തിന്റെ നിയന്ത്രണം ഏറ്റെടുത്തു. 87-ാം മിനിറ്റിൽ ലഭിച്ച പെനാൽറ്റി ഗോളാക്കി മാറ്റിയ സാക ഹാട്രിക് പൂർത്തിയാക്കി. ഇഞ്ചുറി ടൈമിന്റെ ആറാം മിനിറ്റിൽ ഉസ്മാൻ ഡെംബെലെ ഫ്രാൻസിന്റെ നാലാം ഗോൾ നേടിയെങ്കിലും, 90+8-ാം മിനിറ്റിൽ ജൂഡ് ബെല്ലിംഗം ഇംഗ്ലണ്ടിന്റെ ആറാം ഗോൾ നേടി വിജയത്തിന് അവസാന മുദ്ര പതിപ്പിച്ചു.
England beats France to secure third place in the World Cup.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
