എഡ്മന്റൺ: ആൽബർട്ടയിലെ നഗരങ്ങളിലുള്ള ബൈക്ക് ലെയ്നുകളെക്കുറിച്ചുള്ള പൊതുജന പരാതികൾ ശേഖരിക്കാൻ പ്രവിശ്യാ സർക്കാർ പുതിയ ഓൺലൈൻ പോർട്ടൽ ആരംഭിച്ചു. കഴിഞ്ഞ ബുധനാഴ്ച തുടങ്ങിയ ഈ വെബ്സൈറ്റിലൂടെ ജനങ്ങൾ നൽകുന്ന വിവരങ്ങൾ വച്ചുകൊണ്ട്, വരാനിരിക്കുന്ന ഒക്ടോബറിലെ നിയമസഭാ സമ്മേളനത്തിൽ പുതിയൊരു ഗതാഗത നിയമം കൊണ്ടുവരുമെന്ന് ഗതാഗതമന്ത്രി ഡെവിൻ ഡ്രിഷൻ അറിയിച്ചു. എഡ്മന്റൺ, കാൽഗറി തുടങ്ങിയ വലിയ നഗരങ്ങളിൽ നിലവിൽ ബൈക്ക് ലെയ്നുകൾ ഉണ്ടാക്കുന്ന ബുദ്ധിമുട്ടുകൾ കണ്ടെത്താനാണ് സർക്കാർ ഈ വഴി നോക്കുന്നത്.
പുതിയ നിയമം വരുന്നതോടെ നഗരസഭകൾക്ക് തോന്നിയതുപോലെ റോഡരികിൽ ബൈക്ക് ലെയ്ൻ നിർമിക്കാൻ കഴിയില്ല. അതിന് മുൻപായി റോഡിലെ വണ്ടികളുടെ തിരക്കിനെക്കുറിച്ച് പഠനം നടത്തുകയും സർക്കാരിന്റെ അനുമതി വാങ്ങുകയും വേണം. വണ്ടികൾ ഓടിക്കാനും പാർക്ക് ചെയ്യാനും ഉള്ള റോഡിന്റെ വീതി കുറച്ച് ബൈക്ക് ലെയ്ൻ ഉണ്ടാക്കുന്നത് ശരിയല്ലെന്നാണ് മന്ത്രിയുടെ നിലപാട്. എന്നാൽ, ബൈക്ക് ഓടിക്കുന്നവർക്ക് അനുകൂലമായി സംസാരിക്കാൻ വെബ്സൈറ്റിൽ സൗകര്യമില്ലെന്ന് ചിലർ കുറ്റപ്പെടുത്തി. ഇതിന് മറുപടിയായി, സൈറ്റിലെ അവസാനത്തെ ചോദ്യത്തിൽ 500 അക്ഷരങ്ങൾ വരെ തങ്ങളുടെ നല്ല അഭിപ്രായങ്ങളും എഴുതി അറിയിക്കാമെന്ന് മന്ത്രി വ്യക്തമാക്കി.
എന്നാൽ, നഗരസഭകൾ ചെയ്യേണ്ട കാര്യങ്ങളിൽ പ്രവിശ്യാ സർക്കാർ എന്തിനാണ് ഇടപെടുന്നതെന്ന ചോദ്യവുമായി പ്രതിപക്ഷവും നഗര മേയർമാരും രംഗത്തെത്തിയിട്ടുണ്ട്. വലിയ റോഡുകളും പാലങ്ങളും പണിയുന്നതിന് ശ്രദ്ധ കൊടുക്കാതെ സർക്കാർ ഇത്തരം ചെറിയ കാര്യങ്ങളിലാണ് സമയം കളയുന്നതെന്ന് എഡ്മൺടൺ മേയർ ആൻഡ്രൂ നാക്ക് കുറ്റപ്പെടുത്തി. ബൈക്ക് ലെയ്ൻ പ്രശ്നങ്ങളിൽ ജനങ്ങൾ നഗരത്തിലെ കൗൺസിലർമാരെയാണ് സമീപിക്കേണ്ടതെന്നും ഇതിൽ സംസ്ഥാന സർക്കാർ ഇടപെടേണ്ട കാര്യമില്ലെന്നും പ്രതിപക്ഷ നേതാവ് നഹീദ് നെൻഷിയും വ്യക്തമാക്കി. ഈ നിയമം ഒക്ടോബർ അവസാനത്തോടെ നിയമസഭയിൽ അവതരിപ്പിക്കാനാണ് സർക്കാർ പദ്ധതി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Online portal for bike lane complaints; Alberta government introduces new rule.
