സസ്കാറ്റൂൺ: രാജ്യത്ത് കുടിയേറ്റ നിയമങ്ങൾ ലംഘിച്ച് വ്യാജരേഖകൾ ചമയ്ക്കാനും ഇമിഗ്രേഷൻ തട്ടിപ്പിനും കൂട്ടുനിന്ന കേസിൽ സസ്കാറ്റൂൺ സ്വദേശി ബൽവീർ സിങ്ങിന് കനത്ത ശിക്ഷ. കാനഡ ബോർഡർ സർവീസസ് ഏജൻസി (CBSA) നടത്തിയ അന്വേഷണത്തിനൊടുവിൽ സസ്കാറ്റൂൺ കോടതിയാണ് ഇയാൾക്ക് ശിക്ഷ വിധിച്ചത്. രണ്ടു വർഷത്തിൽ ഒരു ദിവസം കുറഞ്ഞ കാലയളവിലേക്കുള്ള നിബന്ധനകളോടുകൂടിയ തടവ്, 10,000 ഡോളർ പിഴ, 40 മണിക്കൂർ സാമൂഹിക സേവനം എന്നിവയാണ് ഇയാൾക്കുള്ള ശിക്ഷ. ഇമിഗ്രേഷൻ ആൻഡ് റെഫ്യൂജി പ്രൊട്ടക്ഷൻ ആക്ട് (IRPA) പ്രകാരം തെറ്റായ വിവരങ്ങൾ നൽകാൻ പ്രേരിപ്പിച്ചു എന്ന കുറ്റത്തിനാണ് ഇയാൾക്കെതിരെ കേസെടുത്തത്.
2018-ലാണ് സിങ്ങിന്റെ പ്രവർത്തനങ്ങൾ CBSA-യുടെ ശ്രദ്ധയിൽപ്പെടുന്നത്. ഒരു സസ്കാറ്റൂൺ അധിഷ്ഠിത നോൺ-പ്രോഫിറ്റ് സംഘടനയുമായി ബന്ധപ്പെട്ട് അസാധാരണമാംവിധം കൂടുതൽ ഇമിഗ്രേഷൻ അപേക്ഷകൾ വരുന്നത് ശ്രദ്ധയിൽപ്പെട്ടതിനെത്തുടർന്നാണ് അന്വേഷണം ആരംഭിച്ചത്. തൊഴിൽ രേഖകൾ, ശമ്പള സ്ലിപ്പുകൾ, തൊഴിൽ വാഗ്ദാനങ്ങൾ എന്നിവ വ്യാജമായി നിർമ്മിച്ച് ഉദ്യോഗാർത്ഥികളെ കാനഡയിലേക്ക് കൊണ്ടുവരാൻ സിംഗ് ശ്രമിച്ചു. ഇമിഗ്രേഷൻ സ്പോൺസർഷിപ്പിനായി ഓരോ വ്യക്തിയിൽ നിന്നും 40,000 ഡോളർ വരെ ഇയാൾ ഈടാക്കിയിരുന്നു. ഇത്തരത്തിൽ എത്തിയവർ പലരും അനുവദിക്കപ്പെട്ട തൊഴിൽ മേഖലയ്ക്ക് പുറത്ത് ഡെലിവറി, നിർമ്മാണം, റസ്റ്റോറന്റ് തുടങ്ങിയ മേഖലകളിൽ നിയമവിരുദ്ധമായി ജോലി ചെയ്യുന്നതായും കണ്ടെത്തി.
2021 ജൂണിൽ ഇയാളുടെ വീട്ടിലും റസ്റ്റോറന്റിലും നടത്തിയ പരിശോധനയിൽ നിർണ്ണായകമായ തെളിവുകൾ പിടിച്ചെടുത്തിരുന്നു. ദീർഘകാലത്തെ നിയമനടപടികൾക്കൊടുവിൽ കഴിഞ്ഞ ഏപ്രിൽ രണ്ടിന് ഇയാൾ കുറ്റം സമ്മതിച്ചു. കാനഡയുടെ ഇമിഗ്രേഷൻ സംവിധാനത്തിന്റെ സുതാര്യത ഉറപ്പാക്കാൻ ഇത്തരം തട്ടിപ്പുകൾക്കെതിരെ കർശന നടപടി തുടരുമെന്ന് CBSA വ്യക്തമാക്കി.
CBSA investigation leads to conviction for counselling immigration misrepresentation in Saskatchewan
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
