ഒന്റാരിയോ; 2026 ഫിഫ ലോകകപ്പ് അവസാന ഘട്ടത്തിലേക്ക് കടക്കുമ്പോൾ ഫ്രാൻസ്, സ്പെയിൻ, ഇംഗ്ലണ്ട്, അർജന്റീന എന്നീ നാല് ശക്തരായ ടീമുകളാണ് സെമിഫൈനലിൽ ഏറ്റുമുട്ടുന്നത്. ഇനി കിരീടത്തിലേക്ക് എത്താൻ ഓരോ ടീമിനും ജയിക്കേണ്ടത് രണ്ട് മത്സരങ്ങൾ മാത്രം. അതിനാൽ ചെറിയ പിഴവ് പോലും പുറത്താകലിലേക്ക് നയിക്കാവുന്ന നിർണായക ഘട്ടമാണ് ഇനി മുന്നിലുള്ളത്. ആദ്യ സെമിയിൽ ഫ്രാൻസ് സ്പെയിനിനെയും രണ്ടാം സെമിയിൽ ഇംഗ്ലണ്ട് അർജന്റീനയെയും നേരിടും.
ഫ്രാൻസ്-സ്പെയിൻ പോരാട്ടം ലോകകപ്പിലെ ഏറ്റവും ശ്രദ്ധേയമായ മത്സരങ്ങളിലൊന്നാകുമെന്നാണ് വിലയിരുത്തൽ. മൊറോക്കോയെ തോൽപ്പിച്ച് സെമിയിലെത്തിയ ഫ്രാൻസിനായി കിലിയൻ എംബാപ്പെ ഇതിനകം എട്ട് ഗോളുകൾ നേടി മികച്ച ഫോമിലാണ്. ഒസ്മാൻ ഡെംബലെ, മൈക്കൽ ഒലിസെ തുടങ്ങിയ താരങ്ങളും ടീമിന്റെ ആക്രമണനിരയ്ക്ക് ശക്തി പകരുന്നു. മറുവശത്ത്, യൂറോ 2024 ജേതാക്കളായ സ്പെയിൻ ഇതുവരെ തോൽവിയറിയാതെ മുന്നേറുകയാണ്. ലാമിൻ യമാൽ തന്റെ കഴിവിനൊത്ത പ്രകടനം പുറത്തെടുക്കുമെന്ന പ്രതീക്ഷയിലാണ് സ്പാനിഷ് ആരാധകർ. 2024 മാർച്ചിന് ശേഷം 36 മത്സരങ്ങളിൽ തോൽവിയറിയാത്ത സ്പെയിൻ മികച്ച ആത്മവിശ്വാസത്തോടെയാണ് സെമിയിൽ ഇറങ്ങുന്നത്.
മറ്റൊരു സെമിയിൽ ലോകചാമ്പ്യൻമാരായ അർജന്റീനയും ഇംഗ്ലണ്ടും ഏറ്റുമുട്ടുമ്പോൾ പഴയ വൈരവും പുതിയ താരപ്പോരാട്ടവുമാണ് ശ്രദ്ധാകേന്ദ്രം. ലോകകപ്പിൽ ഇതുവരെ ഇംഗ്ലണ്ടിനെ നേരിട്ടിട്ടില്ലാത്ത ലയണൽ മെസ്സിക്ക് ഇത് ചരിത്ര നിമിഷമാകും. ടൂർണമെന്റിൽ എട്ട് ഗോളുകളുമായി ഗോൾവേട്ടയിൽ മുന്നിലുള്ള മെസ്സിക്കൊപ്പം എംബാപ്പെയും ഒന്നാം സ്ഥാനത്തുണ്ട്. ഇംഗ്ലണ്ടിനായി ജൂഡ് ബെല്ലിംഗ്ഹാം നോക്കൗട്ട് മത്സരങ്ങളിൽ തുടർച്ചയായി തിളങ്ങിയപ്പോൾ നായകൻ ഹാരി കെയ്നും നിർണായക പ്രകടനമാണ് നടത്തിയത്. സമീപ വർഷങ്ങളിൽ പ്രധാന ടൂർണമെന്റുകളിൽ സ്ഥിരതയാർന്ന പ്രകടനം കാഴ്ചവയ്ക്കുന്ന ഇംഗ്ലണ്ടും കഴിഞ്ഞ നാല് ലോകകപ്പുകളിൽ മൂന്നാം തവണ സെമിയിലെത്തുന്ന അർജന്റീനയും തമ്മിലുള്ള പോരാട്ടം കടുത്ത മത്സരമാകുമെന്നാണ് ഫുട്ബോൾ ലോകത്തിന്റെ പ്രതീക്ഷ.
A clash of European powerhouses in the World Cup semi-final; old rivals face off once again.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
