ഹാലിഫാക്സ്: നോവ സ്കോഷ്യയിൽ ടിക്ക് (ചെള്ള് പോലുള്ള ജീവി) കടിയേറ്റതിനെ തുടർന്ന് യുവതിക്ക് അപൂർവ അലർജി രോഗം ബാധിച്ചു. പിക്ടു കൗണ്ടി സ്വദേശിനിയായ മെലിസ ബെയിൻസിനാണ് ‘ആൽഫ-ഗാൽ സിൻഡ്രോം’ (Alpha-gal Syndrome) എന്ന രോഗം സ്ഥിരീകരിച്ചത്. ഇതോടെ ഇവർക്ക് ചുവന്ന മാംസവും പാലുൽപ്പന്നങ്ങളും ഭക്ഷണത്തിൽ നിന്ന് പൂർണമായി ഒഴിവാക്കേണ്ടി വന്നു. കഴിഞ്ഞ മെയ് മാസത്തിൽ വീട്ടുപറമ്പിൽ തോട്ടപ്പണി ചെയ്യുന്നതിനിടയിലാണ് മെലിസയ്ക്ക് ടിക്കിന്റെ കടിയേറ്റത്. രോഗബാധയെ തുടർന്ന് കടുത്ത ആരോഗ്യപ്രശ്നങ്ങളാണ് ഇവർ നേരിടുന്നത്.
തോളിൽ ടിക്ക് കടിച്ച് രണ്ടാഴ്ചയ്ക്ക് ശേഷമാണ് മെലിസ വിവരം അറിയുന്നത്. തുടർന്ന് സന്ധിവീക്കം, നടക്കാൻ ബുദ്ധിമുട്ട്, കടുത്ത ഛർദ്ദി, ഓർമ്മക്കുറവ് തുടങ്ങിയ ലക്ഷണങ്ങൾ പ്രകടമായി. ആദ്യം സാധാരണ പനിയാണെന്ന് കരുതിയെങ്കിലും ആരോഗ്യനില വഷളായതോടെ ആശുപത്രിയിൽ പ്രവേശിപ്പിച്ചു. തുടർന്ന് നടത്തിയ വിശദമായ പരിശോധനയിലാണ് ഡോക്ടർമാർ അപൂർവ അലർജി രോഗം സ്ഥിരീകരിച്ചത്. ശരീരത്തിൽ ഗുരുതരമായ അലർജി ഉണ്ടാകാൻ സാധ്യതയുള്ളതിനാൽ അടിയന്തര ഘട്ടങ്ങളിൽ ഉപയോഗിക്കാനുള്ള ‘എപിപെൻ’ മരുന്നും ഇവർ ഇപ്പോൾ എപ്പോഴും കൈവശം കരുതുന്നുണ്ട്.
‘ലോൺ സ്റ്റാർ ടിക്ക്’ എന്ന ഇനത്തിൽപ്പെട്ട ജീവികൾ കടിക്കുമ്പോഴാണ് ഈ രോഗം പകരുന്നത്. ഇതിന്റെ ഉമിനീരിലെ ഒരു പ്രത്യേക ഘടകം മനുഷ്യശരീരത്തിൽ പ്രവേശിക്കുന്നതോടെ പ്രതിരോധസംവിധാനം അസാധാരണമായി പ്രതികരിക്കാൻ തുടങ്ങും. ഇതാണ് പിന്നീട് മാംസവും പാലുൽപ്പന്നങ്ങളും കഴിക്കുമ്പോൾ കടുത്ത അലർജിക്ക് കാരണമാകുന്നത്. നിലവിൽ നോവ സ്കോഷ്യയിൽ ഈ രോഗബാധയുടെ കൃത്യമായ കണക്കുകൾ ലഭ്യമല്ലെങ്കിലും, ഇത്തരം ടിക്കുകളുടെ എണ്ണം വർധിക്കുന്നതിനാൽ ആരോഗ്യവകുപ്പ് നിരീക്ഷണം ശക്തമാക്കിയിട്ടുണ്ട്. പുറത്തുപോകുമ്പോൾ കീടനാശിനികൾ ഉപയോഗിക്കുക, ശരീരം മൂടുന്ന വസ്ത്രങ്ങൾ ധരിക്കുക തുടങ്ങിയ മുൻകരുതലുകൾ എടുക്കണമെന്ന് ആരോഗ്യവിദഗ്ധർ ജനങ്ങൾക്ക് നിർദേശം നൽകി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Rare disease following tick bite: Nova Scotia woman unable to consume meat and dairy products.
