വാഷിങ്ടൺ : കുട്ടികളെ ലൈംഗികമായി ചൂഷണം ചെയ്യുന്ന ഉള്ളടക്കങ്ങളുമായി ബന്ധപ്പെട്ട് കേന്ദ്ര സർക്കാർ നോട്ടീസ് അയച്ചതിന് പിന്നാലെ നിലപാട് വ്യക്തമാക്കി മെറ്റാ രംഗത്ത്. ഇന്ത്യ ഉന്നയിച്ച ആശങ്കകളെ അതീവ ഗൗരവത്തോടെയാണ് കാണുന്നതെന്ന് ഫേസ്ബുക്കിന്റെയും ഇൻസ്റ്റാഗ്രാമിന്റെയും മാതൃകമ്പനിയായ മെറ്റാ അറിയിച്ചു. വാഷിംഗ്ടണിൽ പുറത്തിറക്കിയ പ്രസ്താവനയിലാണ് കമ്പനി ഇക്കാര്യം വ്യക്തമാക്കിയത്. എന്നാൽ, തങ്ങളുടെ പ്ലാറ്റ്ഫോമുകൾ വഴി കുട്ടികളെ ചൂഷണം ചെയ്യാൻ ബോധപൂർവ്വം അവസരമൊരുക്കിയെന്ന തരത്തിൽ ഉയർന്നുവന്ന ആരോപണങ്ങൾ മെറ്റാ പൂർണ്ണമായും തള്ളിപ്പറഞ്ഞു.
കുട്ടികൾക്കെതിരെയുള്ള അതിക്രമങ്ങളും ചൂഷണങ്ങളും തടയുന്നതിൽ യാതൊരുവിധ വിട്ടുവീഴ്ചയുമില്ലാത്ത സമീപനമാണ് തങ്ങൾ സ്വീകരിക്കുന്നതെന്ന് മെറ്റാ വിശദീകരിച്ചു. ചട്ടങ്ങൾ ലംഘിച്ച് പ്രവർത്തിച്ച നിരവധി പരസ്യങ്ങളും ഉള്ളടക്കങ്ങളും ഇതിനകം തന്നെ കണ്ടെത്തി നീക്കം ചെയ്തിട്ടുണ്ട്. കുട്ടികളെ ലക്ഷ്യമിട്ട് പ്രവർത്തിച്ചിരുന്ന നാൽപ്പത് ലക്ഷത്തോളം അക്കൗണ്ടുകളാണ് കഴിഞ്ഞ വർഷം മാത്രം മെറ്റാ പ്ലാറ്റ്ഫോമുകളിൽ നിന്ന് തുടച്ചുനീക്കിയത്. സുരക്ഷിതമായ ഒരു ഓൺലൈൻ അന്തരീക്ഷം ഉറപ്പാക്കാൻ അത്യാധുനിക സാങ്കേതികവിദ്യകൾ ഉപയോഗിക്കുന്നുണ്ടെന്നും കമ്പനി അവകാശപ്പെട്ടു.
ഇന്ത്യയിൽ നിന്നുള്ള പരാതികളിലും ചട്ടലംഘനങ്ങളിലും കർശനമായ നിരീക്ഷണവും നടപടികളുമാണ് സ്വീകരിച്ചുപോരുന്നതെന്ന് മെറ്റാ വ്യക്തമാക്കി. കഴിഞ്ഞ ആറ് മാസത്തെ കണക്കുകൾ പരിശോധിച്ചാൽ മാത്രം ഇന്ത്യയിൽ നിന്ന് ലക്ഷത്തിലധികം അക്കൗണ്ടുകളാണ് കമ്പനി റദ്ദാക്കിയത്. കൃത്യമായി പറഞ്ഞാൽ 1,60,000 അക്കൗണ്ടുകൾ ഈ കാലയളവിൽ ഇന്ത്യയിൽ നിന്ന് മാത്രം നീക്കം ചെയ്യപ്പെട്ടു. വരും ദിവസങ്ങളിലും ഇത്തരം നിയമവിരുദ്ധ ഉള്ളടക്കങ്ങൾക്കെതിരെയും അക്കൗണ്ടുകൾക്കെതിരെയും ശക്തമായ നടപടികളുമായി മുന്നോട്ട് പോകുമെന്നും മെറ്റാ ഇന്ത്യൻ സർക്കാരിന് ഉറപ്പ് നൽകി.
Child exploitation ad controversy: Meta denies allegations, says ‘India’s concerns are serious’
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
