ആയത്തുള്ള അലി ഖമനേയിയുടെ സംസ്കാര ചടങ്ങുകൾ ഇറാനിൽ പുരോഗമിക്കുന്നതിനിടെ ഇറാന് നേരെ വീണ്ടും കടുത്ത ഭീഷണിയുമായി യുഎസ് പ്രസിഡൻ്റ് ഡോണാൾഡ് ട്രംപ് രംഗത്തെത്തി. ഇറാനുമായി ഒന്നുകിൽ ഒരു പുതിയ കരാറിലെത്തുമെന്നും അല്ലെങ്കിൽ നിലവിലെ അനിശ്ചിതത്വങ്ങൾക്ക് പൂർണ്ണമായി അറുതി വരുത്തുമെന്നും വാഷിങ്ടണിൽ ട്രംപ് വ്യക്തമാക്കി. അമേരിക്ക ഏതെങ്കിലും രീതിയിൽ വിജയം കൈവരിക്കുമെന്നും, ഈ പണി അവസാനിപ്പിക്കുക എന്നത് തനിക്ക് ഒട്ടും ബുദ്ധിമുട്ടുള്ള കാര്യമല്ലെന്നും ട്രംപ് മുന്നറിയിപ്പ് നൽകി.
താൻ ഒരു യുദ്ധമോ സംഘർഷമോ ആഗ്രഹിക്കുന്നില്ലെന്നും 91 ദശലക്ഷം വരുന്ന ഇറാന്റെ ജനസംഖ്യയെ അത് ദോഷകരമായി ബാധിക്കാതിരിക്കാനാണ് കരാറിന് ശ്രമിക്കുന്നതെന്നും ട്രംപ് പറഞ്ഞു. എന്നാൽ അമേരിക്കയുമായുള്ള സമാധാന കരാറിൻ്റെ ഭാഗമായുള്ള വിട്ടുവീഴ്ചകൾ പാലിക്കാൻ ഇറാൻ തയ്യാറാകണം. “അവരുടെ പാലങ്ങൾ ഒരു മണിക്കൂറിനുള്ളിൽ തകർക്കാൻ നമുക്ക് കഴിയും” എന്ന് പറഞ്ഞ ട്രംപ്, ഇറാനിൽ ഇനി ആണവായുധം ഉണ്ടായിരിക്കില്ലെന്നും അവിടുത്തെ സമ്പുഷ്ടമാക്കിയ യുറേനിയം അമേരിക്കയ്ക്ക് ലഭിക്കാൻ പോകുകയാണെന്നും അവകാശപ്പെട്ടു. എണ്ണവില കുറഞ്ഞത് ചൂണ്ടിക്കാട്ടിയ അദ്ദേഹം ഇറാനിൽ ഭരണമാറ്റമല്ല ലക്ഷ്യമെന്നും കൂട്ടിച്ചേർത്തു.
യുഎസും ഇസ്രായേലും സംയുക്തമായി നടത്തിയ ആക്രമണത്തിൽ കൊല്ലപ്പെട്ട ഖമനേയിയുടെ സംസ്കാര ചടങ്ങിൽ പങ്കെടുത്ത ജനങ്ങളെ ട്രംപ് കടുത്ത ഭാഷയിൽ പരിഹസിച്ചു. ചടങ്ങിൽ നേതാക്കളും ജനങ്ങളും ഒത്തുകൂടിയ സമയത്ത് വേണമെങ്കിൽ ‘ഒറ്റവെടിക്ക് എല്ലാവരെയും ഇല്ലാതാക്കാമായിരുന്നു’ എന്ന് ട്രംപ് പ്രകോപനപരമായി പ്രസ്താവിച്ചു. എന്നാൽ ചർച്ചകൾ നടത്താൻ ആരും ബാക്കിയുണ്ടാവില്ലെന്നതിനാലാണ് അത് ചെയ്യാത്തതെന്നും അദ്ദേഹം പറഞ്ഞു.
ഖമനേയിയുടെ ശവമഞ്ചത്തിന് മുന്നിൽ ആളുകൾ വികാരാധീനരാകുന്നത് തന്നെ അത്ഭുതപ്പെടുത്തിയെന്നും, അത് വെറും മുതലക്കണ്ണീരാകാമെന്നും ട്രംപ് പരിഹസിച്ചു. വെടിനിർത്തലിനും ഇടക്കാല കരാറിനും ശേഷവും ഇറാന് നേരെ ട്രംപ് ഭീഷണി തുടരുന്നത് മേഖലയിൽ ആശങ്ക വർദ്ധിപ്പിക്കുന്നുണ്ട്.
Trump’s ‘final warning’ to Iran during Khamenei’s funeral; Either deal or the game will change!
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
