നികുതി കൂട്ടി പണി കൊടുത്തിട്ടും കാനഡയിലേക്ക് യു.എസ് സഞ്ചാരികളുടെ വൻ ഒഴുക്ക്; വരുമാനത്തിൽ റെക്കോർഡ്

ഒന്റാറിയോ: ലോകപ്രശസ്തമായ നയാഗ്ര വെള്ളച്ചാട്ടത്തിന്റെ കനേഡിയൻ തീരങ്ങളിൽ ഇത്തവണത്തെ അമേരിക്കൻ സ്വാതന്ത്ര്യദിന ആഘോഷങ്ങൾക്ക് മുൻവർഷങ്ങളിലെ ആവേശമില്ലെന്ന് റിപ്പോർട്ടുകൾ. ജൂലൈ നാലിന് സാധാരണയായി നടക്കാറുള്ള കരിമരുന്ന് പ്രയോഗവും സംഗീത വിരുന്നുകളും റെസ്റ്റോറന്റുകളിലെ തിരക്കും ഇത്തവണയും സജീവമായിരുന്നെങ്കിലും, എത്തിയ വിനോദസഞ്ചാരികളിൽ അമേരിക്കൻ ദേശീയ പതാകയേന്തിയവർ കുറവായിരുന്നുവെന്നാണ് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നത്.

യു.എസ്-കാനഡ അതിർത്തിയിലെ ഈ മാറ്റത്തിന് പിന്നിൽ ഇരുരാജ്യങ്ങളും തമ്മിലുള്ള നിലവിലെ വ്യാപാര തർക്കങ്ങളാണെന്ന് പ്രദേശവാസികൾ ചൂണ്ടിക്കാണിക്കുന്നു.
കഴിഞ്ഞ വർഷം കനേഡിയൻ ഉൽപന്നങ്ങൾക്ക് മേൽ വാഷിംഗ്ടൺ ഏർപ്പെടുത്തിയ പുതിയ നികുതി നിരക്കുകളാണ് ഇരുരാജ്യങ്ങളിലെയും ജനങ്ങൾക്കിടയിൽ അസ്വാരസ്യങ്ങൾക്ക് കാരണമായത്. ഇതേസമയം തന്നെ നടന്ന ലോകകപ്പ് ഫുട്ബോളിൽ മൊറോക്കോയ്‌ക്കെതിരായ കാനഡയുടെ മത്സരത്തിന് പിന്തുണ പ്രഖ്യാപിച്ച്, കാനഡയുടെ ദേശീയ നിറങ്ങളായ ചുവപ്പും വെള്ളയും വസ്ത്രങ്ങളണിഞ്ഞാണ് ഭൂരിഭാഗം പേരും നയാഗ്രയിലെത്തിയത്.

മുൻവർഷങ്ങളിൽ ഇരുരാജ്യങ്ങളിലെയും പൗരന്മാർ ഒരുമിച്ച് സൗഹൃദത്തോടെ ആഘോഷിച്ചിരുന്ന അന്തരീക്ഷത്തിൽ വലിയ മാറ്റം വന്നിട്ടുണ്ടെന്ന് കഴിഞ്ഞ അഞ്ച് വർഷമായി നയാഗ്രയിൽ താമസിക്കുന്ന ജാസിൽ ഷെയ്ഖ് വ്യക്തമാക്കുന്നു. വ്യാപാര തർക്കങ്ങൾ പ്രാദേശിക ബിസിനസുകളെ ബാധിക്കുമെന്ന ആശങ്കയും കനേഡിയൻ ജനതയ്ക്കുണ്ട്.

ദേശീയതയുടെ പേരിൽ അതിർത്തികളിൽ പ്രകടമായ തർക്കങ്ങളുണ്ടെങ്കിലും നയാഗ്രയിലെത്തുന്ന അമേരിക്കൻ സഞ്ചാരികളുടെ എണ്ണത്തിൽ കുറവുണ്ടായിട്ടില്ലെന്നാണ് ഔദ്യോഗിക കണക്കുകൾ സൂചിപ്പിക്കുന്നത്. കഴിഞ്ഞ വർഷത്തെ അപേക്ഷിച്ച് യു.എസിൽ നിന്നുള്ള സഞ്ചാരികളുടെ വരവ് വർധിച്ചതായി ‘നയാഗ്ര ഫാൾസ് ടൂറിസം’ ഇടക്കാല സി.ഇ.ഒ ആദം സ്റ്റൈൽസ് അറിയിച്ചു. മുൻവർഷങ്ങളിൽ നേരിയ ഇടിവ് രേഖപ്പെടുത്തിയ അതിർത്തി കടന്നുള്ള യാത്രകളിൽ ഇത്തവണ വലിയ പുരോഗതിയാണ് ഉണ്ടായിട്ടുള്ളത്. ഹോട്ടൽ ബുക്കിംഗുകളിലും ഈ വർധനവ് പ്രകടമാണ്.

സെൻട്രൽ ബ്യൂറോയായ ‘സ്റ്റാറ്റിസ്റ്റിക്സ് കാനഡ’യുടെ 2026 മേയിലെ കണക്കുകൾ പ്രകാരം 13 ലക്ഷത്തോളം അമേരിക്കൻ പൗരന്മാരാണ് കാനഡ സന്ദർശിച്ചത്. ഇത് മുൻവർഷത്തെ അപേക്ഷിച്ച് 4.4 ശതമാനം കൂടുതലാണ്. 2025 ഫെബ്രുവരി മുതൽ പ്രകടമായ കുറവിന് ശേഷമുള്ള തുടർച്ചയായ മൂന്നാം വർഷത്തെ വളർച്ചയാണിത്.

കാനഡയിലെത്തുന്ന സഞ്ചാരികൾക്ക് പൂർണ്ണമായ സുരക്ഷിതത്വവും മികച്ച സ്വീകരണവും ലഭിക്കുമെന്ന ഉറപ്പാണ് ഈ പോസിറ്റീവ് മാറ്റത്തിന് പിന്നിലെന്നും ടൂറിസം വകുപ്പ് അധികൃതർ വ്യക്തമാക്കുന്നു. കഴിഞ്ഞ വർഷങ്ങളിൽ യു.എസ് സഞ്ചാരികളുടെ എണ്ണത്തിൽ മൂന്ന് ശതമാനത്തോളം കുറവുണ്ടായ നയാഗ്ര പാർക്ക്സ് റീജിയണിലും ഇപ്പോൾ സ്ഥിതിഗതികൾ ശാന്തമാകുകയാണ്. നികുതി തർക്കങ്ങൾ ഇപ്പോഴും നിലനിൽക്കുന്നുണ്ടെങ്കിലും ഇരുരാജ്യങ്ങളും തമ്മിലുള്ള ശത്രുത കുറയുന്നതായാണ് സൂചനയെന്ന് നയാഗ്ര പാർക്ക്സ് കമ്മീഷനിലെ ഡേവിഡ് ആഡംസ് പ്രതികരിച്ചു.

മേയ് മാസത്തിലെ കണക്കുകൾ പ്രകാരം അമേരിക്കൻ സന്ദർശകരിൽ നിന്നുള്ള ഇടപാടുകളിൽ 25 ശതമാനവും വരുമാനത്തിൽ 30 ശതമാനവും വർധനവാണ് രേഖപ്പെടുത്തിയത്. ജൂൺ മാസത്തിലും ഈ ട്രെൻഡ് തുടർന്നതിനാൽ ജൂലൈ നാലിലെ ആഘോഷങ്ങളിലും വലിയ വരുമാനമാണ് അധികൃതർ പ്രതീക്ഷിക്കുന്നത്. അതിർത്തി കടന്ന് ആഘോഷങ്ങൾക്കെത്തിയ ഫിലാഡൽഫിയ സ്വദേശിയായ ജോ കാപ്രി ഉൾപ്പെടെയുള്ള അമേരിക്കൻ സഞ്ചാരികളും സമ്മിശ്ര പ്രതികരണമാണ് പങ്കുവെച്ചത്.

മുൻവർഷങ്ങളിലെ അത്ര വലിയ ‘അമേരിക്കൻ ആവേശം’ അതിർത്തിയിൽ ദൃശ്യമായില്ലെങ്കിലും, കനേഡിയൻ ജനതയുടെ ആതിഥ്യമര്യാദയിൽ കുറവൊന്നുമില്ലെന്ന് ഇവർ സാക്ഷ്യപ്പെടുത്തുന്നു. നയതന്ത്ര തലത്തിലെ തർക്കങ്ങൾ തങ്ങളെ ബാധിക്കുന്നില്ലെന്നും അയൽരാജ്യങ്ങൾ തമ്മിലുള്ള ശക്തമായ വ്യാപാര-സൗഹൃദ ബന്ധം തുടരുമെന്നാണ് പ്രതീക്ഷിക്കുന്നതെന്നും സഞ്ചാരികൾ കൂട്ടിച്ചേർക്കുന്നു.

Massive influx of US travelers to Canada despite tax hikes; record revenue.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt