മോൺട്രിയൽ: മോൺട്രിയൽ നോർത്ത് ഷോറിലുള്ള റോസ്മെയർ ഹൈസ്കൂളിൽ ഉണ്ടായ ഗുരുതരമായ സുരക്ഷാവീഴ്ചയെത്തുടർന്ന് ആയിരത്തിലധികം രക്ഷിതാക്കളുടെ സോഷ്യൽ ഇൻഷുറൻസ് നമ്പറുകൾ (SIN) ഉൾപ്പെടെയുള്ള സ്വകാര്യ വിവരങ്ങൾ പുറത്തായി. സ്കൂളിന്റെ നിയന്ത്രണചുമതലയുള്ള ‘സാർ വിൽഫ്രിഡ് ലോറിയർ സ്കൂൾ ബോർഡ്’ അയച്ച ഒരു ഔദ്യോഗിക ഇമെയിലിനൊപ്പം അബദ്ധത്തിൽ എക്സൽ ഫയൽ കൂടി ഉൾപ്പെട്ടതാണ് വിവരങ്ങൾ ചോരാൻ കാരണമായത്. പുതിയ അധ്യയനവർഷത്തെ വിവരങ്ങൾ കൈമാറാനായി വ്യാഴാഴ്ച വൈകിട്ട് അയച്ച ഇമെയിലിലാണ് ഈ സുരക്ഷാവീഴ്ച സംഭവിച്ചത്.
വാർത്ത പുറത്തുവന്നതിനു പിന്നാലെ സ്കൂൾ അധികൃതർ തിരുത്തൽ നടപടികൾ തുടങ്ങി. ആദ്യത്തെ ഇമെയിൽ അയച്ച് 45 മിനിറ്റുകൾക്കകം രണ്ടാമതൊരു അടിയന്തര സന്ദേശം രക്ഷിതാക്കൾക്ക് ലഭിച്ചു. വന്ന ഇമെയിൽ ആരും തുറക്കരുതെന്നും അത് ഉടൻ തന്നെ ഡിലീറ്റ് ചെയ്യണമെന്നുമായിരുന്നു ഇതിലെ നിർദേശം. തുടർന്ന് രാത്രിയോടെ മൂന്നാമതൊരു ഇമെയിൽ കൂടി ബോർഡ് അയച്ചു. തങ്ങൾക്ക് ലഭിച്ച ഫയൽ തുറന്നിട്ടില്ലെന്നും അത് നശിപ്പിച്ചു കളഞ്ഞുവെന്നും വ്യക്തമാക്കുന്ന ഒരു ഫോം പൂരിപ്പിച്ചു നൽകാനാണ് ഇതിൽ ആവശ്യപ്പെട്ടത്. വെള്ളിയാഴ്ച വൈകിട്ട് നാലിനകം ഈ ഫോം സമർപ്പിക്കാൻ രക്ഷിതാക്കൾക്ക് സമയം നൽകിയിരുന്നു. നിലവിൽ സംഭവത്തെക്കുറിച്ച് ക്യുബെക്കിന്റെ സ്വകാര്യതാ സംരക്ഷണ ഏജൻസി അന്വേഷണം ആരംഭിച്ചിട്ടുണ്ട്.
എന്നിരുന്നാലും, തങ്ങളുടെ വ്യക്തിഗത വിവരങ്ങൾ പരസ്യമായതിൽ രക്ഷിതാക്കൾ കടുത്ത ആശങ്കയിലാണ്. സോഷ്യൽ ഇൻഷുറൻസ് നമ്പറും ജനനത്തീയതിയും പുറത്തായതു വഴി ഐഡന്റിറ്റി മോഷണം നടക്കാനുള്ള സാധ്യതയുണ്ടെന്ന് ഇവർ ഭയപ്പെടുന്നു. സുരക്ഷാവീഴ്ചയുണ്ടായ ശേഷം സ്വീകരിക്കേണ്ട മുൻകരുതലുകളെക്കുറിച്ച് സ്കൂൾ ബോർഡിന്റെ ഭാഗത്തുനിന്ന് വ്യക്തമായ മാർഗനിർദേശങ്ങൾ ലഭിച്ചില്ലെന്നും, അടിയന്തര സന്ദേശം അയക്കാൻ വൈകിയെന്നും രക്ഷിതാക്കൾ ആരോപിക്കുന്നു. ചിലർ ഇതിനകം തന്നെ ക്യുബെക്ക് സ്വകാര്യതാ കമ്മീഷണർക്കും ഓംബുഡ്സ്മാനും പരാതി നൽകിയിട്ടുണ്ട്. ഈ സംഭവം ക്യുബെക്കിലെ വിദ്യാഭ്യാസ സ്ഥാപനങ്ങളിലെ വിവര സുരക്ഷയെക്കുറിച്ചുള്ള ചർച്ചകൾക്ക് വഴിതുറന്നിരിക്കുകയാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Massive data breach at Montreal school: Private information of over 1,000 parents leaked.
