ന്യൂയോർക്ക്: ലോകപ്രശസ്തമായ ന്യൂയോർക്ക് എമ്പയർ സ്റ്റേറ്റ് ബിൽഡിങ്ങിന്റെ ഏറ്റവും മുകളിലെ ആന്റിനയിൽ അനുമതിയില്ലാതെ കയറി റഷ്യൻ ദമ്പതികളുടെ സാഹസിക പ്രകടനം. ചൊവ്വാഴ്ച ഉച്ചയ്ക്ക് പന്ത്രണ്ട് മണിയോടെയായിരുന്നു മാൻഹട്ടനിലെ 1,454 അടി ഉയരമുള്ള കെട്ടിടത്തിന് മുകളിൽ ഇവർ കയറിയത്. യാതൊരുവിധ സുരക്ഷാ മുൻകരുതലുകളും കൂടാതെ കെട്ടിടത്തിന്റെ അറ്റത്തു നിലയുറപ്പിച്ച ഇവർ, ലോകസമാധാനം ആഹ്വാനം ചെയ്യുന്ന ബാനറും ഇവിടെ ഉയർത്തി. സംഭവത്തിന് ശേഷം താഴെയിറങ്ങിയ ഇവരെ ന്യൂയോർക്ക് പൊലീസ് കസ്റ്റഡിയിലെടുത്തു.
കറുത്ത വസ്ത്രവും മാസ്കും ധരിച്ചെത്തിയ ഇവർ ‘when the power of love beats the love of power the world knows peace’ എന്ന വാചകം എഴുതിയ ബാനറാണ് കെട്ടിടത്തിന് മുകളിൽ സ്ഥാപിച്ചത്. തുടർന്ന് ഉച്ചയ്ക്ക് പന്ത്രണ്ടരയോടെ താഴേക്ക് ഇറങ്ങിയ ഇരുവരും, കെട്ടിടത്തിന്റെ വീതിയുള്ള മറ്റൊരു ഭാഗത്ത് വെച്ച് പ്രണയാഭ്യർത്ഥന നടത്തുകയും സെൽഫികൾ എടുക്കുകയും ചെയ്തു. കനത്ത സുരക്ഷയുള്ള കെട്ടിടത്തിൽ സുരക്ഷാ ജീവനക്കാരുടെ കണ്ണ് വെട്ടിച്ച് ഇവർ എങ്ങനെ മുകളിൽ എത്തി എന്നതിനെക്കുറിച്ച് പൊലീസ് അന്വേഷണം ആരംഭിച്ചിട്ടുണ്ട്.
പ്രശസ്ത റഷ്യൻ ദമ്പതികളായ ആഞ്ചല നിക്കോളാവ്, ഇവാൻ ബീർകസ് എന്നിവരാണ് പിടിയിലായത്. നെറ്റ്ഫ്ലിക്സ് ഡോക്യുമെന്ററിയിലൂടെ ലോകമെമ്പാടും ശ്രദ്ധേയരായ ഇവ മുൻപും മലേഷ്യയിലെ മെർദേക്ക 118, ചൈനയിലെ ഗോൾഡിൻ ഫിനാൻസ് തുടങ്ങിയ വമ്പൻ കെട്ടിടങ്ങൾക്ക് മുകളിൽ അനുമതിയില്ലാതെ കയറി നിയമനടപടികൾ നേരിട്ടിട്ടുള്ളവരാണ്. അതിക്രമിച്ചു കയറൽ, സുരക്ഷാ ലംഘനം തുടങ്ങിയ കുറ്റങ്ങൾ ചുമത്തിയാണ് നിലവിൽ ന്യൂയോർക്ക് പൊലീസ് ഇവർക്കെതിരെ കേസെടുത്തിരിക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Bypassing security to reach a height of 1,454 feet; a Russian couple's romantic proposal atop the Empire State Building.
