ക്യുബെക്ക്: ഒന്റാറിയോ, ക്യുബെക്ക് പ്രവിശ്യകളിൽ കടുത്ത ഉഷ്ണതരംഗം അനുഭവപ്പെടുന്ന സാഹചര്യത്തിൽ, നദികളിലും തടാകങ്ങളിലും ഇറങ്ങുന്നവർ അതീവ ജാഗ്രത പാലിക്കണമെന്ന് കാനഡയിലെ സുരക്ഷാ വിദഗ്ധർ മുന്നറിയിപ്പ് നൽകി. ഈ ആഴ്ച ഒന്റാറിയോയിലും ക്യുബെക്കിലും താപനില 30 ഡിഗ്രി സെൽഷ്യസിന് മുകളിൽ (mid-30s) രേഖപ്പെടുത്തുമെന്നാണ് പ്രതീക്ഷിക്കുന്നത്. യൂറോപ്പിൽ അടുത്തിടെയുണ്ടായ കടുത്ത ഉഷ്ണതരംഗത്തിനിടെ ഫ്രാൻസിൽ നാൽപ്പതോളം പേരും തുടർന്ന് ജർമ്മനിയിലും നിരവധി ആളുകൾ മുങ്ങിമരിച്ച പശ്ചാത്തലത്തിലാണ് കാനഡയിലെ ലൈഫ് സേവിങ് സൊസൈറ്റികൾ ജാഗ്രതാ നിർദ്ദേശം പുറപ്പെടുവിച്ചത്. സ്വിമ്മിങ് പൂളുകളിൽ നന്നായി നീന്താൻ അറിയാവുന്നവർ പോലും നദികളിലെ ഒഴുക്കും മറ്റ് അപകടങ്ങളും തിരിച്ചറിയാതെ വെള്ളത്തിൽ ഇറങ്ങരുതെന്ന് ലൈഫ് സേവിങ് സൊസൈറ്റി ഓഫ് ബിസി & യുകോൺ എക്സിക്യൂട്ടീവ് ഡയറക്ടർ ലെനിയ ഗ്രേസ് വ്യക്തമാക്കി.
കാനഡയിൽ ഈ വർഷം ജൂൺ 29 വരെയുള്ള കണക്കനുസരിച്ച് 92 മുങ്ങിമരണങ്ങൾ റിപ്പോർട്ട് ചെയ്തിട്ടുണ്ടെന്ന് ലെനിയ ഗ്രേസ് അറിയിച്ചു. ഇത് കഴിഞ്ഞ വർഷത്തെ അപേക്ഷിച്ച് നാല് മരണങ്ങൾ കുറവാണെങ്കിലും ബ്രിട്ടീഷ് കൊളംബിയ, ഒന്റാറിയോ എന്നീ പ്രവിശ്യകളിൽ മരണസംഖ്യ ഉയരുകയാണെന്നും അവർ ചൂണ്ടിക്കാട്ടി. ലൈഫ് ഗാർഡുകളുടെ സേവനമുള്ള ഇടങ്ങളിൽ മാത്രം നീന്താൻ ഇറങ്ങുക, കുട്ടികളെ കൈയെത്തുന്ന ദൂരത്ത് മാത്രം നിർത്തുക, ബോട്ടിങ് നടത്തുന്നവരും നീന്തൽ അറിയാത്തവരും ലൈഫ് ജാക്കറ്റ് ധരിക്കുക എന്നിവ പാലിക്കണമെന്ന് അവർ നിർദ്ദേശിച്ചു. മോൺട്രിയാലിലെ വെർഡൻ ബീച്ചിന് സമീപം ഒരു വർഷത്തിനിടെ നാലാമത്തെ മുങ്ങിമരണം റിപ്പോർട്ട് ചെയ്തതോടെ നഗരങ്ങളിലെ ജലാശയങ്ങളിൽ കൂടുതൽ സുരക്ഷിതമായ സൗകര്യങ്ങൾ ഒരുക്കണമെന്ന് പ്രാദേശിക അധികാരികളും ആവശ്യപ്പെട്ടിട്ടുണ്ട്.
ആഗോളതലത്തിൽ ചൂട് വർദ്ധിക്കുന്ന സാഹചര്യത്തിൽ നഗരങ്ങളിൽ സൗജന്യവും സുരക്ഷിതവുമായ നീന്തൽ കേന്ദ്രങ്ങൾ ഒരുക്കേണ്ടത് കാലാവസ്ഥാ വ്യതിയാനത്തെ പ്രതിരോധിക്കാൻ അത്യാവശ്യമാണെന്ന് ‘സ്വിം ഡ്രിങ്ക് ഫിഷ്’ സംഘടനയുടെ വൈസ് പ്രസിഡന്റ് ഗ്രിഗറി ഫോർഡ് വിലയിരുത്തി. നിലവിൽ കാനഡയിലെ 13 ബീച്ചുകൾ മാത്രമാണ് ഇവരുടെ സുരക്ഷാ മാനദണ്ഡങ്ങൾ പൂർണ്ണമായി പാലിക്കുന്നത്. സുരക്ഷിതമായ നീന്തൽ അടിസ്ഥാന സൗകര്യങ്ങൾ വർദ്ധിപ്പിക്കുന്നതിനായി അടുത്ത വർഷം ഒട്ടാവ നഗരസഭയുടെയും ഗാറ്റിനോ നഗരസഭയുടെയും നാഷണൽ കാപിറ്റൽ കമ്മീഷന്റെയും സഹകരണത്തോടെ ‘ഗ്ലോബൽ സ്വിമ്മബിൾ സിറ്റീസ് സമ്മിറ്റ്’ സംഘടിപ്പിക്കുമെന്ന് സ്വിമ്മബിൾ സിറ്റീസ് ഇൻഫ്രാസ്ട്രക്ചർ കോ-ഫൗണ്ടർ മാത്യു സൈക്സ് അറിയിച്ചു. കാനഡയിൽ നിന്ന് ഈ ചാർട്ടറിൽ ആദ്യമായി ഒപ്പുവെച്ചത് ഒട്ടാവ നഗരമാണ്.
ജലാശയങ്ങളിലെ ബാക്ടീരിയകളുടെയും പായലുകളുടെയും (Blue-green algae) സാന്നിധ്യം ആരോഗ്യത്തിന് വലിയ ഭീഷണിയാണെന്ന് സുർഫ്രൈഡർ സൗത്ത് വാൻകൂവർ ഐലൻഡിന്റെ ബ്ലൂ വാട്ടർ ടാസ്ക് ഫോഴ്സ് പ്രോഗ്രാം ലീഡ് ലിൻ വാറം വ്യക്തമാക്കി. കനത്ത മഴയ്ക്ക് ശേഷവും വെള്ളം കെട്ടിക്കിടക്കുന്ന സാഹചര്യത്തിലും ജലാശയങ്ങൾ നീന്താൻ അനുയോജ്യമല്ലാതാകാറുണ്ട്. ഇതിന് സാങ്കേതിക പരിഹാരമായി വാൻകൂവർ ഐലൻഡിലെ കാപിറ്റൽ റീജിയണൽ ഡിസ്ട്രിക്റ്റ്, എൽക്/ബീവർ തടാകത്തിലെ ഓക്സിജന്റെ അളവ് വർദ്ധിപ്പിച്ച് പായൽ ശല്യം കുറയ്ക്കാനായി 2023-ൽ 16 ലക്ഷം ഡോളറിന്റെ പദ്ധതി നടപ്പിലാക്കിയിട്ടുണ്ടെന്നും അവർ അറിയിച്ചു. കടുത്ത ചൂടിൽ നീന്തുമ്പോൾ ശരീരം പെട്ടെന്ന് തളർന്നുപോകാൻ സാധ്യതയുള്ളതിനാൽ തീരത്തുനിന്ന് കൂടുതൽ ദൂരത്തേക്ക് നീന്തരുതെന്നും അവർ മുന്നറിയിപ്പ് നൽകി.
Severe heat wave in Canada: Warning to those entering bodies of water to be careful
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
