ടെഹ്റാൻ : യുഎസ്-ഇസ്രായേൽ വ്യോമാക്രമണത്തിൽ കൊല്ലപ്പെട്ട മുൻ പരമോന്നത നേതാവ് ആയത്തുള്ള അലി ഖമേനിയുടെ സംസ്കാര ചടങ്ങുകൾക്കായി തങ്ങളുടെ ചരിത്രത്തിലെ ഏറ്റവും വലിയ ഔദ്യോഗിക ഒരുക്കങ്ങളുമായി ഇറാൻ. ഇറാന്റെയും അയൽരാജ്യമായ ഇറാഖിന്റെയും വിവിധ നഗരങ്ങളിലായി ആറ് ദിവസം നീണ്ടുനിൽക്കുന്ന വിപുലമായ വിടവാങ്ങൽ ചടങ്ങുകളാണ് ആസൂത്രണം ചെയ്തിരിക്കുന്നത്. വരുന്ന ശനിയാഴ്ച ടെഹ്റാനിലെ ഗ്രാൻഡ് മൊസല്ല പ്രാർത്ഥനാ സമുച്ചയത്തിൽ ഭൗതികശരീരം പൊതുദർശനത്തിന് വെക്കുന്നതോടെ ചടങ്ങുകൾക്ക് തുടക്കമാകും. തുടർന്ന് തിങ്കളാഴ്ച ടെഹ്റാൻ നഗരവീഥികളിലൂടെ വിലാപയാത്ര നടക്കും. ജൂലൈ ഒമ്പതിന് ഇറാന്റെ വടക്കുകിഴക്കൻ നഗരമായ മഷാദിൽ ഖമേനിയുടെ ജന്മനാട്ടിലാണ് ഭൗതികശരീരം ഔദ്യോഗിക ബഹുമതികളോടെ സംസ്കരിക്കുക.
ഇറാനിൽ നിന്നും വിദേശത്തുനിന്നുമായി ഏകദേശം ഒന്നര മുതൽ രണ്ട് കോടി വരെ (15-20 മില്യൺ) ജനങ്ങൾ വിലാപയാത്രയിലും വിടവാങ്ങൽ ചടങ്ങുകളിലും പങ്കെടുക്കുമെന്നാണ് അധികൃതർ കണക്കാക്കുന്നത്. ജൂലൈ ഏഴിന് പുണ്യനഗരമായ കോമിലേക്ക് കൊണ്ടുപോകുന്ന ഭൗതികശരീരം, അവിടെയുള്ള ചടങ്ങുകൾക്ക് ശേഷം ഇറാഖിലെ പ്രശസ്ത തീർത്ഥാടന കേന്ദ്രങ്ങളായ നജാഫ്, കർബല എന്നീ നഗരങ്ങളിലും എത്തിക്കും. ചരിത്രപരമായ ഈ വൻ ജനമുന്നേറ്റം മുൻനിർത്തി രാജ്യത്തുടനീളം കനത്ത സുരക്ഷയും പൊലീസ് അതീവ ജാഗ്രതാ നിർദ്ദേശവും പുറപ്പെടുവിച്ചിട്ടുണ്ട്. വരും ദിവസങ്ങളിൽ മിഡിൽ ഈസ്റ്റിന്റെ ഭൗമരാഷ്ട്രീയത്തിൽ വലിയ ചലനങ്ങൾ സൃഷ്ടിക്കാൻ പോകുന്ന ഒന്നായി ഈ വിലാപയാത്ര മാറും.
അലി ഖമേനിയുടെ സംസ്കാര ചടങ്ങുകളിൽ പങ്കെടുക്കാൻ ഇന്ത്യ ഉൾപ്പെടെയുള്ള പ്രമുഖ രാജ്യങ്ങൾക്ക് ഇറാൻ ഔദ്യോഗികമായി ക്ഷണം അയച്ചിട്ടുണ്ട്. ഇന്ത്യ, റഷ്യ, ചൈന, പാകിസ്ഥാൻ, ജോർജ്ജിയ, ക്യൂബ എന്നിവരുൾപ്പെടെ മുപ്പതിലധികം രാജ്യങ്ങളിൽ നിന്നുള്ള മുതിർന്ന ഉദ്യോഗസ്ഥരും പ്രതിനിധികളും ചടങ്ങിൽ പങ്കാളികളാകും. കൂടാതെ 90 രാജ്യങ്ങളിൽ നിന്നുള്ള പ്രമുഖ മതനേതാക്കളും സംസ്കാര ചടങ്ങുകളുടെ ഭാഗമാകും. യുഎസ്-ഇസ്രായേൽ യുദ്ധം അവസാനിപ്പിക്കാനുള്ള നയതന്ത്ര ശ്രമങ്ങൾക്ക് മധ്യസ്ഥത വഹിക്കുന്ന പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ് ചടങ്ങിൽ നേരിട്ട് പങ്കെടുക്കുമെന്ന് പാക് പാർലമെന്റിനെ ഔദ്യോഗികമായി അറിയിച്ചിട്ടുണ്ട്.
Ayatollah Ali Khamenei’s funeral on 9th; Iran prepares for biggest ceremony in history
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
