ഒന്നിനൊന്ന് മെച്ചപ്പെട്ട ഗ്രൂപ്പ് ഘട്ട മത്സരങ്ങളുടെ ആവേശകരമായ അന്ത്യത്തിന് പിന്നാലെ, ഫിഫ ലോകകപ്പിലെ റൗണ്ട് ഓഫ് 32 പോരാട്ടങ്ങളുടെ പൂർണ്ണമായ ലൈനപ്പായി. ഞായറാഴ്ച നടന്ന മത്സരത്തിൽ ഓസ്ട്രിയയും അൾജീരിയയും തമ്മിൽ മൂന്ന് ഗോളുകൾ വീതം നേടി സമനിലയിൽ പിരിഞ്ഞ ആവേശപ്പോരാട്ടമാണ് റൗണ്ട് ഓഫ് 32-ലേക്ക് യോഗ്യത നേടുന്ന അവസാന ടീമുകളെ നിശ്ചയിച്ചത്. റാൽഫ് റാംഗ്നിക്കിന്റെയും വ്ലാഡിമിർ പെറ്റ്കോവിച്ചിന്റെയും ടീമുകൾ കാഴ്ചവെച്ച ഈ തകർപ്പൻ പ്രകടനം ഇരുപക്ഷത്തെയും ടൂർണമെന്റിൽ സജീവമായി നിലനിർത്താൻ സഹായിച്ചു. ജൂൺ 29 മുതൽ ടൂർണമെന്റിന്റെ നോക്കൗട്ട് ഘട്ട മത്സരങ്ങൾക്ക് തുടക്കമാകും.
ലയണൽ മെസ്സിയുടെ നേതൃത്വത്തിലുള്ള അർജന്റീന ലോകകപ്പിൽ തങ്ങളുടെ തകർപ്പൻ കുതിപ്പ് തുടർന്ന് നോക്കൗട്ടിലേക്ക് പ്രവേശിച്ചു. ആർലിംഗ്ടണിലെ ഡാളസ് സ്റ്റേഡിയത്തിൽ നടന്ന മത്സരത്തിൽ ജോർദാനെ ഒന്നിനെതിരെ മൂന്ന് ഗോളുകൾക്ക് (3-1) പരാജയപ്പെടുത്തിയാണ് അർജന്റീന റൗണ്ട് ഓഫ് 32 യോഗ്യത ഉറപ്പാക്കിയത്. ഈ മത്സരഫലം കൂടിയായതോടെ നോക്കൗട്ട് ഘട്ടത്തിന്റെ ചിത്രം വ്യക്തമായി. ജൂലൈ 4-ന് ഇന്ത്യൻ സമയം പുലർച്ചെ 3:30-ന് നടക്കുന്ന മത്സരത്തിൽ കേപ് വെർദെയാണ് അർജന്റീനയുടെ എതിരാളികൾ.
റൗണ്ട് ഓഫ് 32 പോരാട്ടങ്ങളിൽ ഏറ്റവും കൂടുതൽ ശ്രദ്ധ ആകർഷിക്കുന്ന രണ്ട് മത്സരങ്ങളാണ് ബ്രസീൽ വേഴ്സസ് ജപ്പാൻ, നെതർലൻഡ്സ് വേഴ്സസ് മൊറോക്കോ എന്നിവ. കളിക്കളത്തിൽ മികച്ച ഊർജ്ജം പ്രകടിപ്പിക്കുന്ന ഏഷ്യൻ കരുത്തരായ ജപ്പാന്റെ കളി ശൈലി, ബ്രസീലിന്റെ ആക്രമണ നിരയ്ക്ക് വലിയ വെല്ലുവിളി ഉയർത്താൻ സാധ്യതയുണ്ട്. ജൂൺ 29-നാണ് ഈ ആവേശപ്പോരാട്ടം നടക്കുക. രണ്ടാമത്തെ പ്രധാന മത്സരത്തിൽ മികച്ച ആക്രമണ ശൈലിയുള്ള ഡച്ച് ടീമും ഈ ലോകകപ്പിൽ മികച്ച ഫോമിലുള്ള അഷ്റഫ് ഹക്കിമിയുടെ നേതൃത്വത്തിൽ എത്തുന്ന മൊറോക്കോയും തമ്മിൽ ഏറ്റുമുട്ടും.
ക്രിസ്റ്റ്യാനോ റൊണാൾഡോയുടെ പോർച്ചുഗൽ ജൂലൈ 3-ന് ടൊറന്റോയിൽ വെച്ച് കരുത്തരായ ക്രോയേഷ്യയെ നേരിടും. ഇന്ത്യൻ സമയം പുലർച്ചെ 4:30-നാണ് ഈ മത്സരം ക്രമീകരിച്ചിരിക്കുന്നത്. പ്രീ ക്വാർട്ടർ ലക്ഷ്യമിട്ട് വമ്പൻ ടീമുകൾ നേർക്കുനേർ വരുമ്പോൾ കടുത്ത പോരാട്ടങ്ങൾക്കാണ് നോക്കൗട്ട് സ്റ്റേജ് വേദിയാകുന്നത്. ജർമ്മനി പരാഗ്വെയെയും ഫ്രാൻസ് സ്വീഡനെയും ഇംഗ്ലണ്ട് ഡിആർ കോംഗോയെയും ഈ ഘട്ടത്തിൽ നേരിടുന്നുണ്ട്.
ജൂൺ 29-ന് പുലർച്ചെ 12:30-ന് നടക്കുന്ന ദക്ഷിണാഫ്രിക്ക വേഴ്സസ് കാനഡ മത്സരത്തോടെയാണ് റൗണ്ട് ഓഫ് 32 പോരാട്ടങ്ങൾക്ക് തുടക്കമാകുന്നത്. അന്നുതന്നെ രാത്രി 10:30-ന് ബ്രസീൽ – ജപ്പാൻ മത്സരവും നടക്കും. തുടർന്ന് ജൂൺ 30-ന് ജർമ്മനി – പരാഗ്വേ (പുലർച്ചെ 2:30), നെതർലൻഡ്സ് – മൊറോക്കോ (പുലർച്ചെ 6:30), ഐവറി കോസ്റ്റ് – നോർവേ (രാത്രി 10:30) എന്നീ മത്സരങ്ങളും ഷെഡ്യൂൾ ചെയ്തിട്ടുണ്ട്. ജൂലൈ 4-ന് രാവിലെ 7:00-ന് നടക്കുന്ന കൊളംബിയ – ഘാന മത്സരത്തോടെ റൗണ്ട് ഓഫ് 32 പോരാട്ടങ്ങൾക്ക് സമാപനമാകും.
Giants face off to reach pre-quarters; World Cup Round of 32 lineup announced
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
