കാനഡയിൽ ടിക്ക് പ്രാണികളുടെ എണ്ണത്തിൽ വൻ വർധനവ്; ഏറ്റവും കൂടുതൽ ഭീഷണി ഈ പ്രവിശ്യകളിൽ; മുന്നറിയിപ്പുമായി ആരോഗ്യവകുപ്പ്

ഒട്ടാവ: കാനഡയിൽ ലൈം രോഗം പരത്തുന്ന ‘ടിക്ക്’ (Tick) പ്രാണികളുടെ എണ്ണത്തിലും അതുവഴിയുണ്ടാകുന്ന രോഗബാധയിലും ഈ വർഷം വൻ വർധനവ് രേഖപ്പെടുത്തി. രാജ്യത്തെ ടിക്ക് സാന്നിധ്യം നിരീക്ഷിക്കുന്ന ഔദ്യോഗിക പോർട്ടലായ ‘eTick.ca’ പുറത്തുവിട്ട ഏറ്റവും പുതിയ കണക്കുകൾ പ്രകാരം, കഴിഞ്ഞ വർഷത്തെ അപേക്ഷിച്ച് ടിക്ക് റിപ്പോർട്ടുകളിൽ 38.5 ശതമാനത്തിന്റെ വർധനവാണ് ഈ വർഷം ജൂൺ പകുതിയോടെ ഉണ്ടായിരിക്കുന്നത്. ഇതിൽ ഏറ്റവും കൂടുതൽ രോഗവ്യാപന സാധ്യതയുള്ള ‘ബ്ലാക്ക്-ലെഗ്ഡ്’ വിഭാഗത്തിൽപ്പെട്ട പ്രാണികളുടെ എണ്ണം മാത്രം 35.2 ശതമാനം ഉയർന്നു കഴിഞ്ഞു. കാനഡയിലെ ജനസംഖ്യ കൂടിയ പ്രവിശ്യയായ ഒന്റാരിയോയിലാണ് നിലവിൽ ഏറ്റവും ആശങ്കാജനകമായ സാഹചര്യം നിലനിൽക്കുന്നത്.

രാജ്യത്താകെ റിപ്പോർട്ട് ചെയ്ത ടിക്ക് പ്രാണികളിൽ പകുതിയിലധികവും (52.9%) ഒന്റാരിയോയിൽ നിന്നാണ്. ഇവിടെ മാത്രം ഈ വർഷം ഇതുവരെ 8,735 പ്രാണികളെ കണ്ടെത്തിയിട്ടുണ്ട്, ഇത് മുൻവർഷത്തെ അപേക്ഷിച്ച് 50 ശതമാനത്തിലേറെ കൂടുതലാണ്. ഒന്റാരിയോയ്ക്ക് പുറമെ മാനിറ്റോബ, ആൽബർട്ട, സസ്‌കച്ചെവാൻ, ക്യുബെക് തുടങ്ങിയ പ്രവിശ്യകളിലും വലിയ തോതിൽ ഇവ പെരുകുന്നുണ്ട്. മുൻകാലങ്ങളിൽ വനമേഖലകളിൽ മാത്രം കണ്ടിരുന്ന ഈ പ്രാണികൾ ഇപ്പോൾ ടൊറന്റോ, വാൻകൂവർ, മോൺട്രിയൽ തുടങ്ങിയ പ്രധാന നഗരങ്ങളിലേക്കും വ്യാപിച്ചതാണ് ആരോഗ്യവകുപ്പിനെ ആശങ്കപ്പെടുത്തുന്നത്. ചൂടുകാലം കൂടുന്നതും ശൈത്യകാലത്തിന്റെ ദൈർഘ്യം കുറയുന്നതുമായ കാലാവസ്ഥാ വ്യതിയാനമാണ് പ്രാണികൾ വൻതോതിൽ പെരുകാൻ പ്രധാന കാരണം. കൂടാതെ എലികൾ, മാനുകൾ എന്നിവയുടെ എണ്ണത്തിലുണ്ടായ വർധനവും ഇവയുടെ വ്യാപനം വേഗത്തിലാക്കി.

ടിക്ക് പ്രാണികളുടെ കടിയേൽക്കുന്നത് വഴി പകരുന്ന ‘ലൈം രോഗം’ ബാധിക്കുന്നവരുടെ എണ്ണവും കാനഡയിൽ റെക്കോർഡ് വേഗതയിലാണ് ഉയരുന്നത്. 2023-ൽ 4,785 ആയിരുന്ന രോഗബാധിതരുടെ എണ്ണം കഴിഞ്ഞ വർഷം 7,105 ആയി ഉയർന്നിരുന്നു. ഈ വർഷത്തെ പൂർണ്ണമായ ദേശീയ കണക്കുകൾ ലഭ്യമായിട്ടില്ലെങ്കിലും നാല് പ്രവിശ്യകളിൽ മാത്രമായി ഇതിനകം 1,072 ലൈം രോഗ കേസുകൾ സ്ഥിരീകരിച്ചു കഴിഞ്ഞു. ഇതിൽ നോവ സ്കോഷ്യയിലാണ് (600 കേസുകൾ) ഏറ്റവും കൂടുതൽ രോഗബാധ. കടിയേറ്റാൽ പനി, വിറയൽ തുടങ്ങിയ ലക്ഷണങ്ങൾ കാണിക്കുന്ന ഈ രോഗം കൃത്യസമയത്ത് ചികിത്സിച്ചില്ലെങ്കിൽ ഗുരുതരമാകും. പ്രാണികളുടെ കടിയേൽക്കാതിരിക്കാൻ വനപ്രദേശങ്ങളിലോ പാർക്കുകളിലോ പോകുമ്പോൾ ശരീരം പൂർണ്ണമായി മറയുന്ന ഇളം നിറത്തിലുള്ള വസ്ത്രങ്ങൾ ധരിക്കണമെന്നും കീടനാശിനികൾ (Insect Repellent) ഉപയോഗിക്കണമെന്നും പബ്ലിക് ഹെൽത്ത് ഏജൻസി പൊതുജനങ്ങൾക്ക് നിർദ്ദേശം നൽകിയിട്ടുണ്ട്.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

Huge increase in tick numbers in Canada; These provinces are most at risk; Health Department issues warning