ഒട്ടാവ: ബാങ്ക് ഓഫ് കാനഡയിൽ പുതിയ തൊഴിൽ കരാറുമായി ബന്ധപ്പെട്ട് മാനേജ്മെന്റും യൂണിയനും തമ്മിൽ നടത്തിയ ചർച്ചകൾ പരാജയപ്പെട്ടതിനെ തുടർന്ന് സുരക്ഷാ ജീവനക്കാർ ചൊവ്വാഴ്ച മുതൽ അനിശ്ചിതകാല സമരം ആരംഭിച്ചു. ഒട്ടാവയിലെയും മോൺട്രിയലിലെയും ബാങ്ക് ഓഫീസുകളിലെ 63 സുരക്ഷാ ഉദ്യോഗസ്ഥരാണ് കാനഡയിലെ പൊതുമേഖലാ ജീവനക്കാരുടെ യൂണിയനായ ‘പബ്ലിക് സർവീസ് അലയൻസ് ഓഫ് കാനഡ’യുടെ (PSAC) നേതൃത്വത്തിൽ സമര രംഗത്തുള്ളത്. നിലവിലെ സാഹചര്യത്തിൽ മോൺട്രിയലിലെ ജീവനക്കാരെ തൊഴിലുടമ ലോക്ക്ഔട്ട് ചെയ്തതായും യൂണിയൻ ഭാരവാഹികൾ ആരോപിച്ചു.
ജീവനക്കാരുടെ ജോലി പരിചയം അനുസരിച്ച് ലഭിക്കേണ്ട ഓവർടൈം പണവും അവധികളും വെട്ടിക്കുറയ്ക്കാൻ ബാങ്ക് അധികൃതർ ശ്രമിച്ചു എന്നാണ് യൂണിയൻ പറയുന്നത്. പ്രസവാവധി ആനുകൂല്യങ്ങൾ കുറയ്ക്കാൻ മാനേജ്മെന്റ് നിർദേശിച്ചതും ചർച്ചകൾ പരാജയപ്പെടാൻ കാരണമായി. ന്യായമായ വേതനവും സ്ഥിരതയുള്ള ജോലി സമയവും ഉറപ്പാക്കണമെന്നാണ് ജീവനക്കാരുടെ ആവശ്യം. എന്നാൽ, സമരം തുടരുന്നതിനിടയിലും ജീവനക്കാരെ തിരികെ ജോലിക്ക് വിളിക്കാൻ ബാങ്ക് ശ്രമിക്കുന്നതായും, സുരക്ഷാ ചുമതലകൾക്കായി കരാർ അടിസ്ഥാനത്തിൽ പുറത്തുനിന്നുള്ള സ്വകാര്യ ഏജൻസിയെ നിയമിക്കാൻ പദ്ധതിയിടുന്നതായും യൂണിയൻ ആരോപിച്ചു.
അതേസമയം, നിലവിലുള്ള തൊഴിൽ തർക്കത്തെക്കുറിച്ചോ ചർച്ചകളുടെ വിശദാംശങ്ങളെക്കുറിച്ചോ ഔദ്യോഗികമായി പ്രതികരിക്കാൻ ബാങ്ക് ഓഫ് കാനഡ മാനേജ്മെന്റ് തയ്യാറായിട്ടില്ല. എന്നാൽ രാജ്യത്തെ നിയമങ്ങൾ പാലിച്ചുകൊണ്ട് ബാങ്കിന്റെ അടിയന്തരവും നിർണായകവുമായ പ്രവർത്തനങ്ങൾ തടസ്സമില്ലാതെ മുന്നോട്ട് കൊണ്ടുപോകാൻ മാനേജ്മെന്റിന് ഉത്തരവാദിത്വമുണ്ടെന്ന് ബാങ്ക് പ്രസ്താവനയിലൂടെ അറിയിച്ചു. കാനഡയിലെ പ്രധാന ധനകാര്യ സ്ഥാപനമായ ബാങ്ക് ഓഫ് കാനഡയിലെ സുരക്ഷാ ജീവനക്കാരുടെ സമരം വരും ദിവസങ്ങളിൽ കൂടുതൽ ശക്തമാകാനാണ് സാധ്യത.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Bank of Canada security staff to strike over move to cut benefits
