ഹാലിഫാക്സ്: ഇന്ധനത്തിന് പകരം കാറ്റിന്റെ ശക്തി ഉപയോഗിച്ച് സഞ്ചരിക്കുന്ന ലോകത്തിലെ ഏറ്റവും വലിയ ചരക്കുകപ്പലായ ‘നിയോലൈനർ ഒറിജിൻ’ (Neoliner Origin) ഹാലിഫാക്സ് തുറമുഖത്ത് എത്തിച്ചേർന്നു. തിങ്കളാഴ്ചയായിരുന്നു കപ്പലിന്റെ ചരിത്രപരമായ ഈ ആദ്യ കാനഡ സന്ദർശനം. ആഗോള സമുദ്ര ചരക്കുഗതാഗത മേഖലയിലെ കാർബൺ പുറന്തള്ളൽ കുറയ്ക്കുക എന്ന ലക്ഷ്യത്തോടെ ഫ്രാൻസിലെ ‘നിയോലൈൻ’ എന്ന കമ്പനിയാണ് 136 മീറ്റർ നീളമുള്ള ഈ അത്യാധുനിക കപ്പൽ നിർമിച്ചത്. പരമ്പരാഗത ചരക്കുകപ്പലുകളെ അപേക്ഷിച്ച് ഇതിലെ ഇന്ധന ഉപയോഗം 80 ശതമാനത്തിലധികം കുറയ്ക്കാൻ സാധിക്കുമെന്നാണ് നിർമാതാക്കൾ അവകാശപ്പെടുന്നത്.
ലോകത്തെ ആകെ ചരക്കുനീക്കത്തിന്റെ 80 ശതമാനത്തിലധികവും നടക്കുന്നത് കടൽമാർഗമാണ്. എന്നാൽ, ഇത് വൻതോതിൽ അന്തരീക്ഷ മലിനീകരണത്തിന് കാരണമാകുന്നുണ്ടെന്നാണ് ഐക്യരാഷ്ട്രസഭയുടെയും മറ്റ് രാജ്യാന്തര ഏജൻസികളുടെയും കണക്കുകൾ വ്യക്തമാക്കുന്നത്. 2023-ലെ കണക്കനുസരിച്ച് ആഗോളതലത്തിലെ ഹരിതഗൃഹ വാതക പുറന്തള്ളലിന്റെ 2 ശതമാനവും സമുദ്ര ചരക്കുഗതാഗത മേഖലയിൽ നിന്നാണ്. ഈ സാഹചര്യത്തിലാണ് കാർബൺ പുറന്തള്ളൽ പൂർണ്ണമായും ഒഴിവാക്കാനുള്ള പുതിയ ശ്രമങ്ങളുമായി പരിസ്ഥിതി സൗഹൃദ കപ്പലായ നിയോലൈനർ ഒറിജിൻ രംഗത്തെത്തുന്നത്. വലിയ രണ്ട് മാസ്റ്റുകളും കപ്പൽപ്പായകളും (Sails) ഘടിപ്പിച്ചാണ് ഈ റോൾ-ഓൺ റോൾ-ഓഫ് (Ro-Ro) കപ്പൽ രൂപകൽപ്പന ചെയ്തിരിക്കുന്നത്.
കപ്പലിന്റെ ആദ്യ കാനഡ സന്ദർശനത്തോടനുബന്ധിച്ച് പോർട്ട് ഓഫ് ഹാലിഫാക്സ്, പി.എസ്.എ ഹാലിഫാക്സ്, മോണ്ട്ഷിപ്പ് എന്നിവയുടെ സഹകരണത്തോടെ പ്രത്യേക സ്വീകരണ ചടങ്ങും തുറമുഖത്ത് സംഘടിപ്പിച്ചിരുന്നു. സുസ്ഥിര സമുദ്ര ഗതാഗതത്തിന്റെ ഭാവിയിലേക്കുള്ള വലിയൊരു ചുവടുവെപ്പാണിതെന്ന് പി.എസ്.എ ഹാലിഫാക്സ് മാനേജിംഗ് ഡയറക്ടർ ഡങ്കൻ ഗ്ലാസ് ചടങ്ങിൽ പറഞ്ഞു. തിങ്കളാഴ്ച വൈകിട്ട് മൂന്ന് മണി മുതൽ നാല് മണി വരെ ഹാലിഫാക്സ് തുറമുഖത്ത് എത്തിയ പൊതുജനങ്ങൾക്കായി കപ്പലിന്റെ പ്രത്യേക സഞ്ചാരം നേരിൽ കാണാനുള്ള സൗകര്യവും അധികൃതർ ഒരുക്കിയിരുന്നു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
'Neoliner Origin' travels on the wind; The world's largest 'green' cargo ship arrives in Canada for the first time
