ഒട്ടാവ: 2022-ലെ LastPass ഡാറ്റ ചോർച്ചയിൽ ബാധിക്കപ്പെട്ട കാനഡക്കാർക്ക് ക്ലാസ് ആക്ഷൻ കേസിന്റെ ഭാഗമായി നഷ്ടപരിഹാരം ലഭിക്കാനുള്ള അവസരം അവസാന ഘട്ടത്തിലേക്ക്. കമ്പനിക്കെതിരെ ജനങ്ങൾ നൽകിയ കേസിൽ, കോടതി ഒത്തുതീർപ്പാക്കിയ 42 ലക്ഷം ഡോളറിന്റെ ഫണ്ടിൽ നിന്നാണ് അർഹരായ ആളുകൾക്ക് ഈ തുക ലഭിക്കുക. നിശ്ചിത മാനദണ്ഡങ്ങൾ പാലിക്കുന്ന അപേക്ഷകർക്ക് പരമാവധി 500 ഡോളർ വരെ നഷ്ടപരിഹാരമായി ലഭിക്കാൻ ഈ കേസ് വഴി അവസരമുണ്ട്. അപേക്ഷകൾ സമർപ്പിക്കാനുള്ള അവസാന തീയതി 2026 ജൂൺ 23 ആണ്.
ക്ലൗഡ് അധിഷ്ഠിത പാസ്വേഡ് സേവനമായ ലാസ്റ്റ്പാസിന്റെ സിസ്റ്റത്തിലേക്ക് ഒരു മുതിർന്ന ജീവനക്കാരന്റെ വിവരങ്ങൾ ഉപയോഗിച്ച് സൈബർ അക്രമി കടന്നുകയറിയതാണ് ഡാറ്റ ചോർച്ചയ്ക്ക് കാരണമായത്. ഈ സംഭവത്തിൽ ഉപയോക്താക്കളുടെ വ്യക്തിഗത വിവരങ്ങൾ സംരക്ഷിക്കുന്നതിൽ കമ്പനി വീഴ്ച വരുത്തിയെന്ന് ആരോപിച്ച് കരൺ കെസ്വാനി എന്ന വ്യക്തി ബ്രിട്ടീഷ് കൊളംബിയ സുപ്രീം കോടതിയിൽ പൊതുതാൽപ്പര്യ ഹർജി ഫയൽ ചെയ്യുകയായിരുന്നു. എന്നാൽ ഈ ഒത്തുതീർപ്പിലൂടെ തങ്ങൾ തെറ്റ് സമ്മതിക്കുന്നില്ലെന്നാണ് കമ്പനിയെ പ്രതിനിധീകരിക്കുന്ന നിയമ സ്ഥാപനമായ കെ.എൻ.ഡി കോംപ്ലക്സ് ലിറ്റിഗേഷൻ വ്യക്തമാക്കുന്നത്.
ഡാറ്റ ചോർച്ചയുണ്ടായ സമയത്ത് കാനഡയിൽ ലാസ്റ്റ്പാസിന് 11 ലക്ഷത്തിലധികം അക്കൗണ്ടുകൾ ഉണ്ടായിരുന്നു. ഈ പ്രശ്നം കാരണം ബുദ്ധിമുട്ടിയ കാനഡയിലെ താമസക്കാർക്ക് മൂന്ന് കാര്യങ്ങൾക്കായി നഷ്ടപരിഹാരം ചോദിക്കാം; ഇതിനായി പാഴായിപ്പോയ സമയത്തിനുള്ള നഷ്ടപരിഹാരം, കൈയിൽ നിന്ന് പണം നഷ്ടപ്പെട്ടിട്ടുണ്ടെങ്കിൽ ആ തുക, കൂടാതെ ഡിജിറ്റൽ പണമായ ക്രിപ്റ്റോ കറൻസി നഷ്ടപ്പെട്ടിട്ടുണ്ടെങ്കിൽ അതിനുള്ള പരിഹാരം എന്നിവയാണവ. അർഹരായ ഉപയോക്താക്കൾ 2026 ജൂൺ 23 രാത്രി 11:59 ന് മുൻപായി ഓൺലൈൻ വഴി അപേക്ഷാ ഫോം പൂർത്തിയാക്കി സമർപ്പിക്കേണ്ടതാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
LastPass data breach in Canada: Only days left to apply for compensation
