കല്ലറയ്ക്കുള്ളിൽ ഒളിപ്പിച്ച രഹസ്യം; പള്ളി സെമിത്തേരിയിൽ പായയിൽ പൊതിഞ്ഞ നിലയിൽ മൃതദേഹം, ദുരൂഹത, അന്വേഷണം തുടങ്ങി

ഇരിട്ടി: കണ്ണൂർ അയ്യൻകുന്ന് പഞ്ചായത്തിലെ വാണിയപ്പാറ തട്ട് ഉണ്ണി മിശിഹാ പള്ളി സെമിത്തേരിയിൽ നിന്ന് കണ്ടെത്തിയ അജ്ഞാത മൃതദേഹം പ്രദേശത്ത് വലിയ ഞെട്ടലും ദുരൂഹതയും പരത്തുന്നു. മറ്റൊരു സംസ്കാരച്ചടങ്ങിനായി കല്ലറ തുറന്നപ്പോഴാണ് പായയിൽ പൊതിഞ്ഞ നിലയിൽ ഒരു മൃതദേഹം അധികൃതരുടെ ശ്രദ്ധയിൽപ്പെട്ടത്. ക്രിസ്തീയ ആചാരങ്ങൾക്ക് വിരുദ്ധമായി പായയിൽ പൊതിഞ്ഞ് മൃതദേഹം സംസ്കരിച്ചത് എന്തിനാണെന്നതാണ് പൊലീസിനെ കുഴയ്ക്കുന്ന പ്രധാന ചോദ്യം.

കഴിഞ്ഞ ജൂൺ 13-നാണ് പള്ളിയിൽ മറ്റൊരു സംസ്കാരച്ചടങ്ങ് നിശ്ചയിച്ചിരുന്നത്. ഇതിനായി 38-ാം നമ്പർ കല്ലറ തുറന്നപ്പോഴാണ് പെട്ടിയിൽ അടക്കം ചെയ്ത നിലയിലുള്ള ഒരു മൃതദേഹത്തിന് പുറമെ, പായയിൽ പൊതിഞ്ഞ മറ്റൊരു മൃതദേഹം കൂടി കണ്ടത്. കല്ലറ തുറക്കാൻ എത്തിയ പള്ളി ജീവനക്കാരും ബന്ധുക്കളും ഉൾപ്പെടെയുള്ള ആറുപേർ ഈ ദൃശ്യം കണ്ട് അമ്പരന്നു. ഉടൻ തന്നെ കല്ലറ സ്ലാബ് ഇട്ട് മൂടുകയും പള്ളി അധികൃതർ പൊലീസിലും അതിരൂപതയിലും വിവരം അറിയിക്കുകയുമായിരുന്നു.

സംഭവത്തിൽ കരിക്കോട്ടക്കരി പൊലീസ് അന്വേഷണം ഊർജിതമാക്കിയിട്ടുണ്ട്. പ്രാഥമിക അന്വേഷണത്തിന് ശേഷം കല്ലറ വീണ്ടും അടച്ച് സെമിത്തേരി പൊലീസ് പൂട്ടി സീൽ ചെയ്തു. എന്നാൽ, മൃതദേഹം ആരുടേതാണെന്ന് കണ്ടെത്താൻ പള്ളി അധികൃതർക്ക് പോലും സാധിച്ചിട്ടില്ല. ഇതിന് പിന്നിൽ പ്രധാനമായും രണ്ട് കാരണങ്ങളാണ് ചൂണ്ടിക്കാണിക്കപ്പെടുന്നത് .2019-ൽ സെമിത്തേരി നവീകരിച്ച ശേഷം കല്ലറകൾക്ക് പുതിയ ക്രമ നമ്പറുകൾ നൽകിയിരുന്നു. ഇത് പഴയ റജിസ്റ്ററുമായി ഒത്തുനോക്കുമ്പോൾ വലിയ ആശയക്കുഴപ്പമുണ്ടാക്കുന്നു. 38-ാം നമ്പർ കല്ലറയിൽ അടക്കം ചെയ്തവരുടെ പട്ടിക പരിശോധിച്ചെങ്കിലും, പായയിൽ കണ്ടെത്തിയ മൃതദേഹം ആരുടേതാണെന്നതിന് ഒരു സൂചനയും ലഭിച്ചിട്ടില്ല.

ഇടവക വികാരി ഫാ. ജിൽബർട്ട് കൊന്നയിൽ സ്ഥലത്തെത്തിയ ശേഷം മരണ റജിസ്റ്ററുകൾ വീണ്ടും പരിശോധിച്ചു. സെമിത്തേരിയിൽ അടക്കം ചെയ്ത 93 പേരുടെ ബന്ധുക്കളുമായി സംസാരിച്ച് വിവരങ്ങൾ ശേഖരിക്കാനാണ് തീരുമാനം. കരിക്കോട്ടക്കരി എസ്എച്ച്ഒ ആർ.എൻ. പ്രശാന്ത്, എസ്.ഐ എം.ജെ. ബെന്നി എന്നിവരുടെ നേതൃത്വത്തിൽ മൃതദേഹത്തെക്കുറിച്ച് സംശയമുള്ള കുടുംബങ്ങളെ സെമിത്തേരിയിൽ എത്തിച്ച് പരിശോധനകൾ നടത്തി.

ഈ മൃതദേഹം എപ്പോൾ, എങ്ങനെ, ആര് ഇവിടെ അടക്കം ചെയ്തു എന്നതിലാണ് ഇപ്പോഴും അവ്യക്തത തുടരുന്നത്. റജിസ്റ്ററുകൾ പൂർണ്ണമായി പരിശോധിച്ച ശേഷം നിയമപരമായ നടപടികളിലേക്ക് കടക്കുമെന്ന് കരിക്കോട്ടക്കരി എസ്എച്ച്ഒ അറിയിച്ചു. പള്ളിയിലെ ജീവനക്കാരെയും സംഭവദിവസം അവിടെയുണ്ടായിരുന്നവരെയും കേന്ദ്രീകരിച്ച് പൊലീസ് വിശദമായ ചോദ്യം ചെയ്യലിന് ഒരുങ്ങുകയാണ്. നാടിനെ നടുക്കിയ ഈ അജ്ഞാത മൃതദേഹത്തിന്റെ ഉറവിടം കണ്ടെത്തുന്നതോടെ കേസിലെ ദുരൂഹതകൾക്ക് അന്ത്യമാകുമെന്ന പ്രതീക്ഷയിലാണ് പ്രദേശവാസികൾ.

Mysterious Body Found Wrapped in Mat in Church Tomb

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla