ഗാറ്റിനോ: ക്യുബെക്ക് പ്രവിശ്യയിലുള്ള ഒരു പ്രൈമറി സ്കൂളിൽ സന്നദ്ധപ്രവർത്തനത്തിന് എത്തിയ മുസ്ലിം അമ്മയോട് ഹിജാബ് മാറ്റാൻ ആവശ്യപ്പെട്ട് സ്കൂൾ അധികൃതർ. സ്കൂൾ സമയത്തിന് ശേഷം നടന്ന ഒരു പരിപാടിയിൽ സഹായിക്കാൻ എത്തിയപ്പോഴാണ് അധികൃതർ ഈ നിർദേശം നൽകിയത്. ക്യുബെക്കിൽ അടുത്തിടെ കൊണ്ടുവന്ന പുതിയ ബിൽ 94 ഭാഗമായാണ് ഈ നടപടിയെന്ന് സ്കൂൾ അധികൃതർ പറയുന്നു. എന്നാൽ, ഇത്തരം കടുത്ത നിയമങ്ങൾ കാരണം സ്കൂൾ കാര്യങ്ങളിൽ സഹായിക്കാൻ ഇനി മാതാപിതാക്കൾ മുന്നോട്ട് വരില്ലെന്ന് കാണിച്ച് അവിടുത്തെ രക്ഷാകർതൃ സമിതി രംഗത്തെത്തിയിട്ടുണ്ട്.
അധ്യാപകരും പ്രിൻസിപ്പൽമാരും ഉൾപ്പെടെ കുട്ടികളുമായി നേരിട്ട് ഇടപഴകുന്ന ആരും സ്കൂളുകളിൽ മതപരമായ ചിഹ്നങ്ങൾ ധരിക്കരുത് എന്നാണ് ക്യുബെക്കിലെ പുതിയ നിയമം. ഈ നിയമം സ്കൂളിൽ സഹായിക്കാൻ വരുന്ന മാതാപിതാക്കൾക്കും ബാധകമാണെന്നാണ് പ്രാദേശിക സ്കൂൾ ബോർഡിന്റെ വിശദീകരണം. കുട്ടികൾക്ക് ഭക്ഷണം വിളമ്പുന്നതും അവരെ നോക്കുന്നതുമെല്ലാം ഈ നിയമത്തിന്റെ പരിധിയിൽ വരും. ഇതുകൊണ്ടാണ് വരാനിരിക്കുന്ന സെപ്റ്റംബറിലെ പരിപാടിയിൽ പങ്കെടുക്കാൻ താല്പര്യം പ്രകടിപ്പിച്ച അമ്മയ്ക്ക് വിലക്കേർപ്പെടുത്തിയത്. സ്കൂളുകളിൽ നിലവിൽ തന്നെ സഹായിക്കാൻ ആളുകളെ കിട്ടാനില്ലാത്ത അവസ്ഥയാണെന്നും, ഒരു സാധാരണ ഉച്ചഭക്ഷണ പരിപാടിക്ക് പോലും ഇത്തരം നിയന്ത്രണങ്ങൾ വെക്കുന്നത് കാര്യങ്ങൾ കൂടുതൽ ബുദ്ധിമുട്ടിലാക്കുമെന്നും രക്ഷാകർതൃ സമിതി പ്രസിഡന്റ് സൈമൺ ലാജ്വാ പറഞ്ഞു.
ഈ സംഭവം കാനഡയിൽ വലിയ രാഷ്ട്രീയ ചർച്ചകൾക്കും കാരണമായിട്ടുണ്ട്. വെറുതെ സഹായിക്കാൻ വരുന്നവരെപ്പോലും ഈ നിയമത്തിന്റെ പേരിൽ തടയുന്നത് യുക്തിക്ക് നിരക്കാത്തതാണെന്ന് ലിബറൽ എംപി ഗ്രെഗ് ഫെർഗസ് വിമർശിച്ചു. എന്നാൽ ക്യുബെക്ക് പ്രവിശ്യ പാസാക്കിയ നിയമം എല്ലാവരും അനുസരിക്കാൻ ബാധ്യസ്ഥരാണെന്നാണ് ഇതിനെ അനുകൂലിക്കുന്നവരുടെ വാദം. കുട്ടികൾക്ക് മതപരമായ സമ്മർദങ്ങളില്ലാത്ത ഒരു അന്തരീക്ഷം ഒരുക്കാനാണ് ഈ നിയമമെന്ന് വിദ്യാഭ്യാസ മന്ത്രാലയവും വ്യക്തമാക്കി. കഴിഞ്ഞ ഒക്ടോബറിലാണ് ഈ നിയമം നിലവിൽ വന്നത്. പൊതുസ്ഥലങ്ങളിലെ പ്രാർത്ഥനകൾക്കും ഡേകെയർ ജീവനക്കാരുടെ മതചിഹ്നങ്ങൾക്കും വിലക്കേർപ്പെടുത്തിയ പുതിയ മാറ്റങ്ങൾ ക്യുബെക്കിൽ ഇപ്പോൾ വലിയ സംവാദങ്ങൾക്കാണ് വഴിതുറന്നിരിക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Authorities ban mother wearing hijab from school program; Bill 94 sparks controversy in Quebec
