ടൊറന്റോ: ഫിഫ ലോകകപ്പ് 2026 മത്സരങ്ങൾക്ക് ആതിഥേയത്വം വഹിക്കുന്നതിന്റെ ഭാഗമായി ടൊറന്റോ നഗരത്തിൽ മൂന്ന് ലക്ഷത്തിലധികം സന്ദർശകരെ പ്രതീക്ഷിക്കുന്നതായി നഗരസഭാ അധികൃതർ അറിയിച്ചു. ജൂൺ 12 മുതൽ ജൂലൈ 2 വരെ ബീമോ ഫീൽഡിലാണ് (BMO Field) ആകെ ആറ് ലോകകപ്പ് മത്സരങ്ങൾ നടക്കുന്നത്. വൻ ജനത്തിരക്ക് അനുഭവപ്പെടാൻ സാധ്യതയുള്ളതിനാൽ താമസക്കാരും സന്ദർശകരും മുൻകൂട്ടി യാത്രകൾ ആസൂത്രണം ചെയ്യണമെന്നും നഗരത്തിലുടനീളം റോഡ് അടച്ചിടലുകളും പൊതുഗതാഗത ക്രമീകരണങ്ങളും ഏർപ്പെടുത്തുമെന്നും അധികൃതർ വ്യക്തമാക്കി.
മത്സരങ്ങൾ നടക്കുന്ന ദിവസങ്ങളിൽ ലിബർട്ടി വില്ലേജ്, എക്സിബിഷൻ പ്ലേസ്, ഫോർട്ട് യോർക്ക്, ദി ബെന്റ്വേ ഫാൻ ഫെസ്റ്റിവൽ ഏരിയ, ലേക്ക് ഷോർ ബോളിവാർഡ് വെസ്റ്റ്, സ്ട്രാചൻ അവന്യൂ, ഡഫറിൻ സ്ട്രീറ്റ്, ഫ്ലീറ്റ് സ്ട്രീറ്റ് എന്നീ പ്രദേശങ്ങളെയാണ് നിയന്ത്രണങ്ങൾ പ്രധാനമായും ബാധിക്കുക. കളി ആരംഭിക്കുന്നതിന് അഞ്ച് മണിക്കൂർ മുൻപ് തന്നെ ബീമോ ഫീൽഡിന് സമീപമുള്ള റോഡുകൾ അടയ്ക്കുമെന്നും മത്സരങ്ങൾ കഴിഞ്ഞ് മൂന്ന് മണിക്കൂർ വരെ ഈ നിയന്ത്രണം തുടരുമെന്നും ട്രാഫിക് വിഭാഗം അറിയിച്ചു. മത്സരങ്ങൾക്ക് മുൻപും ശേഷവും ഈ റൂട്ടുകളിൽ കടുത്ത ഗതാഗതക്കുരുക്ക് അനുഭവപ്പെടാൻ സാധ്യതയുണ്ട്.
നഗരത്തിലെ ആറ് മത്സരങ്ങളുടെ ഷെഡ്യൂൾ റെക്കോർഡ് ജനത്തിരക്കിനും ഗതാഗത സംവിധാനങ്ങളിൽ കടുത്ത സമ്മർദ്ദത്തിനും കാരണമാകുമെന്നാണ് വിലയിരുത്തൽ. പ്രത്യേകിച്ച് വാട്ടർഫ്രണ്ട്, വെസ്റ്റ് എൻഡ് റൂട്ടുകളിലെ പൊതുഗതാഗത സംവിധാനങ്ങളിൽ യാത്രക്കാരുടെ വലിയ തിരക്ക് അനുഭവപ്പെടും. ഈ സാഹചര്യത്തിൽ പരിപാടി നടക്കുന്ന മേഖലകളിൽ വാഹനങ്ങൾ ഓടിക്കുന്നത് ഒഴിവാക്കണമെന്നും പകരം പൊതുഗതാഗത സംവിധാനങ്ങൾ പരമാവധി പ്രയോജനപ്പെടുത്തണമെന്നും അധികൃതർ ജനങ്ങളോട് ശക്തമായി അഭ്യർത്ഥിച്ചു. യാത്രയ്ക്കായി കൂടുതൽ സമയം മാറ്റിവെക്കണമെന്നും നിർദ്ദേശമുണ്ട്.
FIFA World Cup 2026: Officials expect huge crowds in Toronto
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
