വാഷിങ്ടൺ : 2026 ഫിഫ ലോകകപ്പിൽ പങ്കെടുക്കുന്ന ഇറാൻ ഫുട്ബോൾ ടീമിലെ കളിക്കാർക്ക് യുഎസ് വിസ ലഭിച്ചെങ്കിലും, ഫുട്ബോൾ ഫെഡറേഷൻ ഭാരവാഹികൾ ഉൾപ്പെടെയുള്ള പ്രധാന ഉദ്യോഗസ്ഥർക്ക് യാത്രാനുമതി നിഷേധിച്ചു. ഫെഡറേഷൻ വൈസ് പ്രസിഡന്റ് മെഹ്ദി മുഹമ്മദ് നബി, സെക്രട്ടറി ജനറൽ ഹെദായത്ത് മുംബെനി, എക്സിക്യൂട്ടീവ് ഡയറക്ടർ മെഹ്ദി ഖരാതി എന്നിവരുൾപ്പെടെ 14-ഓളം ഭരണനിർവഹണ ഉദ്യോഗസ്ഥർക്കാണ് യുഎസ് വിസ നിഷേധിച്ചതായി റിപ്പോർട്ടുകൾ വ്യക്തമാക്കുന്നത്. കായികരംഗത്തെ കടുത്ത രാഷ്ട്രീയ ഇടപെടലാണിതെന്നും കളിക്കളത്തിൽ തുല്യമായ അവസരങ്ങൾ നിഷേധിക്കാനാണ് യുഎസ് ശ്രമിക്കുന്നതെന്നും ഇറാൻ കുറ്റപ്പെടുത്തി. ഈ വിവേചനപരമായ സമീപനത്തിനെതിരെ കായിക ലോകത്തിന്റെ പരമോന്നത സമിതിയായ ഫിഫ അടിയന്തരമായി ഇടപെടണമെന്നും ഇറാൻ ആവശ്യപ്പെട്ടിട്ടുണ്ട്.
എന്നാൽ, കായിക മേളയുടെ മറവിൽ ഭീകരവാദ ബന്ധമുള്ളവരെ രാജ്യത്തേക്ക് കടക്കാൻ അനുവദിക്കില്ലെന്ന ഉറച്ച നിലപാടിലാണ് അമേരിക്ക. ഇറാനിയൻ പ്രതിനിധി സംഘത്തിൽ ഇസ്ലാമിക് റെവല്യൂഷനറി ഗാർഡ് കോർപ്സുമായി (IRGC) ബന്ധമുള്ളവർ ഉണ്ടോയെന്ന് കർശനമായി നിരീക്ഷിക്കുമെന്നും കായികരംഗവുമായി ബന്ധമില്ലാത്ത അത്തരം വ്യക്തികളെ പ്രവേശിപ്പിക്കില്ലെന്നും യുഎസ് സ്റ്റേറ്റ് സെക്രട്ടറി മാർക്കോ റൂബിയോ വ്യക്തമാക്കി. വിസ പ്രതിസന്ധിയെത്തുടർന്ന് ഇറാൻ തങ്ങളുടെ പരിശീലന ക്യാമ്പ് യുഎസിലെ അരിസോണയിൽ നിന്നും മെക്സിക്കോയിലെ തിജുവാനയിലേക്ക് മാറ്റിയിരിക്കുകയാണ്. ജൂൺ 15-ന് ലോസ് ആഞ്ചലസിൽ ന്യൂസിലാൻഡിനെതിരെയാണ് ഇറാന്റെ ലോകകപ്പിലെ ആദ്യ മത്സരം. അക്രമസാധ്യതകൾ ഒഴിവാക്കാൻ കനത്ത സുരക്ഷയാണ് യുഎസ് ഒരുക്കിയിട്ടുള്ളത്.
New conflict in the World Cup; US bans Iran’s visas for the game, accompanying officials
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
