മായാത്ത ചിരിയോർമ്മ; സലിം കുമാറിന്റെ സംസ്‌കാര ചടങ്ങുകൾ ഇന്ന്, ടൗൺ ഹാളിൽ പൊതുദർശനം

കൊച്ചി: മലയാളികളെ പതിറ്റാണ്ടുകളോളം ചിരിപ്പിക്കുകയും ചിന്തിപ്പിക്കുകയും ചെയ്ത ഹാസ്യത്തിന്റെ തമ്പുരാൻ സലിം കുമാറിന്റെ ഭൗതികദേഹം ഇന്ന് സംസ്‌കരിക്കും. ദീർഘനാളായി അസുഖബാധിതനായി അമൃത ആശുപത്രിയിൽ ചികിത്സയിലിരിക്കെ ഇന്നലെയായിരുന്നു അദ്ദേഹത്തിന്റെ വിയോഗം. ഇന്ന് രാവിലെ എട്ട് മണിയോടെ ആശുപത്രിയിൽ നിന്ന് വടക്കൻ പറവൂർ ടൗൺ ഹാളിലേക്ക് എത്തിച്ച മൃതദേഹത്തിൽ സമൂഹത്തിന്റെ വിവിധ തുറകളിലുള്ള പ്രമുഖരും ജനങ്ങളും അന്തിമോപചാരം അർപ്പിക്കുകയാണ്. ഉച്ചയ്ക്ക് ഒരു മണി വരെ ടൗൺ ഹാളിൽ പൊതുദർശനം തുടരും. അതിനുശേഷം ഭൗതികദേഹം വീട്ടിലേക്ക് കൊണ്ടുപോകുമെന്നും മൂന്ന് മണിയോടെ സംസ്‌കാര ചടങ്ങുകൾ നടക്കുമെന്നും ബന്ധുക്കൾ അറിയിച്ചു.

1969 ഒക്ടോബർ പത്തിന് വടക്കൻ പറവൂരിൽ ജനിച്ച സലിം കുമാർ, മാല്യങ്കര എസ്.എൻ.എം കോളേജിലെയും മഹാരാജാസ് കോളേജിലെയും പഠനകാലത്താണ് മിമിക്രി രംഗത്ത് സജീവമാകുന്നത്. എം.ജി സർവ്വകലാശാല കലോത്സവത്തിൽ മൂന്ന് തവണ മിമിക്രിയിൽ ജേതാവായി. തുടർന്ന് കൊച്ചിൻ കലാഭവനിലെത്തിയതാണ് അദ്ദേഹത്തിന്റെ കലാജീവിതത്തിൽ വഴിത്തിരിവായത്. ടെലിവിഷൻ പരിപാടികളിലെ ശ്രദ്ധേയമായ പ്രകടനത്തിന് ശേഷം 1996-ൽ ‘ഇഷ്ടമാണ് നൂറുവട്ടം’ എന്ന ചിത്രത്തിലൂടെയായിരുന്നു സിനിമാ അരങ്ങേറ്റം. മൂന്ന് പതിറ്റാണ്ട് നീണ്ട അഭിനയജീവിതത്തിൽ 320-ലധികം ചിത്രങ്ങളിൽ അദ്ദേഹം വേഷമിട്ടു.

2000 മുതൽ 2005 വരെയുള്ള കാലഘട്ടം സലിം കുമാറിന്റെ സിനിമാ ജീവിതത്തിലെ സുവർണ്ണകാലമായിരുന്നു. തെങ്കാശിപ്പട്ടണത്തിലെ കള്ളൻ, ഈ പറക്കും തളികയിലെ മായാണ്ടി, സി.ഐ.ഡി മൂസയിലെ പേരില്ലാത്ത കഥാപാത്രം, കല്യാണരാമനിലെ പ്യാരി, പുലിവാൽ കല്യാണത്തിലെ മണവാളൻ, മീശമാധവനിലെ അഡ്വക്കേറ്റ് മുകുന്ദനുണ്ണി തുടങ്ങി മലയാളികൾ ഇന്നും നെഞ്ചോടു ചേർക്കുന്ന ഒട്ടനവധി അനശ്വരമായ ഹാസ്യകഥാപാത്രങ്ങളെ അദ്ദേഹം സമ്മാനിച്ചു. വെറും കോമഡി താരം മാത്രമല്ല, തനിക്ക് ഗൗരവമുള്ള സ്വഭാവവേഷങ്ങളും വഴങ്ങുമെന്ന് പിന്നീട് അദ്ദേഹം തെളിയിച്ചു.

ഹാസ്യരസത്തിനപ്പുറം തന്മയത്വമുള്ള അഭിനയമികവിലൂടെ ദേശീയ പുരസ്‌കാരത്തിന്റെ നെറുകയിൽ വരെ സലിം കുമാർ മലയാളത്തിന്റെ പെരുമ എത്തിച്ചു. 2006-ൽ ലാൽജോസ് സംവിധാനം ചെയ്ത ‘അച്ഛനുറങ്ങാത്ത വീട്’ എന്ന ചിത്രത്തിലെ സാമുവൽ എന്ന കഥാപാത്രത്തിലൂടെ മികച്ച രണ്ടാമത്തെ നടനുള്ള സംസ്ഥാന പുരസ്കാരം അദ്ദേഹം നേടി. തുടർന്ന് 2011-ൽ ‘ആദാമിന്റെ മകൻ അബു’ എന്ന ചിത്രത്തിലെ വിസ്മയിപ്പിക്കുന്ന പ്രകടനത്തിലൂടെ മികച്ച നടനുള്ള സംസ്ഥാന, ദേശീയ ചലച്ചിത്ര പുരസ്കാരങ്ങൾ ഒരേവർഷം സലിം കുമാറിനെ തേടിയെത്തി. ‘കറുത്ത ജൂതൻ’ ഉൾപ്പെടെ മൂന്ന് സിനിമകൾ സംവിധാനം ചെയ്ത അദ്ദേഹം മികച്ച കഥയ്ക്കുള്ള സംസ്ഥാന അവാർഡും സ്വന്തമാക്കിയിട്ടുണ്ട്. ഭാര്യ സുനിതയും മക്കളായ ചന്തുവും ആരോമലുമടങ്ങുന്നതാണ് കുടുംബം. മലയാളിക്ക് സമ്മാനിച്ച ചിരിയുടെയും ചിന്തയുടെയും വലിയൊരു ഒസ്യത്ത് ബാക്കിവെച്ചാണ് ആ വലിയ കലാകാരൻ വിടവാങ്ങുന്നത്.

Unfading memories of laughter; Salim Kumar’s funeral today, public viewing at Town Hall

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla