ടൊറന്റോ: കാനഡയിലെ ഉന്നത വിദ്യാഭ്യാസ മേഖലയിൽ പുരുഷ-വനിതാ പ്രൊഫസർമാരുടെ ശമ്പളത്തിൽ വൻതോതിലുള്ള ലിംഗവിവേചനം നിലനിൽക്കുന്നതായി ഔദ്യോഗിക റിപ്പോർട്ട്. രാജ്യത്തെ പ്രമുഖ സർവകലാശാലകളിൽ ഒരേ തസ്തികയിലുള്ള പുരുഷന്മാരെ അപേക്ഷിച്ച് വനിതാ പ്രൊഫസർമാർക്ക് പ്രതിവർഷം 23,000 കനേഡിയൻ ഡോളർ (ഏകദേശം 14 ലക്ഷത്തിലധികം ഇന്ത്യൻ രൂപ) വരെ ശമ്പളം കുറവാണ് ലഭിക്കുന്നതെന്ന് സ്റ്റാറ്റിസ്റ്റിക്സ് കാനഡ പുറത്തുവിട്ട ഏറ്റവും പുതിയ കണക്കുകൾ വ്യക്തമാക്കുന്നു. കാനഡയിലെ 78 പൊതു സർവകലാശാലകളിൽ നിന്നുള്ള വിവരങ്ങൾ ശേഖരിച്ച് തയ്യാറാക്കിയ റിപ്പോർട്ടിലാണ് ഈ കണ്ടെത്തലുകൾ ഉള്ളത്.
ഒന്റാറിയോ പ്രവിശ്യയിലെ എല്ലാ പ്രധാന സർവകലാശാലകളിലും പുരുഷ പ്രൊഫസർമാർക്ക് വനിതകളേക്കാൾ ഉയർന്ന വേതനമാണ് നൽകുന്നത്. സർവകലാശാലകൾ അനുസരിച്ച് 5.7 ശതമാനം മുതൽ 13.5 ശതമാനം വരെയാണ് ഈ ശമ്പള വ്യത്യാസം. യൂണിവേഴ്സിറ്റി ഓഫ് ബ്രിട്ടീഷ് കൊളംബിയ, യൂണിവേഴ്സിറ്റി ഓഫ് ആൽബർട്ട, യൂണിവേഴ്സിറ്റി ഓഫ് മോൺട്രിയൽ, ഡൽഹൗസി യൂണിവേഴ്സിറ്റി എന്നിവിടങ്ങളിലെല്ലാം സമാനമായ സാഹചര്യമാണ് നിലനിൽക്കുന്നത്. ടൊറന്റോ നഗരത്തിലെ മൂന്ന് പ്രമുഖ സർവകലാശാലകളിലെ കൃത്യമായ കണക്കുകൾ പുറത്തുവന്നതോടെ വിഷയം വലിയ ചർച്ചയായിരിക്കുകയാണ്.
ടൊറന്റോയിലെ സർവകലാശാലകളിലെ കൃത്യമായ ശമ്പള വിവരങ്ങൾ പരിശോധിച്ചാൽ വലിയ തോതിലുള്ള അസമത്വമാണ് കാണാൻ കഴിയുന്നത്. ഏറ്റവും കൂടുതൽ അധ്യാപകരുള്ള യൂണിവേഴ്സിറ്റി ഓഫ് ടൊറന്റോയിൽ (U of T) പുരുഷ പ്രൊഫസർമാരുടെ ശരാശരി ശമ്പളം 2,06,575 ഡോളറായിരിക്കുമ്പോൾ വനിതകളുടേത് 1,83,350 ഡോളർ മാത്രമാണ്; അതായത് പ്രതിവർഷം 23,225 ഡോളറിന്റെ വലിയൊരു വ്യത്യാസം ഇവിടെ നിലനിൽക്കുന്നു. സമാനമായ രീതിയിൽ യോർക്ക് യൂണിവേഴ്സിറ്റിയിൽ പുരുഷ അധ്യാപകർക്ക് ശരാശരി 2,08,750 ഡോളറും വനിതകൾക്ക് 1,88,125 ഡോളറും ലഭിക്കുമ്പോൾ വനിതാ പ്രൊഫസർമാർ നേരിടുന്നത് 20,625 ഡോളറിന്റെ ശമ്പളക്കുറവാണ്. ടൊറന്റോ മെട്രോപൊളിറ്റൻ യൂണിവേഴ്സിറ്റിയിലും (TMU) സ്ഥിതി വ്യത്യസ്തമല്ല; ഇവിടെ പുരുഷ പ്രൊഫസർമാരുടെ ശമ്പളം 1,91,550 ഡോളറും വനിതകളുടേത് 1,77,950 ഡോളറുമാണ്, ഇവിടെ പ്രതിവർഷം 13,600 ഡോളറിന്റെ വേതന വ്യത്യാസമാണ് രേഖപ്പെടുത്തിയിരിക്കുന്നത്.
അധ്യാപകരുടെ പ്രവൃത്തിപരിചയവും അവർ തിരഞ്ഞെടുക്കുന്ന പഠനമേഖലയും (Discipline) അടിസ്ഥാനമാക്കിയാണ് ശമ്പളം നിശ്ചയിക്കുന്നതെന്നും ലിംഗവിവേചനം നിലനിൽക്കുന്നില്ലെന്നുമാണ് യൂണിവേഴ്സിറ്റി ഓഫ് ടൊറന്റോ അധികൃതരുടെ വിശദീകരണം. എന്നാൽ ഈ വാദത്തെ യൂണിവേഴ്സിറ്റി ഓഫ് ടൊറന്റോ ഫാക്കൽറ്റി അസോസിയേഷൻ (UTFA) ശക്തമായി തള്ളി. പതിറ്റാണ്ടുകളായി തുടരുന്ന വ്യവസ്ഥാപിതമായ ലിംഗവിവേചനമാണ് ഇതെന്നും, മുൻകാല പ്രാബല്യത്തോടെ ശമ്പള വ്യത്യാസം പരിഹരിക്കാൻ സ്ഥിരം ഫണ്ട് രൂപീകരിക്കണമെന്നും അസോസിയേഷൻ ആവശ്യപ്പെട്ടു.
തുടക്കത്തിലെ ശമ്പള ചർച്ചകളിൽ വനിതകൾ നേരിടുന്ന തടസ്സങ്ങളും കുടുംബപരമായ ഉത്തരവാദിത്തങ്ങളും ഉന്നത പദവികളിലേക്കുള്ള സ്ഥാനക്കയറ്റത്തെ ബാധിക്കുന്നുണ്ടെന്ന് വിദഗ്ധർ ചൂണ്ടിക്കാണിക്കുന്നു. ഒന്റാറിയോയിലെ നിയമപ്രകാരം തുല്യ ജോലിക്ക് തുല്യ വേതനം ഉറപ്പാക്കേണ്ടതുണ്ടെന്നും, കൃത്യമായ ഇടവേളകളിൽ ഇത്തരം ശമ്പള വിവരങ്ങൾ പുറത്തുവിടുന്നത് വിവേചനങ്ങൾ ഇല്ലാതാക്കാൻ സഹായിക്കുമെന്നുമാണ് അധ്യാപക സംഘടനകളുടെ വിലയിരുത്തൽ. വിഷയത്തിൽ അടിയന്തരമായി പരിഹാരം കാണണമെന്ന ആവശ്യവുമായി കാനഡയിലെ വിവിധ സർവകലാശാലാ യൂണിയനുകൾ രംഗത്തെത്തിയിട്ടുണ്ട്.
Report alleges gender discrimination at Canadian universities
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
