സിഡ്നി: ഇന്ത്യൻ ക്രിക്കറ്റിലെ പുത്തൻ റൺവേട്ടക്കാരൻ വൈഭവ് സൂര്യവംശിയെന്ന കൗമാര വിസ്മയത്തിന് മുന്നിൽ കൈകൂപ്പി ഓസ്ട്രേലിയൻ ക്യാപ്റ്റൻ പാറ്റ് കമിൻസ്. ഐപിഎല്ലിൽ രാജസ്ഥാൻ റോയൽസിന് വേണ്ടി സൺറൈസേഴ്സ് ഹൈദരാബാദിന്റെ ബൗളിങ് നിരയെ തല്ലിച്ചതച്ച വൈഭവിനെ തമാശരൂപേണ പുകഴ്ത്തുകയാണ് കമിൻസ്. 15 വയസ്സുകാരനായ ഈ ഇടങ്കയ്യൻ ബാറ്റർ ഇപ്പോൾ കളിക്കളത്തിലല്ല, സ്കൂളിലാണ് ഇരിക്കേണ്ടതെന്നാണ് സൺറൈസേഴ്സ് ക്യാപ്റ്റൻ കൂടിയായ കമിൻസിന്റെ പ്രതികരണം.
കമിൻസിനെതിരെ സീസണിലെ അതിവേഗ സെഞ്ചറി (36 പന്തിൽ) കുറിച്ച വൈഭവ്, എലിമിനേറ്റർ പോരാട്ടത്തിലും ഹൈദരാബാദിനെ വെറുതെ വിട്ടില്ല. വെറും 29 പന്തിൽ 97 റൺസാണ് താരം അടിച്ചുകൂട്ടിയത്. വൈഭവിന്റെ ഈ അതിക്രമത്തിന് ഇരയായ കമിൻസ് തന്റെ 4 ഓവറിൽ വിക്കറ്റൊന്നും നേടാനാകാതെ 64 റൺസാണ് വഴങ്ങിയത്. ഒടുവിൽ രാജസ്ഥാനോട് തോറ്റ് സൺറൈസേഴ്സ് ടൂർണമെന്റിൽ നിന്ന് പുറത്താകുകയും ചെയ്തു.
“അവൻ ഒരു അസാധ്യ പ്രതിഭയാണ്. പന്തിനെ അതിശക്തമായി അടിച്ചുപറത്തുന്ന ആ ശൈലി കാണാൻ തന്നെ ഭംഗിയാണ്. ഒരു 15 വയസ്സുകാരൻ പയ്യൻ ഇങ്ങനെ കളിക്കുമെന്ന് ഞാൻ സ്വപ്നത്തിൽ പോലും വിചാരിച്ചതല്ല. പ്രായം 30 ആയാലും 15 ആയാലും അവൻ പന്തുകളെ നേരിടുന്ന രീതി അസാധ്യമാണ്. അവൻ ഹൈസ്കൂളിൽ പോയിരുന്നെങ്കിൽ എന്ന് ഞാൻ ആഗ്രഹിച്ചുപോയി, അങ്ങനെയെങ്കിൽ എനിക്ക് അവനെതിരെ പന്തെറിയേണ്ടി വരില്ലായിരുന്നു! അവന്റെ ബാറ്റിങ്ങിൽ പിഴവുകൾ കണ്ടെത്തുക വളരെ ബുദ്ധിമുട്ടാണ്.” ഒരു ഓസ്ട്രേലിയൻ മാധ്യമത്തിലെ ചർച്ചയ്ക്കിടെയാണ് കമിൻസ് വൈഭവിനെ ഇങ്ങനെ പ്രശംസകൊണ്ട് മൂടിയത്.
ഭയമില്ലാത്ത ബാറ്റിങ് ശൈലിയാണ് ഈ ബിഹാർ സ്വദേശിയായ കൗമാരക്കാരന്റേത്. ഐപിഎല്ലിൽ പാറ്റ് കമിൻസ്, ജസ്പ്രീത് ബുമ്ര, മിച്ചൽ സ്റ്റാർക്ക് എന്നീ ലോകോത്തര പേസർമാരെ നേരിട്ട ആദ്യ പന്തിൽ തന്നെ സിക്സറടിച്ചാണ് വൈഭവ് സൂര്യവംശി തന്റെ വരവറിയിച്ചത്. വരുംകാല ക്രിക്കറ്റ ഭരിക്കാൻ പോകുന്ന താരം തന്നെയാണ് വൈഭവ് എന്ന് അടിവരയിടുന്നതാണ് കമിൻസിന്റെ ഈ വാക്കുകൾ.
Pat Cummins Praises Young Indian Cricket Sensation Vaibhav Suryavanshi
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
