മോൺട്രിയൽ: ക്യുബെക്കിൽ കഴിഞ്ഞ ഏതാനും വർഷങ്ങളായി നിയമവിരുദ്ധ സസ്യവ്യാപാരം വൻതോതിൽ വർധിച്ചതായി കണ്ടെത്തൽ. വന്യജീവി കുറ്റകൃത്യങ്ങളെക്കുറിച്ചും ഓൺലൈൻ വ്യാപാരത്തെക്കുറിച്ചും ലിയാൻ വിൻസൻഡൻ നടത്തിയ പഠന റിപ്പോർട്ടിലാണ്, പ്രകൃതിയിൽ നിന്ന് അനധികൃതമായി ശേഖരിക്കുന്ന കാക്ടസ്, സക്കുലന്റ്സ് വിഭാഗത്തിൽപ്പെട്ട ചെടികൾ ഉപഭോക്താക്കൾക്ക് എളുപ്പത്തിൽ ലഭ്യമാകുന്നുണ്ടെന്ന വിവരമുള്ളത്. നിയമപരമായ പെർമിറ്റുകൾ ലഭിക്കാനുള്ള ബുദ്ധിമുട്ടും കുറഞ്ഞ വിലയുമാണ് സാധാരണക്കാരായ ഉപഭോക്താക്കളെ ഇത്തരത്തിൽ സസ്യങ്ങൾ വാങ്ങാൻ പ്രേരിപ്പിക്കുന്നതെന്ന് മേയ് 31-ന് പുറത്തുവിട്ട റിപ്പോർട്ട് വ്യക്തമാക്കുന്നു.
ലാവലിലെ പ്രമുഖ നഴ്സറിയായ ‘സെറസ് ലാവോയ്’ (Serres Lavoie) നൽകുന്ന വിവരങ്ങൾ പ്രകാരം കുറഞ്ഞ പരിചരണവും ഭംഗിയുമാണ് ഈ ചെടികളെ വിപണിയിൽ പ്രിയങ്കരമാക്കുന്നത്. എന്നാൽ ‘പ്ലാന്റ് പ്രൊട്ടക്ഷൻ ആക്ട്’ പ്രകാരം കാനഡയിലേക്ക് സസ്യങ്ങൾ ഇറക്കുമതി ചെയ്യുന്നതിന് കടുത്ത നിയന്ത്രണങ്ങളും മൂന്ന് വ്യത്യസ്ത പെർമിറ്റുകളും ആവശ്യമാണ്. ഇന്റർപോളിന്റെ കണക്കുകൾ പ്രകാരം ആഗോളതലത്തിൽ ഈ നിയമവിരുദ്ധ വ്യാപാരം ശക്തമാണ്. കാനഡയിലെ എൻവയോൺമെന്റ് ആൻഡ് ക്ലൈമറ്റ് ചേഞ്ച് വിഭാഗം കഴിഞ്ഞ അഞ്ച് വർഷത്തിനിടെ ഇത്തരത്തിൽ കടത്താൻ ശ്രമിച്ച 655 സംരക്ഷിത സസ്യങ്ങളാണ് രാജ്യത്ത് പിടിച്ചെടുത്തത്.
eBay, Etsy തുടങ്ങിയ പ്രമുഖ ഓൺലൈൻ പ്ലാറ്റ്ഫോമുകൾ വഴി പെർമിറ്റുകൾ ഇല്ലാതെ തന്നെ ഇത്തരം അപൂർവ സസ്യങ്ങൾ വിൽക്കപ്പെടുന്നതാണ് നിലവിലെ പ്രധാന പ്രതിസന്ധി. കുറഞ്ഞ വിലയ്ക്ക് ലഭിക്കുന്ന വലിയ ചെടികൾ പ്രകൃതിയിൽ നിന്ന് നേരിട്ട് കടത്തുന്നവയാകാനാണ് സാധ്യതയെന്ന് ഈ മേഖലയിലെ വിദഗ്ദ്ധർ ചൂണ്ടിക്കാണിക്കുന്നു. ഈ അനധികൃത ശേഖരണം അപൂർവ സസ്യങ്ങളുടെ വംശനാശത്തിനും സ്വാഭാവിക പരിസ്ഥിതിയുടെ തകർച്ചയ്ക്കും കാരണമാകുന്നുണ്ടെന്നും, കസ്റ്റംസ് പരിശോധനകൾ കർശനമാക്കാത്തത് വ്യാപാരം വർധിക്കാൻ ഇടയാക്കുന്നുണ്ടെന്നും പഠനം മുന്നറിയിപ്പ് നൽകുന്നു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Online plant trade flouts laws; 655 protected plants seized in Canada in five years
