ഒട്ടാവ: കാനഡയിലെ കൗമാരക്കാർക്കും യുവാക്കൾക്കുമിടയിൽ ഇ-സിഗരറ്റ് അഥവാ വേപ്പിങ് (Vaping) ഉപയോഗം ആശങ്കാജനകമായ രീതിയിൽ വർധിക്കുന്നു. ഈ സാഹചര്യത്തിൽ രാജ്യത്തെ നികോട്ടിൻ ഉപയോഗം 2045-ഓടെ മൊത്തം ജനസംഖ്യയുടെ അഞ്ച് ശതമാനത്തിൽ താഴെയായി കുറച്ചുകൊണ്ടുവരാൻ അടിയന്തര നടപടികൾ സ്വീകരിക്കണമെന്ന് പ്രമുഖ ആരോഗ്യ സംഘടനകൾ കനേഡിയൻ ഫെഡറൽ സർക്കാരിനോട് ആവശ്യപ്പെട്ടു. ഒട്ടാവയിൽ നടന്ന പുകയില-നികോട്ടിൻ വിരുദ്ധ ഉന്നതതല യോഗത്തിലാണ് ആരോഗ്യ വിദഗ്ധർ ഈ കൂട്ടായ ആവശ്യം മുന്നോട്ട് വെച്ചത്. 25 വയസ്സിന് താഴെയുള്ളവരിലാണ് നിലവിൽ നികോട്ടിൻ ഉപയോഗം ഏറ്റവും വേഗത്തിൽ പടരുന്നതെന്ന് വാർത്താ ഏജൻസികൾ റിപ്പോർട്ട് ചെയ്യുന്നു.
സ്റ്റാറ്റിസ്റ്റിക്സ് കാനഡയുടെ ഏറ്റവും പുതിയ സർവേ റിപ്പോർട്ട് അനുസരിച്ച്, 7 മുതൽ 12 വരെയുള്ള ക്ലാസുകളിലെ 15 ശതമാനം വിദ്യാർത്ഥികളും കഴിഞ്ഞ ഒരു മാസത്തിനിടെ വേപ്പിങ് ഉൽപ്പന്നങ്ങൾ ഉപയോഗിച്ചതായി സമ്മതിച്ചിട്ടുണ്ട്. ഇതിൽ പന്ത്രണ്ടാം ക്ലാസിലെ വിദ്യാർത്ഥികളുടെ നിരക്ക് 27 ശതമാനമെന്ന ഭീതിദമായ നിലയിലാണ്. സിഗരറ്റുകളെ അപേക്ഷിച്ച് വിലക്കുറവാണ് എന്നതും വ്യത്യസ്ത രുചികളിലും മണങ്ങളിലും (Flavours) ലഭ്യമാണ് എന്നതുമാണ് വേപ്പിങ് ഉൽപ്പന്നങ്ങളിലേക്ക് കുട്ടികളെ ആകർഷിക്കുന്നത്.
സിഗരറ്റ് പാക്കറ്റുകളിലേതുപോലെ ആരോഗ്യ മുന്നറിയിപ്പുകളോ ഭയപ്പെടുത്തുന്ന ചിത്രങ്ങളോ ഇവയിൽ ഉണ്ടാകാറില്ലെന്നതും സോഷ്യൽ മീഡിയ വഴിയുള്ള പ്രചാരണങ്ങളും ഇതിനെയൊരു ‘ട്രെൻഡ്’ ആയി കാണാൻ കൗമാരക്കാരെ പ്രേരിപ്പിക്കുന്നു. വേപ്പിങ് വഴി ശരീരത്തിലെത്തുന്ന നികോട്ടിൻ മസ്തിഷ്ക ഘടനയെ സ്വാധീനിക്കുകയും കടുത്ത ലഹരിക്ക് അടിമകളാക്കുകയും ചെയ്യുമെന്ന് ‘ആക്ഷൻ ഓൺ സ്മോക്കിങ് ആൻഡ് ഹെൽത്ത്’ എക്സിക്യൂട്ടീവ് ഡയറക്ടർ ലെസ് ഹേഗൻ ചൂണ്ടിക്കാണിക്കുന്നു.
വേപ്പിങ് ഉൽപ്പന്നങ്ങളിലൂടെ ലഭിക്കുന്ന നികോട്ടിന്റെ അളവ് തികയാതെ വരുമ്പോൾ, യുവാക്കൾ സ്വാഭാവികമായും പുകയില സിഗരറ്റുകളിലേക്ക് തിരിയുമെന്നാണ് പഠനങ്ങൾ വ്യക്തമാക്കുന്നത്. ഇ-സിഗരറ്റുകളുടെ പൂർണ്ണമായ ആരോഗ്യ പ്രത്യാഘാതങ്ങൾ ഇനിയും പഠനവിധേയമായിട്ടില്ലെങ്കിലും, ഇവ ഗുരുതരമായ ശ്വാസകോശ-ഹൃദയ രോഗങ്ങൾക്ക് കാരണമാകുന്നുണ്ടെന്ന് ആരോഗ്യ വിദഗ്ധർ സാക്ഷ്യപ്പെടുത്തുന്നു. കൗമാരപ്രായത്തിൽ മസ്തിഷ്ക വികാസം തുടരുന്നതിനാൽ, ഈ ഘട്ടത്തിലെ നികോട്ടിൻ ഉപയോഗം കുട്ടികളുടെ വളർച്ചയെ ദോഷകരമായി ബാധിക്കുമെന്ന് കാനഡ ആരോഗ്യ മന്ത്രാലയവും മുന്നറിയിപ്പ് നൽകുന്നു.
പുകയില ഉപയോഗം കുറയ്ക്കുന്നതിൽ കാനഡ മുൻവർഷങ്ങളിൽ കൈവരിച്ച മികച്ച പുരോഗതി വേപ്പിങ് വ്യാപനത്തോടെ ഇല്ലാതാകുമെന്ന ആശങ്കയിലാണ് ആരോഗ്യ പ്രവർത്തകർ. വേപ്പിങ് ഉൽപ്പന്നങ്ങളുടെ ഓൺലൈൻ വിൽപന പൂർണ്ണമായി നിരോധിക്കുക, ഉൽപ്പന്നങ്ങളുടെ ആകർഷകമായ ഫ്ലേവറുകളിൽ നിയന്ത്രണം കൊണ്ടുവരിക, പാക്കറ്റുകളിൽ വലിയ രീതിയിലുള്ള ആരോഗ്യ മുന്നറിയിപ്പുകൾ നിർബന്ധമാക്കുക, ഉയർന്ന നികുതി ചുമത്തുക എന്നിവയാണ് നിലവിലെ പ്രതിസന്ധി മറികടക്കാൻ വിദഗ്ധർ നിർദ്ദേശിക്കുന്ന പ്രധാന പോംവഴികൾ. വരുംതലമുറയെ മാരകമായ ലഹരിവലയിൽ നിന്നും രക്ഷിക്കാൻ സർക്കാർ എത്രയും വേഗം കർശനമായ നിയമനിർമ്മാണം നടത്തുമോ എന്നാണ് ഇനി അറിയേണ്ടത്.
Teenagers in Canada are becoming addicted to e-cigarettes; Health sector concerned
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
